ເກີດເຫດດິນເຈື່ອນຫລັງຝົນຕົກໜັກ ໃນເມືອງຫລວງເອກົວດໍ ມີຜູ້ເສຍຊີວິດແລ້ວຢ່າງໜ້ອຍ 23 ຄົນ
ມີຜູ້ເສຍຊີວິດຢ່າງໜ້ອຍ 23 ຄົນ ຈາກເຫດດິນເຈື່ອນທີ່ເກີດຈາກຝົນຕົກໜັກໃນນະຄອນຫລວງກີໂຕ ຂອງເອກົວດໍ ໃນວັນທີ 31 ມັງກອນຜ່ານມາ.
ຊານຕິອາໂກ ກົວເດຣາສ ເຈົ້າຄອງນະຄອນຫລວງກີໂຕ ກ່າວຕໍ່ນັກຂ່າວໃນວັນທີ 1 ກຸມພາວ່າ: ມີຜູ້ບາດເຈັບຈາກໄພພິບັດຄັ້ງນີ້ 47 ຄົນ ໂດຍໃນຈຳນວນນີ້ມີ 2 ຄົນຍັງຢູ່ໃນຂັ້ນວິກິດ, ສ່ວນ 7 ຄົນອອກຈາກໂຮງໝໍແລ້ວ. ຂະນະທີ່ເຈົ້າໜ້າທີ່ເຕືອນວ່າ: ອາດພົບຜູ້ເສຍຊີວິດເພີ່ມຂຶ້ນ ໃນຂະນະທີ່ເຈົ້າໜ້າທີ່ກຳລັງເກັບກວາດເສດຊາກທີ່ກອງທັບເພື່ອຄົ້ນຫາຜູ້ທີ່ອາດຕົກຄ້າງຢູ່.
ນາງ ອັລບາ ໂຄຕາຄາຊິ ປະຊາຊົນທີ່ອົບພະຍົບລູກສາວສອງຄົນອອກມາ ເປີດເຜີຍວ່າ: ນາງເຫັນແມ່ນ້ຳສີດຳຂະໜາດມະຫຶມາທີ່ພັດເອົາທຸກສິ່ງຫາຍໄປ ເຮັດໃຫ້ນາງຕ້ອງປີນກຳແພງໜີ.
ເຈົ້າຄອງນະຄອນຍັງລະບຸອີກວ່າ: ພາຍຸໜັກທີ່ເຮັດໃຫ້ເກີດດິນເຈື່ອນໃນນະຄອນຫລວງກີໂຕນັ້ນ ມີປະລິມານນ້ຳຝົນເທົ່າກັບ 75 ລິດຕໍ່ຕາແມັດ ເຊິ່ງເປັນປະລິມານຫລາຍທີ່ສຸດໃນນະຄອນຫລວງກີໂຕໃນຮອບເກືອບ 2 ທົດສະວັດຜ່ານມາ ໂດຍປະລິມານນ້ຳຝົນທີ່ໃກ້ຄຽງກັນໄດ້ຮັບການບັນທຶກຄັ້ງຫລ້າສຸດໃນປີ 2003.
ແລະ ຈາກວິດີໂອທີ່ໂພລລົງໂຊຊຽວມີເດຍສະແດງໃຫ້ເຫັນວ່າ: ມີປະຊາຊົນຈຳນວນຫລາຍຮ້ອງຂໍການຊ່ວຍເຫລືອ, ຂະນະທີ່ຄື້ນຂີ້ຕົມສູງຂະໜາດ 3 ແມັດ ໄຫລຜ່ານຖະໜົນໃນນະຄອນຫລວງກີໂຕ ສ້າງຄວາມເສຍຫາຍໃຫ້ຕົ້ນໄມ້, ຍານພາຫະນະ, ຖັງຂີ້ເຫຍື້ອ ແລະ ເສົາໄຟຟ້າ ເຊິ່ງບາງສ່ວນຍັງຖືກຝັງຢູ່ໃຕ້ຂີ້ຕົມ.
ອ້າງອີງ:
- https://edition.cnn.com/2022/02/01/americas/ecuador-landslide-intl-latam/index.html
- https://www.theguardian.com/world/2022/feb/02/ecuador-landslide-deaths-hillside-collapses-quito
