ເຮັດຄວາມຮູ້ຈັກກັບ ຫລຸຍ ດີອາສ ວ່າທີ່ນັກເຕະໃຫມ່ຂອງລີເວີພູລ
ຫລຸຍ ດີອາສ ດາວເຕະທີມຊາດໂຄລອມເບຍ ທີ່ມີຂ່າວພວມຈະຍ້າຍມາຢູ່ກັບ ລີເວີພູລ ແລະ ກຽມກວດຮ່າງກາຍໃນທ້າຍອາທິດນີ້.
ລີເວີພູລ ພວມຈະໄດ້ ຫລຸຍ ດີອາສ ປີກຄົນເກ່ັງຂອງ ເອຟຊີ ປໍໂຕ ມາເຂົ້າຖິ່ນ ແອນຟິວ ຕັດຫນ້າ ທັອດແນມ ຮັອດເປີ ກ່ອນປິດຕະຫລາດຊື້ຂາຍນັກເຕະຫນ້າຫນາວໃນວັນຈັນທີ 31 ມັງກອນນີ້.
ລີເວີພູລ ຈະກວດຮ່າງກາຍ ດີອາສ ທີ່ປະເທດອາເຈນຕີນາ ໃນໄລຍະອາທິດນີ້ ຫລັງນັກເຕະເດີນທາງໄປຫລິ້ນໃຫ້ທີມຊາດໂຄລອມເບຍ ທີ່ອາເຈນຕີນາ ໃນການແຂ່ງຂັນບານເຕະໂລກ 2022 ຮອບຄັດເລືອກ ໂຊນອາເມລິກາໃຕ້.
ລາຍງານລະບຸວ່າ ລີເວີພູລ ຍື່ນຂໍ້ສະເຫນີ 50 ລ້ານປອນ ໃຫ້ ປໍໂຕ້ ໂດຍຈະເປັນການຈ່າຍຄ່າຕົວງວດທຳອິດ 37,5 ລ້ານປອນ ແລະ ໂບນັສຕາມເງື່ອນໄຂຕ່າງໆອີກ 12,5 ລ້ານປອນ.
ມື້ນີ້ເຮົາຈະໄປເຮັດຄວາມຮູ້ຈັກກັບປີກໂຄລອມເບຍ ໃຫ້ຫລາຍຂຶ້ນ ແລະ ເພາະເຫດຜົນຫຍັງ ລີເວີພູລ ຈຶ່ຢາກໄດ້ມາຮ່ວມທີມ.
- ເສັ້ນທາງການເປັນນັກເຕະ : ດີອາສ ເປັນຊົນເຜ່ົາວາຢູ ເຊິ່ງເປັນຊາວພື້ນເມືອງທີ່ມີຈຳນວນຫລາຍທີ່ສຸດໃນໂຄລອມເບຍ ໂດຍລາວເລີ່ມຕົ້ນເສັ້ນທາງນັກເຕະກັບສະໂມສອນ ບາຣັນເກີລລ່າ ເມື່ອປີ 2016.
ຈາກນັ້ນໃນປີ 2017 ກໍຍ້າຍໄປຢູ່ກັບ ອັດເລຕີໂກ ຈູເນຍ ກ່ອນທີ່ຈະຖືກຂາຍໄປໃຫ້ ເອຟຊີ ປໍໂຕ ໃນປີ 2019 ດ້ວຍຄ່າຕົວ 7 ລ້ານຢູໂຣ ແລະ ເຊັນສັນຍາຍາວ 5 ປີ.
- ຮູບແບບການຫລິ້ນ : ຕຳແຫນ່ງຖະຫນັດຂອງ ດີອາສ ຄືຫລິ້ນເປັນປີກຊ້າຍ ໂດຍມີຈຸດເດ່ັນຄວາມຄ່ອງແຄ່ວວ່ອງໄວ ແລະ ຍັງສາມາດຕັດເຂົ້າໃນໄປຍິງປະຕູໄດ້ດີນຳອີກ.
ນອກຈາກນັ້ນ ດີອາສ ຍັງມີພາລະກຳລັງທີ່ແຂງແກ່ນ ເຄື່ອນທີ່ດີ ແລະ ທັກສະໂດດເດ່ັນ ໂດຍຫລິ້ນໄດດີທັງສອງຕີນ ແຕ່ການຍິງປະຕູດ້ວຍຕີນຂວາຈະມີຄວາມອັນຕະລາຍຫລາຍກວ່າ.
- ເປັນຫຍັງລີເວີພູລ ຈຶ່ງຢາກໄດ້ : ລີເວີພູລ ໃຫ້ຄວາມສົນໃຈນັກເຕະອາຍຸ 25 ປີມາແຕ່ດົນ ແຕ່ພວກເຂົາຈັບຕາເບິ່ງຜົນງານມາໄດ້ 2-3 ລະດູການແລ້ວ ໂດຍທີ່ ເຈີເກັນ ຄລອບ ມັກໃນສີຕີນ ແລະ ດ້ວຍອາຍຸທີ່ຍັງບໍ່ຫລາຍ ເຮັດໃຫ້ຈະສາມາດໃຊ້ງານໄປໄດ້ອີກຫລາຍປີ.
ນັກເຕະໃນກອງຫນ້າທີ່ຄົງຕ້ອງຍາດຕຳແນຫ່ງໂດຍກົງກັບ ດີອາສ ຄື ຊາດີໂອ ມາເນ ປີກທີມຊາດ ເຊເນກັລ ທີ່ເຫລືອສັນຍາກັບລີເວີພູລ 18 ເດືອນ.
ດີອາສ ຍັງຈະເຂົ້າມາຊ່ວຍໃຫ້ກອງຫນ້າຂອງ ລີເວີພູລ ມີທາງເລືອກຫລາຍຂຶ້ນ ລວມທັງເປັນນັກເຕະທີ່ມີພອນສະຫວັນສູງ ແລະ ຍັງສາມາດພັດທະນາສັກກະຍາພາບໄດ້ອີກຫລວງຫລາຍ.
- ສາຍາ ໂຣນັລໂດ ແຫ່ງໂຄລອມເບຍ : ດີອາສ ສ້າງຜົນງານໂດດເດ່ັນ ຈົນໄດ້ຮັບຄຳຊື່ນຊົມຢ່າງຫລາຍເຖິງຂະຫນາດ ໄດ້ຮັບສາຍາ ຄຣິສຕຽນໂນ ໂຣນັລໂດ ແຫ່ງໂຄລອມເບຍ ເພາະມີຄວາມຕື່ນຕາຕື່ນໃຈ ແລະ ຍິງປະຕູໄດ້ສຽບຄົມນຳອີກ.
ດີອາສ ອາຍຸ 25 ປີ ສ້າງຜົນງານໄດ້ໂດດເດ່ັນໃຫ້ກັບທັງທີມຊາດໂຄລອມເບຍ ແລະ ປໍໂຕ້ ໂດຍສະເພາະລະດູການນີ້ ຍິງໄປແລ້ວ 16 ປະຕູ ຈາກການລົງສະຫນາມໃຫ້ຕົ້ນສັງກັດ 28 ນັດ ໃນທຸກລາຍການ ສ່ວນກັບທີມຊາດຫລິ້ນໄປແລ້ວ 31 ນັດ ເຮັດໄດ້ 7 ປະຕູ.
