ຈັບໄດ້ແລ້ວຜູ້ຂັບລົດບັນທຸກຕຳຄົນເສຍຊີວິດ

ແຫລ່ງຂ່າວຄວາມສະຫງົບລາຍງານວ່າ: ວັນທີ 27 ມັງກອນ 2022, ທ່ານ ພັທ ວິລະພົງ ສະເໜ່ຫາ ຫົວໜ້າພະແນກຕຳຫລວດຈະລາຈອນ ປກສ ນະຄອນຫລວງວຽງຈັນ ໄດ້ຖະແຫລງຂ່າວການຈັບຄົນຂັບລົດບັນທຸກຕຳຄົນຍ່າງເສຍຊີວິດໃນເວລາປະມານ 21 ໂມງຂອງວັນທີ 13 ມັງກອນ 2022 ຢູ່ເສັ້ນທາງບ້ານໄຮ ຄໍາ ຫາ 4 ແຍກ ບ້ານດຸງ ເມືອງໄຊເຊດຖາ ວ່າ: ໃນເວລາເກີດເຫດ ມີລົດບັນທຸກບໍ່ຊາບຍີ່ຫໍ້ ແລະ ປ້າຍທະບຽນ ແລ່ນມາແຕ່ທາງບ້ານໄຮຄໍາ ມຸ່ງໜ້າໄປທາງ 4 ແຍກໄຟແດງບ້ານດຸງ ແລະ ພໍມາຮອດເຂດບ້ານດຸງ ກໍໄດ້ຕໍາຄົນຍ່າງຢູ່ແຄມທາງຈົນເສຍຊີວິດຄາທີ ຊຶ່ງຜູ້ເສຍຊີວິດຊື່ທ້າວ ສົງກາ ວົງສຸວັນ ( ເອ ) ອາຍຸ 55 ປີ, ສັນຊາດລາວ ອາຊີບກໍາມະກອນ ຢູ່ບ້ານໜອງແປນເມືອງຫາດຊາຍຟອງ ນະຄອນຫລວງວຽງຈັນ ໂດຍຜູ້ກ່ຽວໄດ້ຍ່າງສວນທາງກັບທິດທາງຂອງລົດບັນທຸກ. ຫລັງເກີດອຸບັດຕິເຫດແລ້ວຄົນຂັບລົດບັນທຸກຄັນດັ່ງກ່າວໄດ້ຂີ່ຫລົບໜີໄປທາງ 4 ແຍກໄຟແດງບ້ານດຸງ.

ຜ່ານການລົງສືບສວນ-ສອບສວນ ລວມທັງການເກັບກໍາຂໍ້ມູນພະຍານຫລັກຖານ ແລະ ຕິດຕາມໄລ່ລຽງເວລາ ຈາກກ້ອງວົງຈອນປິດຕາມເຮືອນຂອງປະຊາຊົນ ແລະ ສະຖານີ 1191 ຈຶ່ງສາມາດນໍາຈັບຜູ້ຂັບພ້ອມດ້ວຍລົດບັນທຸກຄັນທີ່ກໍ່ເຫດໄດ້ໃນວັນທີ 19 ມັງກອນ 2022 ຊຶ່ງຜູ້ຂັບລົດຊື່ທ້າວ ຈັນສະໝອນ ອາ ຍຸ 33 ປີ ສັນຊາດລາວ ອາຊີບຂັບລົດ ປັດຈຸບັນຢູ່ບ້ານທົ່ງພານທອງ ເມືອງສີສັດຕະນາກ ນະຄອນຫລວງວຽງຈັນ ພ້ອມດ້ວຍລົດບັນທຸກໝາຍເລກທະບຽນ ບຂ 7949 ຄັນມາດໍາເນີນຄະດີຕາມລະບຽບກົດໝາຍ.