ເກີດເຫດໄຟໄໝ້ສະໜາມບຳບັດຂີ້ເຫຍື້ອ ຫລັກ 32
ແຫລ່ງຂ່າວຈາກ ວຽງຈັນທຸລະກິດສັງຄົມ ລາຍງານໂດຍອ້າງຕາມການເປີດເຜີຍຂອງທ່ານ ດາວວອນ ສັກດາພອນ ທີ່ປຶກສາສະໜາມບຳບັດຂີ້ເຫຍື້ອ ຫລັກ 32 ວ່າ: ເວລາປະມານ 12 ໂມງ 20 ນາທີ ຂອງວັນທີ 29 ມັງກອນ 2022 ພະນັກງານທີ່ປະຈຳການ ໄດ້ເຫັນຄວັນໄຟໄໝ້ ຢູ່ຂຸມຂີ້ເຫຍື້ອໝາຍເລກ 1 ໃນເບື້ອງຕົ້ນ, ທີມງານໄດ້ເອົາລົດນໍ້າເຂົ້າໄປມອດ ແຕ່ເນື່ອງຈາກ ຈຸດເກີດເຫດຢູ່ໃຈກາງຂອງຂຸມຂີ້ເຫຍື້ອ (ຂະໜາດເນື້ອທີ່200×200) ເຮັດໃຫ້ລົດສີດນໍ້າເຂົ້າໄປບໍ່ເຖິງ ບວກໃສ່ມີລົມພັດແຮງ ເຮັດໃຫ້ພະນັກງານບໍ່ສາມາດມອດໄຟຢູ່ຈຸດດັ່ງກ່າວໄດ້.
ຈາກນັ້ນ ພວກເຮົາຈຶ່ງລາຍງານໃຫ້ຫ້ອງການຄຸ້ມຄອງ ແລະ ບໍລິການຕົວເມືອງວຽງຈັນຊາບ ທັງໄດ້ປະສານດ່ວນໄປຫາກອງມອດໄຟ ນວ ແລະ ເມືອງໄຊທານີ ເພື່ອຂໍທິມລົດມອດໄຟ ເຂົ້າມາມອດໄຟຢູ່ສະໜາມ ທັງໄດ້ກະກຽມລົດຂອງຫ້ອງການ ຄບຕ ຈົນຮອດເວລາ 14ໂມງ ຈຶ່ງມີລົດມອດໄຟມາຮອດສະໜາມຂີ້ເຫຍື້ອ 1 ຄັນ ໃນເບື້ອງຕົ້ນມີພາຫະນະເຂົ້າມາຊ່ວຍມອດໄຟຄື ລົດສະໜາມຂີ້ເຫຍື້ອ 1 ຄັນ, ລົດຫ້ອງການ ຄບຕ 4 ຄັນ, ລົດກົມມອດໄຟ 4 ຄັນ ແລະ ລົດກອງມອດໄຟເມືອງໄຊທານີ 1 ຄັນ. ມາຮອດວັນທີ 30 ມັງກອນ ມີກົນຈັກພາຫະນະເຂົ້າມາສະໜາມເພື່ອແກ້ໄຂ ແລະ ສະ ກັດກັ້ນໄຟໄໝ້ ໃນນີ້ ມີລົດດຸດ 1 ຄັນ, ລົດຈົກ 4 ຄັນ, ລົດດ້າມ 12 ຄັນ, ລົດສີດນໍ້າ 5 ຄັນ, ລົດດັບເພີງ 3 ຄັນ ແລະ ລົດຈຶ້ງສີດນໍ້າ 2 ຄັນ.
ຫລັງສັງເກດ ພົບເນື້ອທີ່ຖືກໄຟໄໝ້ລຸກລາມກວມ 70% ຂອງຂຸມຂີ້ເຫຍື້ອໃນເນື້ອທີ່ 48,2 ເຮັກຕາ ໃນນີ້ ມີເນື້ອທີ່ຖືກໄຟໄໝ້ 33,74 ເຮັກຕາ, ສ່ວນສາເຫດຂອງໄຟໄໝ້ຍັງຢູ່ໃນຂັ້ນຕອນກວດສອບ.
ປັດຈຸບັນສາມາດຄວບຄຸມໄຟໄດ້ແລ້ວ ເຫຼືອພຽງຄວັນໄຟດຳໜາປົກຫຸ້ມບໍລິເວນເກີດເຫດ ແລະ ເຂດໃກ້ຄຽງ ກວມຫລາຍກິໂລແມັດມົນທົນ ເຊິ່ງສົ່ງຜົນກະທົບເປັນວົງກວ້າງຕໍ່ສະພາບອາກາດ ແລະ ສິ່ງແວດ ລ້ອມ ຊຶ່ງທີມງານພວມເລັ່ງແກ້ໄຂ ເພື່ອໃຫ້ສຳເລັດໂດຍໄວ.
