ນາຍົກລັດຖະມົນຕີອົດສະຕຣາລີຍອມຮັບ ດຳເນີນນະໂຍບາຍໂຄວິດຜິດພາດ ເຮັດໃຫ້ຄະແນນຕົກກ່ອນເລືອກຕັ້ງກາງປີ

ລັດຖະບານອົດສະຕຣາລີຜະເຊີນຄະແນນຄວາມນິຍົມຕົກຕໍ່າ, ນາຍົກລັດຖະມົນຕີເຜີຍຮັບຮູ້ເຖິງສຽງວິຈານ, ຂະນະທີ່ການເລືອກຕັ້ງກຳລັງໃກ້ເຂົ້າມາ.

ວັນທີ 1 ກຸມພາ 2022, ສຳນັກຂ່າວບລູມເບິກ (Bloomberg) ລາຍງານຄຳກ່າວຂອງນາຍົກລັດຖະມົນຕີ ສະກອດ ມໍຣິສັນ ຂອງອົດສະຕຣາລີ ທີ່ອອກມາຍອມຮັບວ່າ: ລັດຖະບານບໍ່ໄດ້ດຳເນີນນະໂຍບາຍກ່ຽວກັບໂຄວິດ-19 ໄດ້ຢ່າງຖືກຕ້ອງທັງໝົດ. ຂະນະທີ່ຜົນໂຫວດຊີ້ວ່າ: ຄະແນນນິຍົມຂອງລັດຖະບານຕົກຕໍ່າ ກ່ອນຈະມີການເລືອກຕັ້ງໃນຊ່ວງກາງປີນີ້.

ໃນການກ່າວສູນທອນພົດຕໍ່ສະໂມສອນສື່ມວນຊົນແຫ່ງຊາດ, ນາຍົກລັດຖະມົນຕີ ມໍຣິສັນ ເຜີຍວ່າ: ທ່ານຍອມຮັບສຽງວິພາກວິຈານທີ່ເກີດຂຶ້ນຈາກມາດຕະການຮັບມືໂຄວິດ-19, ແຕ່ເມື່ອນັກຂ່າວຖາມວ່າ: ທ່ານຈະຂໍໂທດຕໍ່ປະຊາຊົນ ຫລື ບໍ່, ນາຍົກລັດຖະມົນຕີ ມໍຣິສັນ ຕອບພຽງວ່າ: ທ່ານບໍ່ເຊື່ອວ່າຜູ້ມີສິດເລືອກຕັ້ງຄາດຫວັງຄວາມສົມບູນແບບຈາກທ່ານ.

ນາຍົກລັດຖະມົນຕີ ມໍຣິສັນ ກ່າວອີກວ່າ: ການມາເຖິງຂອງເຊື້ອໂອມິຄຣອນເຮັດໃຫ້ທຸກສິ່ງທຸກຢ່າງປ່ຽນໄປ ຄືກັບວ່າຕ້ອງຕໍ່ສູ້ກັບເຊື້ອໄວຣັສອີກຊະນິດໜຶ່ງທີ່ແຕກຕ່າງອອກໄປ.

ເຖິງຢ່າງໃດກໍຕາມ, ຜູ້ນຳອົດສະຕຣາລີຍັງຍົກວ່າ: ເສດຖະກິດຂອງອົດສະຕຣາລີກຳລັງຢູ່ໃນສະພາບທີ່ແຂງແກ່ນ ເຫັນໄດ້ຈາກອັດຕາການວ່າງງານທີ່ເຫລືອພຽງ 4,2% ເຊິ່ງເປັນອັດຕາຕໍ່າສຸດນັບແຕ່ປີ 2008. ພ້ອມທັງປະກາດວ່າ: ຈະໃຊ້ງົບປະມານເພີ່ມ 2 ພັນລ້ານໂດລາອົດສະຕຣາລີ ເພື່ອສ້າງຕຳແໜ່ງງານດ້ານການວິໄຈເພີ່ມຂຶ້ນ ໂດຍຫວັງຈະສະໜັບສະໜູນໃນດ້ານອຸດສາຫະກຳການຜະລິດພາຍໃນປະເທດ.

ຂະນະທີ່ຜົນໂຫວດສະແດງໃຫ້ເຫັນເຖິງຄວາມກັງວົນຂອງຊາວອົດສະຕຣາລີທີ່ມີຕໍ່ລັດຖະບານ ຫລັງຈາກພົບເຊື້ອສາຍພັນໂອມິຄຣອນແພ່ລະບາດ ຈົນມີຜູ້ຕິດເຊື້ອຕໍ່ວັນສູງເຖິງຫລັກແສນຄົນເມື່ອຊ່ວງກາງເດືອນມັງກອນຜ່ານມາ.

ມີການເປີດເຜີຍຜົນສຳຫລວດຈາກ Newspoll ອອກມາເມື່ອວັນທີ 30 ມັງກອນ ປາກົດວ່າພັກແຮງງານ ເຊິ່ງເປັນຝ່າຍຄ້ານ ມີຄະແນນນິຍົມ 56%, ຂະນະທີ່ລັດຖະບານມີພຽງ 44% ຖືເປັນຄະແນນຕົກຕໍ່າທີ່ສຸດຂອງນາຍົກລັດຖະມົນຕີ ມໍຣິສັນ ນັບແຕ່ເດືອນກຸມພາ 2020 ໂດຍກົດໝາຍອົດສະຕຣາລີກຳນົດໃຫ້ນາຍົກລັດຖະມົນຕີຈະຕ້ອງເປີດໃຫ້ມີການເລືອກຕັ້ງພາຍໃນເດືອຍພຶດສະພານີ້.

ອ້າງອີງ:

https://www.bloomberg.com/…/australia-pm-admits-covid…

https://www.abc.net.au/…/scott-morrison…/100795336