ບໍ່ປະໝາດ ບໍ່ລະເຫລີງ ເຖິງວ່າຜູ້ຕິດເຊື້ອນັບມື້ໜ້ອຍລົງ

ຫລາຍອາທິດຜ່ານມາ, ຜູ້ຕິດເຊື້ອໂຄວິດ-19 ໃໝ່ມີທ່າອ່ຽງຫລຸດລົງຈາກຫົວພັນລົງມາຫົວຮ້ອຍ, ຂະນະທີ່ ຢູ່ນະຄອນຫລວງວຽງຈັນ ໄດ້ຫລຸດລົງມາແດ່ແລ້ວ, ແນວໃດກໍດີ ຄະນະສະເພາະກິດ ຍັງປ່າວເຕືອນສັງຄົມທຸກມື້ໂດຍຂໍໃຫ້ມີສະຕິ, ເອົາໃຈໃສ່ປະຕິບັດບັນດາມາດຕະການປ້ອງກັນໃຫ້ເຂັ້ມງວດ, ພະຍາຍາມຮຽນຮູ້ຢູ່ ກັບມັນ ບໍ່ໃຫ້ເປັນໄພຮ້າຍແຮງ ທັງຮຽກຮ້ອງໄປສັກວັກຊີນໃຫ້ຄົບຕາມການແນະນໍາ…ຄວາມຈິງແລ້ວບໍ່ວາເປັນກໍລະນີໃດ, ການບໍ່ປະໝາດ ບໍ່ລະເຫລີງ ສໍາຄັນຫລາຍເພື່ອຄວາມສະຫງົບປອດໄພ ຊຶ່ງພະຍາດນີ້ທັງຢູ່ປະເທດເຮົາ ກໍຄືຫລາຍປະເທດ ຍັງເປັນສິ່ງທ້າທາຍ ກາຍເປັນຂໍ້ຫຍຸ້ງຍາກ ກະທົບຕໍ່ການພັດທະນາກໍຄືການດໍາລົງຊີວິດໃນສັງຄົມໂລກ.

ເຖິງວ່າສະພາບໂດຍລວມມີລັກສະນະເບົາບາງລົງ, ແຕ່ພວກເຮົາຍັງຈໍາເປັນ ຕ້ອງສືບຕໍ່ປະຕິບັດມາດຕະ ການຢ່າງເຂັ້ມງວດ ໂດຍພື້ນຖານງ່າຍໆຄື ການໃສ່ຜ້າອັດປາກດັງ, ການຮັກສາໄລຍະຫ່າງກັນ, ໃຊ້ສະບູ, ເຈວ ຫລື ເຫລົ້າສະເພາະ ລ້າງມືໃຫ້ສະອາດ, ການກິນອາຫານປຸງແຕ່ງສຸກໃໝ່…ສໍາຄັນ, ການຊຸມແຊວ ໃນໂອກາດຕ່າງໆ ຕ້ອງພ້ອມຫັນປ່ຽນພຶດຕິກໍາທີ່ຈະເກີດຄວາມສ່ຽງຕໍ່ການຕິດແປດພະຍາດ, ທຸກຄົນຕ້ອງມີສະຕິປ້ອງກັນຕະຫລອດເວລາ ໝາຍວ່າ ກັນດີກວ່າແກ້ ນັ້ນເອງ ເນື່ອງຈາກຜ່ານມາຍັງເຫັນການໃຫ້ບໍລິ ການ ບໍ່ວ່າຈະເປັນຮ້ານອາຫານ, ຮ້ານກິນດື່ມ…ໂດຍສະເພາະຢູ່ເຂດທີ່ຍັງພົບການລະບາດພະຍາດໂຄວິດ19 ຊຶ່ງດ້ານໜຶ່ງກໍດີໃຈນຳທີ່ຜູ້ໃຫ້ບໍລິການດໍາເນີນກິດຈະການໄປໄດ້, ແຕ່ອີກດ້ານກໍເປັນຫ່ວງຢ້ານພະຍາດມັນຕິດຫ້ອຍໄປນໍາ ແລ້ວລະບາດໃສ່ກັນ.!

ໂດຍລວມແລ້ວ, ພວກເຮົາຍັງຕ້ອງສືບຕໍ່ປະຕິບັດມາດຕະການປ້ອງກັນ, ຄວບຄຸມພະຍາດໂຄວິດ19 ທີ່ຄະນະສະເພາະກິດວາງອອກຢ່າງເຂັ້ມງວດ, ພະຍາຍາມຢູ່ກັບພະຍາດນີ້ຢ່າງເຂົ້າໃຈດີ ແລະ ຖືກຕ້ອງ, ພ້ອມກັນໄປສັກຢາວັກຊີນປ້ອງກັນໃຫ້ຄົບຖ້ວນ, ຫັນປ່ຽນການດໍາລົງຊີວິດ, ການເຮັດວຽກຢູ່ນໍາຫລາຍຄົນ ໃຫ້ປອດໄພ 100% ໂດຍການບໍ່ປະໝາດ ຢ່າຂາດສະຕິ ທຸກສິ່ງຢ່າງກໍຈະກັບຄືນສູ່ສະພາບປົກກະຕິ.