ສັກວັກຊີນຄົບໂດສ ແລະ ເຂັມກະຕຸ້ນ ສາມາດສ້າງພູມຄຸ້ມກັນ ແລະ ປ້ອງກັນການຕິດເຊື້ອໂຄວິດ-19
ທ່ານ ດຣ. ສີສະຫວາດ ສຸດທານີລະໄຊ ຮອງຫົວໜ້າກົມຄວບຄຸມພະຍາດຕິດຕໍ່, ກະຊວງສາທາລະນະສຸກ ກ່າວໃນວັນທີ 31 ມັງກອນ 2022 ວ່າ: ມື້ນີ້ເປັນອີກມື້ໜຶ່ງທີ່ມີລາຍງານການຕິດເຊື້ອຕໍ່າກວ່າ 400 ຄົນຕໍ່ມື້, ຫລາຍໂຮງໝໍພາກສະໜາມມີຄົນເຈັບໜ້ອຍລົງ ແລະ ບາງແຫ່ງກໍໄດ້ປິດຊົ່ວຄາວ, ແຕ່ຍັງມີລາຍງານການເສຍຊິວິດຂອງຜູ້ອາຍຸສູງ, ຜູ້ບໍ່ໄດ້ສັກວັກຊີນ ຫລື ຜູ້ປິ່ນປົວດ້ວຍຕົນເອງເຮັດໃຫ້ເກີດອາການໜັກ ຈຶ່ງມາໂຮງໝໍ.
ປັດຈຸບັນ, ສປປ ລາວ ເຝົ້າລະວັງພະຍາດໂຄວິດ-19 ສາຍພັນໂອມິຄຣອນ ເປັນພິເສດ ເນື່ອງຈາກເປັນສາຍພັນທີ່ພາໃຫ້ເກີດການລະບາດໃນທົ່ວໂລກ ແລະ ປະເທດໃກ້ຄຽງ ເປັນຈໍານວນຫລາຍ ເຊິ່ງເປັນສາຍພັນທີ່ແພ່ລະບາດໄວກວ່າ ສາຍພັນອື່ນ ໂດຍອາການຂອງສາຍພັນນີ້ ມີ, ໄຂ້, ໄອ, ເຈັບຄໍ. ສະນັ້ນ ຕ້ອງລະມັດລະວັງປ້ອງກັນຕົນເອງໂດຍການໃສ່ຜ້າອັດປາກ-ດັງ ແລະ ລ້າງມືໃສ່ສະບູ ຫລື ເຈວລ້າງມືເລື້ອຍໆ. ນອກນີ້ຂໍຮຽກຮ້ອງໄປສັກວັກຊິນໃຫ້ຄົບໂດສ ແລະ ເຂັມກະຕຸ້ນ ຕາມສະຖານທີ່ບໍລິການສາທາລະນະສຸກ ຫລື ຈຸດທີ່ຄະນະສະເພາະກິດໄດ້ກໍານົດໄວ້ ເພື່ອເຮັດໃຫ້ມີພູມຄຸ້ມກັນ ແລະ ປ້ອງກັນການຕິດເຊື້ອ.
