ລັດຖະບານ ວາງຄາດໝາຍການຜະລິດໄຟຟ້າໃຫ້ໄດ້ ອັນດັບ 2 ຮອງຈາກຂົນສົ່ງ
ມະຕິກອງປະຊຸມສະພາແຫ່ງຊາດ ວ່າດ້ວຍການຮັບຮອງເອົາບົດລາຍງານຂອງລັດຖະບານ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ ໄລຍະ 9 ເດືອນ, ຄາດຄະເນໝົດປີ 2021 ແລະ ທິດທາງແຜນການ ປະຈຳປີ 2022 ໄດ້ຮັບຮອງຄາດໝາຍຂະແໜງເສດຖະກິດ ປະຈຳປີ 2022 ຊຶ່ງມີຫຼາຍອັນໄດ້ວາງຄາດໝາຍໄວ້ໃຫ້ເພີ່ມຂຶ້ນຫຼາຍສ່ວນຮ້ອຍເມື່ອທຽບໃສ່ປີຜ່າມາ.
ໃນມະຕິດັ່ງກ່າວໃຫ້ຮູ້ວ່າ: ຄາດໝາຍຂະແໜງການເສດຖະກິດ ໃນການຜະລິດເຂົ້າເປືອກ ໂດຍລວມແມ່ນໃຫ້ໄດ້ 3,7 ລ້ານໂຕນ ເພີ່ມຂຶ້ນ 1,09% ຈາກປີ 2021;
ຜະລິດພືດສະບຽງອາຫານໃຫ້ໄດ້ 3,3 ລ້ານໂຕນ ເພີ່ມຂຶ້ນ 12,19% ຈາກປີ 2021;
ການຜະລິດຊີ້ນ, ໄຂ່ ແລະ ປາ ໃຫ້ໄດ້ 508.700 ໂຕນ ເພີ່ມຂຶ້ນ 4,67% ຈາກປີ 2021;
ມູນຄ່າການສົ່ງອອກຜະລິດຕະພັນດ້ານກະສິກໍາ ໃຫ້ໄດ້ໃນລະດັບ 1.200 ລ້ານໂດລາ,
ໃນນັ້ນ: ດ້ານການປູກຝັງ 1.100 ລ້ານໂດລາ ແລະ ດ້ານລ້ຽງສັດ 100 ລ້ານໂດລາ; ການສ້າງມູນຄ່າການຜະລິດອຸດສາຫະກໍາປຸງແຕ່ງ ແລະ ຫັດຖະກໍາ ໃຫ້ບັນລຸ 13.007 ຕື້ກີບ ເພີ່ມຂຶ້ນ 9,49% ຈາກປີ 2021 ແລະ ສ້າງມູນຄ່າການຈໍລະຈອນສິນຄ້າ (ຂາຍຍົກ-ຂາຍຍ່ອຍ ແລະ ບໍລິການ) ໃຫ້ບັນລຸ 67.833 ຕື້ກີບ ເພີ່ມຂຶ້ນ 11,07% ຈາກປີ 2021.
ນອກນີ້, ຄາດໝາຍຂະແໜງການເສດຖະກິດ ໃນການຜະລິດກະແສໄຟຟ້າ ແມ່ນໃຫ້ໄດ້ 44.827 ລ້ານກິໂລວັດໂມງ ເປັນມູນຄ່າ 23.509 ຕື້ກີບ ເພີ່ມຂຶ້ນ 6,65%;
ໃນນັ້ນ, ສົ່ງອອກໄປຕ່າງປະເທດ 34.903 ລ້ານກິໂລວັດໂມງ ເປັນມູນຄ່າ 2.050 ລ້ານໂດລາ ເພີ່ມຂຶ້ນ 2,97% ແລະ ຈໍາໜ່າຍພາຍໃນປະເທດ 9.162,60 ລ້ານກິໂລວັດໂມງ ເປັນມູນຄ່າ 774 ລ້ານໂດລາ, ຫຼຸດລົງ 0,1%. ສໍາລັບມູນຄ່າການຜະລິດແຮ່ທາດ ໃຫ້ໄດ້ 16.741 ຕື້ກີບ ເພີ່ມຂຶ້ນ 5,36%, ໃນນັ້ນ ມູນຄ່າການຈໍາໜ່າຍແຮ່ທາດໄປຕ່າງປະເທດ ໃຫ້ໄດ້ 1.546 ລ້ານໂດລາ ຫຼຸດລົງ 2% ແລະ ມູນຄ່າການຈໍາໜ່າຍແຮ່ທາດພາຍໃນປະເທດ ໃຫ້ໄດ້ 350 ລ້ານໂດລາ ເພີ່ມຂຶ້ນ 0,5%.
ສ່ວນຄາດໝາຍຂະແໜງການເສດຖະກິດ ໃນການບໍລິການຂົນສົ່ງສິນຄ້າ ແມ່ນໃຫ້ໄດ້ 5.558.000 ໂຕນ ເພີ່ມ 7% ແລະ ຂົນສົ່ງໂດຍສານໃຫ້ໄດ້ 68.779.000 ເທື່ອຄົນ ເພີ່ມຂຶ້ນ 7%.
