ປີ 2021 ແຂວງເຊກອງ ມີຫລາຍບັນຫາທີ່ຕ້ອງເອົາໃຈໃສ່ແກ້ໄຂ
ປີ 2021 ຜ່ານມາ ເຖິງວ່າແຂວງເຊກອງປະສົບຜົນສຳເລັດການພັດທະນາເສດຖະກິດ-ສັງຄົມໂດຍສະເພາະການບັນລຸລາຍຮັບງົບບປະມານລື່ນແຜນກວ່າ 28% ແລະ ອື່ນໆແຕ່ຍັງມີຫລາຍບັນຫາທີ່ຕ້ອງໄດ້ສຸມໃສ່ແກ້ໄຂ ຊຶ່ງເຈົ້າແຂວງເຊກອງ ໄດ້ເນັ້ນໃຫ້ຂະແໜງການແຜນການ-ການລົງທຶນ ແລະ ຂະແໜງກາເງິນ ຕ້ອງໄດ້ເອົາໃຈໃສ່ຢ່າງເອົາການເອົາງານ.
ທ່ານ ເຫລັກໄຫລ ສີວິໄລ ເຈົ້າແຂວງໆເຊກອງ ເນັ້ນວ່າ: ຈຸດທຳອິດທີ່ເປັນບັນຫາຕັດສິນຄຸນນະພາບ,ປະສິດທິພາບ ແລະ ປະສິດທິຜົນຂອງວຽກງານນັ້ນ, ຄະນະພັກ, ຄະນະນຳແຕ່ລະຂັ້ນຕ້ອງໄດ້ສຸມໃສ່ສຶກສາອົບຮົມການເມືອງ ນຳພາແນວຄິດພະນັກງານ-ລັດຖະກອນໃຫ້ເລິກເຊິ່ງເຖິງຖອງຕິດພັນກັບການຄົ້ນ ຄວ້າເຊື່ອມຊຶມ ກຳແໜ້ນບັນດາເນື້ອໃນມະຕິ ຄຳສັ່ງ, ກົດໝາຍ, ດຳລັດ, ຄຳແນະນໍາ ແລະ ນິຕິກຳຕ່າງໆຂອງສູນກາງພັກ, ລັດຖະບານ ແລະ ແຂວງວາງອອກ. ຂະນະດຽວກັນກໍໃຫ້ຮີບຮ້ອນປັບປຸງແບບແຜນວິທີເຮັດວຽກ, ຄວາມພ້ອມຂອງບຸກຄະລະກອນ, ກົງຈັກການຈັດຕັ້ງໃຫ້ເປັນລະບົບເຂັ້ມແຂງ ພ້ອມຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ,ແຜນງົບປະມານແຫ່ງລັດປີ 2022 ກໍຄືການຈັດຕັ້ງປະຕິບັດວາລະແຫ່ງຊາດວ່າດ້ວຍການແກ້ໄຂບັນຫາຄວາມຫຍຸ້ງຍາກດ້ານເສດຖະກິດ-ການເງິນໃຫ້ເປັນຮູບປະທຳ.
ສຳລັບການຄຸ້ມຄອງການລົງທຶນຂອງລັດທັງທຶນພັດທະນາຊົນນະບົດ ແລະ ແກ້ໄຂຄວາມທຸກຍາກ, ຂະແໜງການກ່ຽວຂ້ອງ ແລະ ເມືອງຕ້ອງກວດກາຄືນຄວາມຄືບໜ້າຂອງໜ້າວຽກ, ການຊຳລະຜ່ານມາ, ສ່ວນໂຄງການ ໃໝ່ທີ່ໄດ້ຮັບອະນຸມັດຕ້ອງຮີບຮ້ອນຈັດຕັ້ງປະຕິບັດຕາມກົນໄກລະບຽບການທີ່ກຳນົດໄວ້ຢ່າງເຂັ້ມງວດ. ຂະ ນະທີ່ທຶນຊ່ວຍເຫລືອທາງການເພື່ອການພັດທະນາ (ODA) ໃຫ້ເອົາໃຈໃສ່ຕິດຕາມ, ກວດກາການຈັດຕັ້ງປະຕິບັດພັນທະສັນຍາທີ່ລັດຖະບານໄດ້ໃຫ້ຄໍາໝັ້ນສັນຍາກັບຄູ່ຮ່ວມພັດທະນາ, ຈັດຕັ້ງປະຕິບັດໃຫ້ໄປຕາມກົດໝາຍ ແລະລະບຽບການກຳນົດ; ການລະດົມການລົງທຶນຂອງເອກະຊົນພາຍໃນ ແລະ ຕ່າງປະເທດ (FDI) ຕ້ອງເພີ່ມທະວີການໂຄສະນາເຜີຍແຜ່ກົດໝາຍ ແລະ ລະບຽບການ ໂດຍສະເພາະນະໂຍບາຍທີ່ລັດຖະບານວາງອອກແຕ່ລະໄລຍະ ເພື່ອສ້າງຄວາມເຊື່ອໝັ້ນໃຫ້ແກ່ນັກລົງທຶນພາຍໃນ ແລະຕ່າງປະເທດ ໄປພ້ອມກັບການປັບປຸງ, ແກ້ໄຂບັນຫາຄົງຄ້າງຜ່ານມາໃຫ້ຄືບໜ້າ ແລະ ປາກົດຜົນເປັນຈິງໃນປີນີ້.
ການພັດທະນາຊົນນະບົດ ແລະ ແກ້ໄຂຄວາມທຸກຍາກຕ້ອງສູ້ຊົນແກ້ໄຂຄວາມທຸກຍາກໃຫ້ຫລຸດລົງ 945 ຄອບ ຄົວ ໂດຍເລັ່ງຫັນພະນັກງານຫລັກແຫລ່ງ, ພະນັກງງານວິຊາການຂອງແຂວງ ແລະ ເມືອງລົງສູ່ຮາກຖານ ແລະ ຊ່ວຍເຫລືອປະຊາຊົນຜະລິດ, ພັດທະນາອາຊີບທີ່ໝັ້ນຄົງຕິດພັນກັບການສ້າງພະນັກງານສືບທອດປ່ຽນແທນໃນອະນາຄົດ.
ເຈົ້າແຂວງເຊກອງ ເນັ້ນອີກວ່າ: ເຖິງວ່າຈະພົບຫລາຍບັນຫາໃນປັດຈຸບັນ, ແຕ່ຕ້ອງໄດ້ເອົາໃຈໃສ່ຈັດຕັ້ງປະຕິບັດແຜນງົບປະມານແຫ່ງລັດປີ 2022 ໃຫ້ແຂງແຮງກ່ວາເກົ່າຕາມແຜນທີ່ສະພາແຫ່ງຊາດ ແລະສະພາປະຊາຊົນແຂວງຮັບຮອງເອົາໂດຍສະເພາະການຈັດເກັບລາຍຮັບໃຫ້ບັນລຸຕາມແຜນການວາງໄວ້, ບັນດາພະແນກການທີ່ໄດ້ຮັບມອບໝາຍຈັດເກັບລາຍຮັບຕ້ອງປະຕິບັດຢ່າງຄົບຖ້ວນ ແລະ ສຸມໃສ່ປະຕິບັດວາລະແຫ່ງຊາດວ່າດ້ວຍການຈັດຕັ້ງປະຕິບັດມາດຕະການການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ໃຫ້ປະສົບຜົນສຳເລັດ.
