ລັດຖະບານ ແຄມເມີຣູນ ສັ່ງຫ້າມເດັກນ້ອຍເຂົ້າສະຫນາມເກມທີ່ເຫລືອໃນການແຂ່ງຂັນແອຟຣິກາຄັພເນຊັນ
ລັດຖະບານ ແຄມເມີຣູນ ສັ່ງຫ້າມເດັກນ້ອຍອາຍຸຕ່ຳກວ່າ 11 ປີ ເຂົ້າສະຫນາມໃນທີ່ຍັງເຫຼືອຂອງການແຂ່ງຂັນເຕະບານແອຟຣິກາ ຄັພ ອອຟ ເນຊັນ ຫລັງຈາກເກີດຢຽບກັນຕາຍກ່ອນເກມຮອບ 16 ທີມສຸດທ້າຍ ລະຫວ່າງ ແຄມເມີຣູນ ກັບ ຄໍໂມໂຣສ ໂດຍ 1 ໃນ 8 ຄົນເສຍຊີວິດ ເປັນເດັກຍິງອາຍຸ 6 ປີ…
ລັດຖະບານ ແຄມເມີຣູນ ມີຄຳສັ່ງຫ້າມເດັກນ້ອຍອາຍຸຕ່ຳກວ່າ 11 ປີ ເຂົ້າສະຫນາມໃນທຸກເກມທີ່ຍັງເຫຼືອຂອງການແຂ່ງຂັນເຕະບານ ແອຟຣີກາ ຄັພ ອອຟ ເນຊັນ 2022 ທີ່ເຂົາເຈົ້າເປັນເຈົ້າພາບ. ເປັນໜຶ່ງໃນມາດຕະການເພີ່ມທະວີຄວາມປອດໄພ. ພາຍຫຼັງທີ່ເກີດເຫດໂສກນາດຕະກຳແຟນບານຢຽບກັນຕາຍ ຈົນເຮັດໃຫ້ 8 ຄົນເສຍຊີວິດ ແລະ 38 ຄົນບາດເຈັບ, ກ່ອນການແຂ່ງຂັນຮອບ 16 ທີມສຸດທ້າຍ ທີ່ເຈົ້າພາບ ເອົາຊະນະ ໂຄໂມໂຣ 2-1 ເມື່ອວັນທີ 24 ມັງກອນທີ່ຜ່ານມາ. ເຊິ່ງຫນຶ່ງໃນຜູ້ເສຍຊີວິດມີເດັກຍິງອາຍຸ 6 ປີ.
ເຫດການໂສກເສົ້າດັ່ງກ່າວ ມັນເກີດຂຶ້ນຫຼັງຈາກແຟນບານເກືອບ 60,000 ຄົນ ໄດ້ແຫ່ກັນເຂົ້າໄປໃນສະຫນາມກິລາ ໂອເລມເບ ໃນນະຄອນຍາອຸນເດ ເພື່ອຊົມເກມ ແຄມເມີຣູນ ກັບ ຄໍໂມໂຣສ ທັງທີ່ສະຫນາມຈຳກັດຄວາມຈຸຢູ່ທີ່ 48,000 ເທົ່ານັ້ນ ໂດຍສະຫະພັນບານເຕະອາຟຣິກາ (CAF) ໄດ້ດໍາເນີນການສືບສວນ. ລວມເຖິງສັ່ງຍ້າຍສະຫນາມເກມໃນຮອບ 8 ທີມສຸດທ້າຍລະຫວ່າງ ອີຢິບ ກັບ ໂມຣັອກໂຄ ໃນວັນອາທິດທີ 31 ມັງກອນນີ້ ທີ່ຈະແຂ່ງຂັນໃນສະຫນາມດັ່ງກ່າວ ຍ້າຍໄປເຕະໃນສະຫນາມອື່ນໃນເມືອງດຽວກັນແທນ, ທ່ານ ປາທຣິດ ມອດເຊເປ ປະທານອົງການກິລາບານເຕະລະດັບທະວີບ ຢືນຢັນວ່າ ສະໜາມກິລາໂອເລມເບ ຈະບໍ່ຈັດການແຂ່ງຂັນຮອບຕັດເຊືອກ. ແລະຮອບຊິງຊະນະເລີດຕາມທີ່ກຳນົດໄວ້ ຖ້າສະຫະພັນບານເຕະແຄມເມີຣູນບໍ່ສາມາດຮັບປະກັນຄວາມປອດໄພໄດ້.
ໃນຂະນະທີ່ລັດຖະບານແຄມເມີຣູນ ໄດ້ສັ່ງເພີ່ມກຳລັງຕຳຫຼວດເພີ່ມອີກ 250 ຄົນ ເພື່ອເບິ່ງແຍງຄວາມປອດໄພໃນເກມຮອບ 8 ທີມສຸດທ້າຍ ທີ່ ແຄມເມີຣູນ ເອົາຊະນະ ແກມເບຍ 2-0 ໃນວັນເສົາທີ່ຜ່ານມາ. ແລະ ຍັງມີມາດຕະການຫ້າມເດັກອາຍຸຕ່ຳກວ່າ 11 ປີເຂົ້າໃນສະໜາມຕະຫລອດໄລຍະທີ່ເຫລືອຂອງການແຂ່ງຂັນ.
ສ່ວນ ນາຊິສເຊ ມູເອລເລ ຄອມບີ ລັດຖະມົນຕີວ່າການກະຊວງກິລາແຄມເມີຣູນ ຢືນຢັນວ່າລັດຖະບານພວມສືບສວນສາເຫດຂອງຄວາມໂສກເສົ້າ. ແນວໃດກໍຕາມ ລາວເປີດເຜີຍວ່າລາວເຊື່ອວ່າສາເຫດແມ່ນຍ້ອນແຟນບານຈໍານວນຫລາຍທີ່ເຂົ້າມາໃນສະຫນາມກ່ອນເກມຈະເລີ່ມບໍ່ດົນ ຫຼັງຈາກລໍຖ້າເບິ່ງການຖ່າຍທອດສົດຂອງຄູ່ກ່ອນເກມທີ່ຜ່ານມາຈົນຈົບ.
