ຕອງກາປະກາດລັອກດາວຄັ້ງທຳອິດ ເຫດພົບຜູ້ຕິດເຊື້ອໂຄວິດ 5 ຄົນ ຫລັງນາໆຊາດສົ່ງສິ່ງຂອງຊ່ວຍເຫລືອ
ຕອງກາພົບຜູ້ຕິດເຊື້ອໂຄວິດຄົນທຳອິດຫລັງລອດມາເກືອບ 2 ປີ ຫລ້າສຸດປະກາດລັອກດາວທົ່ວປະເທດຢ່າງໜ້ອຍ 48 ຊົ່ວໂມງ.
ວັນທີ 2 ກຸມພາ 2022, ສຳນັກຂ່າວ Al Jazeera ລາຍງານວ່າ: ທາງການຕອງກາປະກາດໃຊ້ມາດຕະການລັອກດາວເພື່ອຄວບຄຸມການລະບາດຂອງພະຍາດໂຄວິດ-19 ເປັນຄັ້ງທຳອິດ ນັບແຕ່ເລີ່ມມີການລະບາດ ຫລັງພົບເຈົ້າໜ້າທີ່ປະຈຳທ່າເຮືອມີຜົນກວດເຊື້ອເປັນບວກ.
ການລັອກດາວຄັ້ງນີ້ເລີ່ມຂຶ້ນຫລັງຈາກຕອງກາເປີດຮັບການຊ່ວຍເຫລືອດ້ານສິ່ງຂອງຈາກນາໆຊາດ ເພື່ອຊ່ວຍບັນເທົາຜົນກະທົບທີ່ເກີດຈາກເຫດສຶນາມິ ແລະ ພູໄຟໃຕ້ທະເລລະເບີດ ເມື່ອວັນທີ 16 ມັງກອນຜ່ານມາ.
ຕາມລາຍງານລະບຸວ່າ: ມີການກວດພົບເຊື້ອໂຄວິດ-19 ໃນເຈົ້າໜ້າທີ່ປະຈຳທ່າເຮືອ 2 ຄົນ ແຕ່ເປັນກຸ່ມທີ່ບໍ່ໄດ້ເຮັດວຽກໃນທ່າເຮືອທີ່ມີການນຳສົ່ງເຄື່ອງເຂົ້າມາຈາກເຮືອຕ່າງປະເທດ. ຈາກນັ້ນກໍໄດ້ພົບເຊື້ອໂຄວິດໃນຄອບຄົວຂອງເຈົ້າໜ້າທີ່ເພີ່ມອີກ 3 ຄົນ.
ຜ່ານມາ ຕອງກາສາມາດຫລີກລ່ຽງການລະບາດຂອງໂຄວິດ-19 ມາໄດ້ຕະຫລອດ ໂດຍໃຊ້ວິທີປິດຊາຍແດນນັບແຕ່ຕົ້ນປີ 2020 ໂດຍກ່ອນໜ້ານີ້ເຄີຍມີລາຍງານຜູ້ຕິດເຊື້ອພຽງຄົນດຽວເທົ່ານັ້ນ ຈາກຜູ້ທີ່ເດີນທາງກັບມາຈາກນິວຊີແລນ ແລະ ເຂົ້າຮັບການກັກຕົວໃນທັນທີ.
ຂະນະດຽວກັນ, ມີການກວດພົບເຊື້ອໂຄວິດໃນເຈົ້າໜ້າທີ່ 23 ຄົນໃນເຮືອ HMAS Adelaide ຂອງກອງທັບເຮືອອົດສະຕຣາລີ ຂະນະທີ່ຈອດທ່າເຮືອໃນຕອງກາເມື່ອອາທິດກ່ອນ ແລະ ຍັງພົບເຊື້ອໃນຈຸບິນໃນເຮືອບິນທີ່ນຳການຊ່ວຍເຫລືອຈາກຍີ່ປຸ່ນ ແລະ ອົດສະຕຣາລີເຂົ້າມານຳເຊັ່ນກັນ.
ນາຍົກລັດຖະມົນຕີ ຊີອາໂອຊີ ໂຊວາເລນີ ຂອງຕອງກາ ເປີດເຜີຍໃນການຖະແຫລງຂ່າວສຸກເສີນວ່າ: ສິ່ງສຳຄັນທີ່ສຸດໃນຕອນນີ້ ຄືການຢຸດການລະບາດຂອງເຊື້ອໄວຣັສ ແລະ ຢຸດການເຄື່ອນຍ້າຍຜູ້ສຳຜັດເຊື້ອ ນັ້ນຄືສາເຫດຂອງການລັອກດາວທົ່ວປະເທດ.
ຕໍ່ຈາກນີ້ ລັດຖະບານຈະປະເມີນສະຖານະການໃນທຸກໆ 48 ຊົ່ວໂມງ ເພື່ອຕັດສິນໃຈວ່າຈະຂະຫຍາຍລັອກດາວ ຫລື ບໍ່ ລະຫວ່າງນີ້ຂໍໃຫ້ທຸກຄົນຢູ່ແຕ່ເຮືອນ ລວມທັງປິດທຸລະກິດຕ່າງໆ ແລະ ໂຮງຮຽນຊົ່ວຄາວ ໂດຍອະນຸຍາດໃຫ້ເປີດສະເພາະຮ້ານຄ້າ ແລະ ບໍລິການທີ່ມີຄວາມຈຳເປັນເທົ່ານັ້ນ.
ອ້າງອີງ:
https://www.aljazeera.com/…/tonga-to-go-on-lockdown…
https://www.bbc.com/news/world-asia-60210867
