ແຟນສາວ ກຣີນວູດ ໂພສພາບອອກສື່ ຫລັງຖືກທຳຮ້າຍຮ່າງກາຍ

ນັກເຕະດາວຮຸ່ງຂອງແມນເຊສເຕີ ຢູໄນເຕັດ ກຽມຊວຍ ເມື່ອແຟນສາວໂພສພາບ ແລະ ຄລິບວີດີໂອລົງໃນສື່ສັງຄົມອອນລາຍ ຫລັງຖືກທຳຮ້າຍຮ່າງກາຍ ຈົນເຖິງຂັ້ນເລືອດຕົກຢາງອອກ.

ແຮຣຽດ ຣ໊ອບສັນ ແຟນສາວນາງແບບຄົນງາມ ຂອງ ເມສັນ ກຣີນວູດ ໄດ້ໂພສພາບ ແລະ ຄລິບລົງໃນອິນສະຕາແກຣມສ່ວນຕົວ ເພື່ອປະຈານເຖິງການກະທຳສຸດປ່າເຖື່ອນຂອງນັກເຕະອາຍຸ 20 ປີ ຫລັງກໍ່ເຫດທຳຮ້າຍຮ່າງກາຍຈົນໄດ້ຮັບບາດເຈັບ.

ໂດຍຄລິບໃນໄອຈີ ແຮຣຽດ ໄດ້ໂພສຂໍ້ຄວາມວ່າ ‘‘ ເຖິງທຸກຄົນທີ່ຢາກຮູ້ວ່າ ເມສັນ ກຣີນວູດ ເຮັດຫຍັງກັບຂ້ອຍໄວ້ແດ່ ’’ ພ້ອມກັບມີພາບທີ່ລາວຖືກທຳຮ້າຍຮ່າງກາຍຈົນເຖິງຂັ້ນເລືອດປາກອອກ.

ນອກຈາກນີ້ ນາງແບບສາວຊາວອັງກິດ ຍັງໄດ້ສະແດງພາບຮອຍຊຳ້ບໍລິເວນແຂນ ແລະ ຂາ ເຊິ່ງຄາດວ່າອາດມາຈາກການຖືກທຳຮ້າຍເຊັ່ນດຽວກັນ.

ສຳລັບ ແຮຣຽດ ຣ໊ອບສັນ ແລະ ເມສັນ ກຣີນວູດ ຄົບຫາກັນມາແຕ່ປີ 2019 ສະໄຫມທີຍັງຢູ່ມັດທະຍົມປາຍ ແລະ ເຖິງວ່າຈະເລີກກັນໄປໄລຍະຫນຶ່ງ ເພາະນັກເຕະແມນຢູ ກໍ່ເຫດ ພາສາວຂຶ້ນໂຮງແຮມລະຫວ່າງຮັບໃຊ້ທີມຊາດ ແຕ່ໃນທີ່ສຸດທັງຄູ່ກໍ່ກັບມາຄົບຫາກັນອີກເທື່ອທີສອງເມື່ອບໍ່ດົນມານີ້.