ນິວຄາສເຊິລ ຢືນຢັນຄວ້າ ດາວຮຸ່ງລີຢົງ ປາດຫນ້າ ອາເຊນອລ

ນິວຄາສເຊິລ ຢູໄນເຕັດ ສະໂມສອນໃນພຣີເມຍລີກອັງກິດ ບັນລຸຂໍ້ຕົກລົງກັບ ໂອລິມປິກ ລີຢົງ ທີມດັງໃນ ລີກ ເອິງ ຝຣັ່ງ ໃນການຄວ້າ ບຣູໂນ ກິມາໄຣ ກອງກາງທີມຊາດບຣາຊິລ ມາເຂົ້າຖິ່ນ ເຊນ ເຈມ ພາກ ເປັນທີ່ຮຽບຮ້ອຍແລ້ວ ເມື່ອວັນພຸດທີ 26 ມັງກອນຜ່ານມາ.

ຟາບຣີຊີໂອ ໂຣມາໂນ ນັກຂ່າວຄົນດັງ ລາຍງານວ່າ ລີຢົງ ຕອບຮັບຄ່າຕົວ 40 ລ້ານຢູໂຣ ຈາກ ນິວຄາສເຊິລ ແລະ ກິມາໄຣ ທີ່ເວລານີ້ຢູ່ ເອກວາດໍ ຈະເຂົ້າຮັບການກວດຮ່າງກາຍເມື່ອເດີນທາງກັບມາເຖິງ ບຣາຊິລ.

ຂະນະທີ່ ລີຢົງ ຈະຕ້ອງແບ່ງເງິນໃຫ້ ອັດເລຕີໂກ ປາຣາເນນເຊ ຈຳນວນ 20% ຫລັງຊື້ ກິມາໄຣ ອາຍຸ 24 ປີ ມາໃນລາຄາ 20 ລ້ານຢູໂຣ ເມື່ອເດືອນມັງກອນ ປີ 2020.

ກ່ອນຫນ້ານີ້ ກິມາໄຣ ໄດ້ຮັບຄວາມສົນໃຈຈາກຫລາຍສະໂມສອນໃນຢູຣົບ ໂດຍສະເພາະ ອາເຊນອລ ທີ່ຢາກໄດ້ມາໄລຍະຫນຶ່ງ ຫລັງສ້າງຜົນງານໂດດເດັ່ນໃຫ້ກັບຕົ້ນສັງກັດ ຈົນຕິດທີມຊາດບຣາຊິລ ໄປແລ້ວ 3 ນັດ ແລະ ຢູ່ໃນຊຸດຫລ້າສຸດທີ່ຈະລົງຫລິ້ນເກມຄັດບານໂລກ.

ຈາກການຍ້າຍໄປຢູ່ກັບ ນິວຄາສເຊິລ ຂອງ ກິມາໄຣ ໃນຄັ້ງນີ້ ສົ່ງຜົນໃຫ້ ອາເຊນອລ ພາດຫວັງເປົ້າຫມາຍໄປແລ້ວ 2 ຄົນ ໃນຮອບ 2 ມື້ ຫລັງຈາກ ວັນອັງຄານກໍຫາກໍຖືກ ຢູເວນຕຸສ ປາດຫນ້າຄວ້າ ດູຊານ ວະລາໂຮວິດ ດາວຍິງ ຟີອໍເຣນຕີນາ ໄປຮ່ວມທີມ.