ໂຮງງານຜະລິດຢາເລກ 3 ຜະລິດຢາປິ່ນປົວຜູ້ປ່ວຍສຳລັບຜູ້ຕິດຝິ່ນໄດ້ສຳເລັດ
ທ່ານ ດຣ ລາຫຸນ ຈັນທະບຸດ ຜູ້ອໍານວຍການ ບໍລິສັດ ໂຮງງານຜະລິດຢາເລກ 3 ກະຊວງສາທາລະນະສຸກ ໃຫ້ສຳພາດຜ່ານໜັງສືພິມຄວາມສະຫງົບ ເມື່ອບໍ່ດົນມານີ້ວ່າ:
ຢາທີ່ນໍາໃຊ້ເຂົ້າໃນການປິ່ນປົວຜູ້ປ່ວຍຕິດຢາເສບຕິດທີ່ທາງໂຮງງານຜະລິດຢາເລກ 3 ໄດ້ຜະລິດອອກມານັ້ນ ແມ່ນຜະລິດຕະພັນຢາ ສຳລັບຜູ້ຕິດຝິ່ນ ມີຜົນຕໍ່ລະບົບປະສາດຂອງຜູ້ປ່ວຍເມື່ອກິນແລ້ວຈະຮູ້ສຶກຄືກັບເສບຢາອີ່ມ, ເປັນຢາປອມຫລອກ ມີຜົນຄ້າຍຄືກັບສານເສບຕິດແທ້ ແຕ່ມີສານຄືຢາເສບຕິດທີ່ຜູ້ປ່ວຍຕ້ອງການແທ້ ແຕ່ໃນຄວາມເປັນຈິງແມ່ນເປັນພຽງຢາປອມເພື່ອກະຕຸ້ນປະສາດສ່ວນກາງຂອງຜູ້ປ່ວຍໃຫ້ຮູ້ສຶກອິ່ມຕົວ ແລະ ບໍ່ຢາກເສບຢາເສບຕິດ ຈົນກ້າວໄປສູ່ການອອກຢາໄດ້ ແລະ ຫາຍດີຈາກການຕິດຢາເສບຕິດ, ແຕ່ການປິ່ນປົວນັ້ນຈະໃຊ້ເວລາສັ້ນ ຫລື ຍາວນັ້ນ ຂຶ້ນກັບຕົວຂອງຜູ້ປ່ວຍທີ່ເສບຢາເສບຕິດໃນລະດັບທີ່ແຕກຕ່າງກັນ.
ການຜະລິດຢາປິ່ນປົວຜູ້ປ່ວຍຕິດຢາເສບຕິດ ລວມເຖິງການແຈກຢາຍ ແລະ ນໍາໃຊ້ຢາແຕ່ລະຄັ້ງຕ້ອງໄດ້ຜ່ານຄະນະກໍາມະການຮັບຜິດຊອບກວດກາຈາກພາກສ່ວນທີ່ກ່ຽວຂ້ອງບົນພື້ນຖານຕາມການຕົກລົງເຫັນດີຈາກຂັ້ນເທິງໂດຍຜ່ານໜ່ວຍງານຄວບຄຸມຢາເສບຕິດ, ກົມອາຫານ ແລະ ຢາກະຊວງສາທາລະນະສຸກ. ສະນັ້ນ, ໂຮງງານຜະລິດຢາເລກ 3 ຈຶ່ງໄດ້ຜະລິດຢາເພື່ອປິ່ນປົວຜູ້ປ່ວຍຕາມແຜນຄວາມຕ້ອງການຂອງກະຊວງປ້ອງກັນຄວາມສະຫງົບ ເຊິ່ງຢາດັ່ງກ່າວມີອາຍຸນໍາໃຊ້ໄດ້ 3 ປີນັບຈາກມື້ທີ່ຜະລິດ.
