ນາຍົກລັດຖະມົນຕີອັງກິດຢືນຢັນບໍ່ລາອອກ ເຖິງວ່າມີຂ່າວຈັດປາຕີ້ຊ່ວງລັອກດາວ ເຜີຍຕົນຕັດສິນໃຈເລື່ອງໃຫຍ່ໄດ້ຖືກຕ້ອງ

ນາຍົກລັດຖະມົນຕີອັງກິດຍັງຖືກໂຈມຕີຢ່າງໜັກໃນບັນຫາລະເມີດລັອກດາວ ໂດຍທ່ານໄດ້ໂຕ້ກັບຍັງໃຫ້ຄວາມເຫັນບໍ່ໄດ້ ແລະ ຢືນຢັນວ່າຈະບໍ່ລາອອກຈາກຕຳແໜ່ງ.

ວັນທີ 26 ມັງກອນ 2022, ສຳນັກຂ່າວບີບີຊີ (BBC) ລາຍງານວ່າ: ນາຍົກລັດຖະມົນຕີ ບໍຣິສ ຈອນສັນ ຂອງອັງກິດ ຢືນຢັນໃນສະພາວ່າທ່ານຈະບໍ່ລາອອກ ຫລັງຈາກສື່ໄດ້ເປີດເຜີຍພຶດຕິກຳການລະເມີດມາດຕະການຄວບຄຸມການລະບາດຂອງໂຄວິດ-19 ຂອງທ່ານ ດ້ວຍການປ່ອຍໃຫ້ມີການລວມຕົວກັນຂອງຄົນເກີນກວ່າກົດໝາຍກຳນົດອອກມາຢ່າງຕໍ່ເນື່ອງ.

ໃນກອງປະຊຸມສະພາຜູ້ແທນລາຊະດອນ ເຄຍ ສຕາເມີ ຜູ້ນຳຝ່າຍຄ້ານ ໄດ້ລຸກຂຶ້ນຖາມນາຍົກລັດຖະມົນຕີ ຈອນສັນ ວ່າ: ຕາມລະບຽບປະຕິບັດແລ້ວ ຜູ້ທີ່ຮູ້ຕົວວ່າໄດ້ກະທຳການຊີ້ນຳສະພາໄປໃນທາງທີ່ຜິດ ຈະໄດ້ຮັບການຄາດໝາຍໃຫ້ຍື່ນລາອອກຈາກຕຳແໜ່ງ, ນາຍົກລັດຖະມົນຕີ ຈອນສັນ ຄິດວ່າຕົນຕ້ອງເຮັດຕາມລະບຽບນີ້ ຫລື ບໍ່.

ນາຍົກລັດຖະມົນຕີ ຈອນສັນ ລຸກຂຶ້ນຕອບວ່າ: ແນ່ນອນ ແຕ່ທ່ານຄິດວ່າທ່ານ ສຕາເມີ ກຳລັງນຳໄປສູ່ຄຳຖາມທີ່ກ່ຽວຂ້ອງກັບບັນຫາທີ່ຢູ່ລະຫວ່າງການສອບສວນ ທ່ານຈຶ່ງບໍ່ສາມາດໃຫ້ຄວາມເຫັນໃນສ່ວນນີ້ໄດ້. ປັດຈຸບັນທ່ານກຳລັງເລັ່ງໃສ່ການຟື້ນຟູເສດຖະກິດ ໂດຍອັງກິດເປັນປະເທດທີ່ມີອັດຕາການຟື້ນຟູເສດຖະກິດໄວທີ່ສຸດໃນກຸ່ມປະເທດເອີຣົບ ລວມທັງມີອັດຕາການສັກວັກຊີນເຂັມກະຕຸ້ນໄວທີ່ສຸດ ແລະ ຜ່ານມາລັດຖະບານໄດ້ຕັດສິນໃຈເລື່ອງໃຫຍ່ໆໄດ້ຢ່າງຖືກຕ້ອງມາໂດຍຕະຫລອດ.

ສຳລັບເລື່ອງທີ່ກຳລັງຢູ່ໃນລະຫວ່າງການສອບສວນນັ້ນ ເປັນກໍລະນີຂອງການທີ່ນາຍົກລັດຖະມົນຕີຖືກກ່າວຫາວ່າລະເມີດມາດຕະການຄວບຄຸມໂຄວິດ ດ້ວຍການເຂົ້າຮ່ວມປາຕີ້ທີ່ມີການດື່ມແອລກໍຮໍ ໃນເດືອນພຶດສະພາປີ 2020 ເຊິ່ງເປັນຊ່ວງຂອງການລັອກດາວທົ່ວປະເທດ.

ກ່ອນໜ້ານີ້, ນາຍົກລັດຖະມົນຕີ ຈອນສັນ ຊີ້ແຈງບັນຫາດັ່ງກ່າວໃນສະພາວ່າ: ທ່ານຄິດວ່າງານລ້ຽງດັ່ງກ່າວເປັນການລົມວຽກ ຈຶ່ງໄດ້ເຂົ້າຮ່ວມ ແລະ ບໍ່ຮູ້ຕົວວ່າເປັນງານປາຕີ້ ພ້ອມທັງກ່າວຂໍໂທດຕໍ່ປະຊາຊົນທີ່ເກີດເຫດການແບບນັ້ນຂຶ້ນ.

ແຕ່ຈາກນັ້ນບໍ່ດົນ ໄດ້ມີການເປີດເຜີຍຫລັກຖານເພີ່ມຕື່ມວ່າ: ນາຍົກລັດຖະມົນຕີ ຈອນສັນ ໄດ້ມີການລະເມີດກົດຊ່ວງລັອກດາວອີກ ຈາກການປ່ອຍໃຫ້ມີການລວມຕົວກັນຂອງທີມງານປະມານ 30 ຄົນ ເພື່ອເປົ່າເຄັກອວຍພອນວັນເກີດ ຂະນະທີ່ກົດໝາຍບໍ່ອະນຸຍາດໃຫ້ລວມຕົວກັນພາຍໃນອາຄານເກີນ 2 ຄົນ.

ຫລ້າສຸດ, ບັນຫາເຫລົ່ານັ້ນໄດ້ຖືກຍົກຂຶ້ນມາເປັນບັນຫາໃນສະພາອີກ ໂດຍຜູ້ນຳຝ່າຍຄ້ານໄດ້ຕັ້ງຄຳຖາມໂດຍກົງເຖິງນາຍົກລັດຖະມົນຕີວ່າ: ຈະລາອອກ ຫລື ບໍ່.

ເຊິ່ງນາຍົກລັດຖະມົນຕີ ຈອນສັນ ຕອບກັບທັນທີວ່າ: ບໍ່.

ອ້າງອີງ:

https://www.bbc.com/news/live/uk-politics-60134104

https://news.sky.com/…/downing-street-parties-boris…