Pfizer ເດີນໜ້າທົດລອງວັກຊີນປ້ອງກັນໂຄວິດ ທີ່ຈະໃຊ້ຮັບມືເຊື້ອໂອມິຄຣອນ ໂດຍສະເພາະແລ້ວ
ວັນທີ 26 ມັງກອນ 2022, ທີມຜູ້ຜະລິດ ແລະ ພັດທະນາວັກຊີນປ້ອງກັນໂຄວິດຂອງ Pfizer ແລະ ພັນທະມິດ BioNTech ເດີນໜ້າທົດລອງວັກຊີນປ້ອງກັນໂຄວິດທີ່ຈະໃຊ້ຮັບມືເຊື້ອໄວຣັສໂຄໂຣນາກາຍພັນສາຍພັນໂອມິຄຣອນແລ້ວ ເພື່ອຍົກລະດັບການປ້ອງກັນການຕິດເຊື້ອໃຫ້ສູງຂຶ້ນໄປອີກ.
ແຄທຣີນ ແຈນເຊນ ຫົວໜ້າທີມວິໄຈ ແລະ ພັດທະນາຂອງ Pfizer ລະບຸວ່າ: ການກຽມພ້ອມ ແລະ ລະວັງຢູ່ສະເໝີເລື່ອງໄວຣັສ ຈະຊ່ວຍໃຫ້ເຮົາສາມາດຄົ້ນຫາແນວທາງ ຫລື ເຄື່ອງມືໃໝ່ໆ ເພື່ອໃຫ້ທຸກຄົນຍັງຮັກສາລະດັບປະສິດທິພາບຂອງເກາະປ້ອງກັນຂອງຕົນໃຫ້ຢູ່ໃນລະດັບສູງໄດ້.
ໂດຍຈະທົດລອງວັກຊີນດັ່ງກ່າວກັບກຸ່ມຕົວຢ່າງ 1.420 ກວ່າຄົນ ເຊິ່ງຈະແບ່ງອອກເປັນ 3 ກຸ່ມ ບໍ່ວ່າຈະເປັນກຸ່ມທີ່ເຄີຍຮັບວັກຊີນ Pfizer ມາແລ້ວ 2 ເຂັມ, ກຸ່ມທີ່ເຄີຍຮັບວັກຊີນ Pfizer ມາແລ້ວ 3 ເຂັມ ແລະ ກຸ່ມທີ່ຍັງບໍ່ເຄີຍມີປະຫວັດຮັບວັກຊີນເລີຍ ໂດຍແຕ່ລະກຸ່ມຈະໄດ້ຮັບວັກຊີນປ້ອງກັນໂຄວິດຕ້ານເຊື້ອໂອມິຄຣອນໃນຈຳນວນທີ່ແຕກຕ່າງກັນ.
ເຖິງຢ່າງໃດກໍຕາມ, ເຖິງວ່າວັກຊີນສູດປັດຈຸບັນຈະບໍ່ສາມາດປ້ອງກັນການຕິດເຊື້ອໂອມິຄຣອນໄດ້, ແຕ່ມີສ່ວນສຳຄັນຊ່ວຍຫລຸດຄວາມສ່ຽງຈະເຂົ້າຮັບການປິ່ນປົວໃນໂຮງໝໍ ແລະ ໂອກາດຈະເສຍຊີວິດພາຍຫລັງການຕິດເຊື້ອໄດ້. ໃນໄລຍະເວລາທີ່ວັກຊີນນີ້ຍັງບໍ່ສຳເລັດສົມບູນ ທາງການແຕ່ລະປະເທດ ໂດຍສະເພາະອາເມລິກາ ຈຶ່ງເລັ່ງເດີນໜ້າສັກວັກຊີນເຂັມກະຕຸ້ນໃຫ້ບັນດາກຸ່ມສ່ຽງ ແລະ ຜູ້ມີອາຍຸນັບແຕ່ 12 ປີຂຶ້ນໄປ ເພື່ອຮັບມືການແພ່ລະບາດທີ່ມີຜູ້ຕິດເຊື້ອໃໝ່ເພີ່ມສູງຂຶ້ນຢ່າງຕໍ່ເນື່ອງ.
ນອກຈາກ Pfizer ແລ້ວ Moderna ກໍກຳລັງພັດທະນາວັກຊີນໃນລັກສະນະດຽວກັນ ເພື່ອຮັບມືການແພ່ລະບາດຂອງເຊື້ອໂອມິຄຣອນເຊັ່ນກັນ. ຂະນະທີ່ນັກວິທະຍາສາດຈຳນວນບໍ່ໜ້ອຍຍັງເຫັນພ້ອມຕໍ່ການໃຊ້ວັກຊີນທີ່ສາມາດໃຊ້ຮັບມືເຊື້ອໄວຣັສໂຄໂຣນາໄດ້ທຸກສາຍພັນຫລາຍກວ່າວັກຊີນທີ່ສະເພາະຕໍ່ເຊື້ອກາຍພັນບາງຊະນິດ ເພາະນັ້ນອາດໝາຍເຖິງວິທີການຈັດເກັບທີ່ອາດສັບຊ້ອນຂຶ້ນ ຍາກຕໍ່ການເຂົ້າເຖິງ ຫລື ກະຈາຍໃຫ້ຢ່າງເທົ່າທຽມ ໂດຍສະເພາະໃນກຸ່ມບັນດາປະເທດລາຍໄດ້ໜ້ອຍ.
ອ້າງອີງ:
- https://www.reuters.com/business/healthcare-pharmaceuticals/pfizer-biontech-launch-trial-omicron-targeted-covid-vaccine-2022-01-25/
- https://www.bbc.com/news/health-60131986
- https://www.cnet.com/health/medical/pfizer-is-testing-a-new-covid-vaccine-specifically-for-omicron/
