ວັກຊີນເຂັມກະຕຸ້ນ ສາມາດປ້ອງກັນເຊື້ອໂຄວິດ-19 ສາຍພັນໂອມິຄຣອນ ໄດ້ແຕ່ 79-89%
ທ່ານ ດຣ ຣັດຕະນະໄຊ ເພັດສຸວັນ ຫົວໜ້າກົມຄວບຄຸມພະຍາດຕິດຕໍ່ກະຊວງສາທາລະນະສຸກ ກ່າວໃນ ວັນທີ 27 ມັງກອນນີ້ວ່າ: ປັດຈຸບັນ ທົ່ວໂລກເກີດການລະບາດໂຄວິດ-19 ສາຍພັນໂອມິຄຣອນ ເຊິ່ງການສັກວັກຊີນເຂັມກະຕຸ້ນ ຈຶ່ງສໍາຄັນ ເຖິງວ່າໄດ້ສັກວັກຊີນຄົບທຸກເຂັມທີ່ແນະນຳມາແລ້ວບໍ່ວ່າຈະຊະນິດໃດກໍຕາມ ເມື່ອຜ່ານໄປ 3 ເດືອນ ພູມຄຸ້ມກັນກໍຈະຫລຸດລົງ. ດັ່ງນັ້ນຈໍາເປັນຈະຕ້ອງໄປສັກວັກຊີນເຂັມກະຕຸ້ນ ເພາະສາມາດປ້ອງກັນການຕິດເຊື້ອພະຍາດໂຄວິດ-19 ຈາກການການລະບາດຂອງສາຍພັນນີ້ໄດ້ແຕ່ 79-89%. ຂະນະທີ່ມາຮອດວັນທີ 27 ມັງກອນ, ພວກເຮົາ ສັກວັກຊີນ ເຂັມ 1 ໄດ້ 4.710.344 ຄົນ ກວມ 64,19%) ແລະ ທຸກເຂັມທີ່ແນະນໍາ 4.021.325 ຄົນ ກວມ 54,8%).
ທ່ານ ດຣ ຣັດຕະນະໄຊ ບອກອີກວ່າ: ສໍາລັບຈຸດບໍລິການສັກວັກຊີນຢູ່ນະຄອນຫລວງວຽງຈັນ ປະກອບມີ ໂຮງໝໍສູນກາງ (ມິດຕະພາບ, ມະໂຫສົດ, ເສດຖາທິລາດ, ໂຮງໝໍສູນກາງ 103 ກອງທັບ, ໂຮງໝໍ 5 ເມສາ, ໂຮງໝໍແມ່ ແລະ ເດັກເກີດໃໝ່ ແລະ ໂຮງໝໍເດັກ. ສ່ວນຜູ້ທີ່ຕ້ອງການສັກວັກຊີນ Pfizer ເຂັມກະຕຸ້ນ (ເຂັມ 3)ນັ້ນ, ຜູ້ອາຍຸສູງ, ກຸ່ມອາຍຸ 12-17 ປີ ແລະ ຜູ້ມີພະຍາດປະຈໍາໂຕ ສາມາດໄປສັກໄດ້ຢູ່ວັດຈີນ ດົງປ່າແຫລບ ແຕ່ວັນຈັນ-ສຸກ, ສູນການຄ້າລາວ-ໄອເຕັກ ແຕ່ວັນຈັນ-ສຸກ, ໂຮງໝໍສູນກາງ, ໂຮງໝໍເມືອງ 9 ເມືອງ ແລະ ຈຸດບໍລິການວັກຊິນຢູ່ບັນດາແຂວງ ມີ ໂຮງໝໍແຂວງ, ໂຮງໝໍເມືອງ ແລະ ຈຸດທີ່ຄະນະສະເພາະກິດກໍານົດໄວ້.
