ທ່ອງທ່ຽວພາຍໃນເງິນບໍ່ຮົ່ວໄຫລໄປຕ່າງປະເທດ

ໂດຍ:​ ທິດກໍ່າ

ນັບແຕ່ປະເທດຊາດຂອງພວກເຮົາໄດ້ມີການເລັ່ງພັດທະນາ ໂດຍສະເພາະການກໍ່ສ້າງຂົວ, ຖະໜົນຫົນທາງໃນທົ່ວປະເທດ ໄດ້ເຮັດໃຫ້ການເດີນທາງໄປມາຫາສູ່ກັນສະດວກສະບາຍຍິ່ງຂຶ້ນ. ພິເສດພາຍຫລັງໄດ້ມີເສັ້ນທາງດ່ວນ ລາວ-ຈີນ ຈາກນະຄອນຫລວງວຽງຈັນໄປຫາວັງວຽງ ແລະ ອັນພິເສດສຸດໆກໍແມ່ນພາຍຫລັງມີລົດໄຟຄວາມໄວສູງ ລາວ-ຈີນ ໄດ້ເປີດຮັບໃຊ້ບໍລິການກໍຍິ່ງເຮັດໃຫ້ການທ່ອງທ່ຽວພາຍໃນປະເທດມີບັນຍາກາດຄຶກຄັກຫລາຍສົມຄວນ. ເວົ້າໄດ້ວ່າ ນັບແຕ່ນີ້ເປັນຕົ້ນໄປ ຄົນລາວເຮົາ ກໍຄືນັກທ່ອງທ່ຽວທີ່ຕ້ອງການໄປທ່ຽວທາງພາກເໜືອຈາກນະຄອນຫລວງວຽງຈັນໄປຫາວັງວຽງ, ຫລວງພະບາງ, ບໍ່ແກ້ວ, ອຸດົມໄຊ, ຫລວງນ້ຳທາແມ່ນໄປງ່າຍມາງ່າຍສະດວກສະບາຍວ່ອງໄວທັນໃຈ ພໍປານຂີ່ຍົນ. ສົມກັບວ່າຍຸກນີ້ເປັນຍຸກມ້າປົ່ງເຂົາ ເສົາອອກດອກ ທາງສິບຄືນຊາວຄືນໄປພຽງຄາວມື້.

ຈາກປັດໄຈຕ່າງໆທີ່ໄດ້ກ່າວມາ ສົມທົບກັບປະເທດເຮົາ ກໍຄືບັນດາປະເທດຕ່າງໆໃນພາກພື້ນ ແລະ ທົ່ວໂລກພາກັນປິດປະເທດອັນເນື່ອງມາຈາກພະຍາດຈັງໄຮໂຄວິດ-19 ໄດ້ແພ່ລະບາດຂ້າຄົນໃນທົ່ວໂລກມາເປັນເວລາຍາວນານ ກໍຍິ່ງເປັນເງື່ອນໄຂໃຫ້ການທ່ອງທ່ຽວໄປມາມີອັນຈຳກັດຮັດແຄບ.

ແຕ່ແນວໃດກໍຕາມ, ສຳລັບ ສປປ ລາວເຮົາແລ້ວ ນັບແຕ່ມື້ໄດ້ຮັບຜົນກະທົບຈາກການແພ່ລະບາດຂອງພະຍາດໂຄວິດ-19 ພັກ ແລະ ລັດຖະບານເຮົາກໍພະຍາຍາມຫາທຸກວິທີເພື່ອຕ້ານ ແລະ ສະກັດກັ້ນບໍ່ໃຫ້ພົນລະເມືອງລາວເສຍຊີວິດຍ້ອນພະຍາດຊະນິດນີ້ຢ່າງຫລວງຫລາຍພາຍມາກ ຈຶ່ງໄດ້ອອກມາດຕະການໃຫ້ຜູ້ທີ່ຢູ່ໃນເປົ້າໝາຍທຸກຄົນໄດ້ເຂົ້າເຖິງວັກຊີນໃຫ້ຄົບເຂັມ ນັບທັງໃຊ້ມາດຕະການອື່ນໆທີ່ຮັບປະກັນໃຫ້ພົນລະເມືອງລາວທຸກຄົນໜີຫ່າງຈາກໂຄວິດ-19 ພ້ອມທັງຢູ່ໄດ້ກັບມັນຢ່າງມີຄວາມປອດໄພ.

ເພາະສະນັ້ນ, ມາຮອດປັດຈຸບັນນີ້ ເຫັນວ່າການລະບາດຂອງພະຍາດໂຄວິດ-19 ນັບມື້ຫລຸດລົງ ຈາກສະຖິຕິໃນໄລຍະຫລາຍເດືອນຜ່ານມາ ມີຜູ້ຕິດເຊື້ອລະດັບພັນກວ່າຄົນ ມາຮອດທ້າຍເດືອນມັງກອນ 2022 ຫລຸດລົງມາຢູ່ໃນລະດັບມື້ໜຶ່ງພຽງ 5 ຫາ 6 ຮ້ອຍຄົນ. ຄາດວ່ານັບຈາກນີ້ໄປ ຖ້າພວກເຮົາພ້ອມກັນມີສະຕິຄຸມເຂັ້ມດ້ວຍການເຂົ້າເຖິງວັກຊີນ ໄປພ້ອມກັບການນຳໃຊ້ຢາທີ່ຜະລິດອອກມາປິ່ນປົວແຕ່ລະໄລຍະ ພະຍາດໂຄວິດ-19 ກໍຈະຄ່ອຍຫລຸດລົງ ແລະ ມະຫັບມະຫາຍໄປຕາມການເວລາ.

ເມື່ອສະພາບເປັນຄືດັ່ງວ່ານີ້, ພັກ ແລະ ລັດຖະບານເຮົາກໍມີມາດຕະການຜ່ອນຜັນຫລາຍຢ່າງ ເຊິ່ງໜຶ່ງໃນແຜນນະໂຍນີ້ກໍແມ່ນກາເນປີດການທ່ອງທ່ຽວສີຂຽວ ໂດຍອະນຸຍາດໃຫ້ 10 ກວ່າປະເທດສາມາດເຂົ້າມາທ່ຽວລາວຕາມມາດຕະການທີ່ກຳນົດ. ສ່ວນຄົນລາວເຮົາເອງ ກໍພາກັນຈັດເຕັມເປັນໂອກາດລາວທ່ຽວລາວຈົນວ່າບັນດາໂຮງແຮມຢູ່ວັງວຽງ, ຫລວງພະບາງ, ອຸດົມໄຊ ຍັດແຫຍ້, ຖ້ຽວລົດໄຟຄວາມໄວສູງໄປກັບແຕ່ລະຖ້ຽວເຕັມຈົນໄດ້ຊື້ປີ້ໄວ້ລ່ວງໜ້າ. ນີ້ລະຄືບັນຍາກາດລາວທ່ຽວລາວຢູ່ພາຍໃນເງິນບໍ່ຮົ່ວໄຫລໄປຕ່າງປະເທດ.