ວັກຊີນ HIV ເລີ່ມທົດລອງໃນມະນຸດ ພັດທະນາດ້ວຍເຕັກໂນໂລຊີ mRNA ກ້າວສຳຄັນໃນຮອບ 40 ປີສູ້ພະຍາດເອດສ໌

ໂມເດິນາ ຈັບມືໂຄງການວັກຊີນເອດສ໌ ພັດທະນາວັກຊີນ HIV ດ້ວຍເຕັກໂນໂລຊີ mRNA ເລີ່ມທົດລອງໃນມະນຸດໄລຍະທຳອິດແລ້ວ ທ່າມກາງຄວາມຫວັງວ່າ ນີ້ຈະເປັນກຸນແຈຊ່ວຍຢັບຢັ້ງຄວາມສູນເສຍຈາກການຕິດເຊື້ອ HIV ເຊິ່ງແຕ່ລະປີມີຜູ້ເສຍຊີວິດຈຳນວນຫລາຍ.

ວັນທີ 28 ມັງກອນ 2022, ສຳນັກຂ່າວເອເອຟພີ ລາຍງານວ່າ: ການທົດລອງວັກຊີນ HIV ໃນມະນຸດໄລຍະທຳອິດໄດ້ເລີ່ມຕົ້ນຂຶ້ນແລ້ວໃນອາເມລິກາ ກັບອາສາສະໝັກສຸຂະພາບດີ 56 ຄົນ ໂດຍວັກຊີນດັ່ງກ່າວເປັນການຮ່ວມມືພັດທະນາລະຫວ່າງບໍລິສັດໂມເດິນາ (Moderna) ໜຶ່ງໃນຜູ້ພັດທະນາວັກຊີນປ້ອງກັນໂຄວິດ-19 ແລະ ໂຄງການລິເລີ່ມວັກຊີນເອດສ໌ສາກົນ (International AIDS Vaccine Initiative).

ສຳລັບວັກຊີນ HIV ທີ່ຢູ່ລະຫວ່າງການທົດລອງນີ້ ຖືກພັດທະນາດ້ວຍເຕັກໂນໂລຊີ mRNA ທີ່ນັກວິທະຍາສາດມີການວິໄຈມາດົນແລ້ວ ແຕ່ຖືກນຳມາໃຊ້ຢ່າງຮີບດ່ວນໃນໄລຍະ 2 ປີຜ່ານມາ ຈົນປະສົບຜົນສຳເລັດຜ່ານການພັດທະນາວັກຊີນປ້ອງກັນໂຄວິດ-19.

ສຳລັບຫລັກການຂອງວັກຊີນ HIV ຊະນິດ mRNA ນີ້ຄືການເຂົ້າໄປກະຕຸ້ນໃຫ້ຈຸລັງເມັດເລືອດຂາວກຸ່ມລິມໂຟໄຊ (B cell) ເຊິ່ງເປັນສ່ວນໜຶ່ງຂອງລະບົບພູມຕ້ານທານ ໃຫ້ສ້າງແອນຕີບໍດີໃນລະດັບທີ່ສາມາດຕໍ່ສູ້ກັບເຊື້ອ HIV ໄດ້ພຽງພໍ ແລະ ທັນເວລາ.

ຜ່ານມາ, ມະນຸດພະຍາຍາມພັດທະນາວັກຊີນເພື່ອຕໍ່ສູ້ກັບການຕິດເຊື້ອ HIV ເຊິ່ງນຳໄປສູ່ພະຍາດເອດສ໌ ທີ່ເຮັດໃຫ້ແຕ່ລະປີມີຜູ້ເສຍຊີວິດເປັນຈຳນວນຫລາຍ ໂດຍເມື່ອຮ່າງກາຍຕິດເຊື້ອ HIV ເຊື້ອດັ່ງກ່າວຈະໂຈມຕີລະບົບພູມຕ້ານທານຂອງຮ່າງກາຍ ເຮັດໃຫ້ລະບົບພູມຕ້ານທານຂອງຮ່າງກາຍອ່ອນແອລົງຈົນບໍ່ສາມາດຕໍ່ສູ້ກັບເຊື້ອພະຍາດທີ່ເຂົ້າສູ່ຮ່າງກາຍໄດ້ ແລະ ໃນທີ່ສຸດເຊື້ອໄວຣັສຈະໂຈມຕີຮ່າງກາຍທັງໝົດ.

ອ້າງອີງ:

https://www.channelnewsasia.com/…/hiv-vaccine-tests…

https://www.bumrungrad.com/…/hiv-aids-infection-treatment