ຈັບດຳເນີນຄະດີແລ້ວ ບຸກຄົນແອບອ້າງເປັນເຈົ້າໜ້າທີ່ທະຫານຮັບແລ່ນເອົາຄົນເຂົ້າເຮັດວຽກ

ອີງຕາມປ້ອງກັນຄວາມສະຫງົບນະຄອນຫລວງວຽງຈັນລາຍງານວ່າ: ພະແນກສືບສວນ-ສອບສວນ ຄະດີອາຍາ ຫ້ອງຕໍາຫລວດ ກອງບັນຊາການ ປກສ ນະຄອນຫລວງວຽງຈັນ ສົມທົບກັບກົມສຶບຂ່າວກະຊວງປ້ອງກັນປະເທດ ສົມທົບກັບພາກສ່ວນທີ່ກ່ຽວຂ້ອງສືບຄົ້ນຫາບຸກຄົນແອບອ້າງເປັນເຈົ້າໜ້າທີ່ທະຫານ ໃນທີ່ສຸດສາມາດກັກຕົວ ທ້າວ ຄໍາແພງ ຄົງຄະນິດ, ເຊິ່ງບຸກຄົນດັ່ງກ່າວ ຢູ່ບ້ານຄູນແກ້ວ ເມືອງຄູນຄຳ ແຂວງຄຳມ່ວນ ວັນທີ 31 ທັນວາ 2021, ພ້ອມຂອງກາງ ຊຸດເຄື່ອງແບບນາຍທະຫານ ແລະ ປືນສັ້ນ CZ 1 ກະບອກ ພ້ອມລູກປືນ 125 ລູກ ຈາກນັ້ນຈື່ງໄດ້ນໍາຕົວຂຶ້ນມາດໍາເນີນຄະດີຢູ່ ນະຄອນຫລວງວຽງຈັນ.

ຜ່ານການສອບສວນຂອງເຈົ້າໜ້າທີ່ສືບສວນ-ສອບສວນ ປກສ ນວ ໃຫ້ຮູ້ວ່າ: ທ້າວ ຄຳແພງ ຄົງຄະນິດ ປັດຈຸບັນພັກເຊົາ ຢູ່ບ້ານດອນແດງ ເມືອງຈັນທະບູລີ ນະຄອນຫລວງວຽງຈັນ ແລະ ຜູ້ກ່ຽວຍັງຮັບສາລະພາບວ່າ: ຕົນເອງໄດ້ແອບອ້າງເປັນເຈົ້າໜ້າທີ່ທະຫານ ດ້ວຍວິທີການນຸ່ງຊຸດເຄື່ອງແບບນາຍທະຫານ ແຕ່ຕົ້ນປີ 2021 ເປັນຕົ້ນມາ, ໂດຍຕິດຊັ້ນ ນາຍພັນຕີ ແລະ ຍັງໄດ້ປ່ຽນນາມສະກຸນ ເພື່ອໃຊ້ແອບອ້າງໃຫ້ຄົນຫລົງເຊື່ອ ຫາຜົນປະໂຫຍດໃຫ້ຕົນເອງ ໂດຍໃຊ້ເລ່ລ່ຽມຕົວະຍົວະຫລອກລວງ ວ່າຕົນເອງເປັນທະຫານທີ່ມີຄວາມສາມາດແລ່ນເອົາຄົນເຂົ້າເປັນທະຫານໄດ້ ເຮັດໃຫ້ມີຜູ້ຫລົງເຊື່ອ ຈຳນວນ 3 ຄົນ. ລວມມູນຄ່າຄວາມເສຍຫາຍຫລາຍກວ່າ 300.000.000 ກວ່າລ້ານກີບ, ປັດຈຸບັນຄະດີດັ່ງກ່າວກໍາລັງເລັ່ງສຶບສວນ-ສອບສວນ ຂະຫຍາຍຜົນຊອກຫາຜູ້ຮ່ວມຂະບວນການມາດຳເນີນຄະດີ ຕາມລະບຽບກົດ ໝາຍ.

ພ້ອມດຽວກັນນີ້, ກອງບັນຊາການ ປກສ ນວ ຂໍແຈ້ງມາຍັງປະຊາຊົນທຸກຊັ້ນຄົນໃນສັງຄົມ ຖ້າເຄີຍຖຶກ ທ້າວຄຳແພງ ຄົງຄະນິດ ຕົວະຍົວະຫລອກລວງໃຫ້ເຂົ້າມາແຈ້ງຄວາມເພີ່ມຕື່ມໄດ້ທີ່ ພະແນກສືບສວນ-ສອບສວນ ຫ້ອງຕຳຫລວດ ກອງບັນຊາການ ປກສ ນວ ຕາມໂມງລັດຖະການ.