ບູຮານວ່າໄວ້ ຄົນທີ່ເປັນເນື້ອຄູ່ກັນຈະມີຫລາຍກ່ວາ 10 ຂໍ້ນີ້
January 29, 2022 - 5:00 PM
- ຮູ້ສຶກສະບາຍໃຈທີ່ໄດ້ຢູ່ໃກ້ໆ : ເມື່ອໃດທີ່ຢູ່ນຳກັນຈະຮູ້ສຶກສະບາຍໃຈ ມີຄວາມສຸກ ບໍ່ຕ້ອງຄິດຫລາຍ ບໍ່ຮູ້ສຶກອຶດອັດ, ຄວາມເຄັ່ງຄຽດຕ່າງໆທີ່ພົບກໍຫາຍໄປ ພຽງແຕ່ໄດ້ໃຊ້ເວລາຢູ່ນຳກັນ ຕ່າງຝ່າຍຕ່າງໃຫ້ຄວາມຮູ້ສຶກສະບາຍໃຈຂອງກັນ ແລະກັນ.
- ແນມເຫັນອະນາຄົດຮ່ວມກັນ : ທ່ານສາມາດແນມເຫັນອະນາຄົດຮ່ວມກັນ ອະນາຄົດທີ່ມີກັນ ແລະ ກັນຢູ່ ເຊິ່ງຫລາຍເທື່ອທີ່ທ່ານທັງສອງວາງແຜນຮ່ວມກັນວ່າຈະແຕ່ງດອງເມື່ອໃດ, ຈະມີລູກຈັກຄົນ, ຈະໃຊ້ຊີວິດຄູ່ແນວໃດ ຖ້າທ່ານນຶກພາບອອກ ນັ້ນສະແດງວ່າທ່ານມີຈຸດມຸ່ງໝາຍໃນການໃຊ້ຊີວິດຄູ່ຮ່ວມກັນໃນອະນາຄົດ.
- ຮູ້ສຶກໄວ້ໃຈກັນ ແລະ ກັນ : ທ່ານຈະຮູ້ສຶກໄວ້ໃຈກັນ ແລະ ກັນ, ບໍ່ຮູ້ສຶກຫວາດລະແວງວ່າອີກຝ່າຍຈະລັກໄປມີໃຜເລີຍ, ຈະບໍ່ຮູ້ສຶກວ່າຕ້ອງນຳຫຶງຫວງ ຫລື ຕ້ອງຈອບເຊັກອີກຝ່າຍຕະຫລອດເວລາ ແຕ່ທ່ານຈະຮູ້ສຶກວາງໃຈໄວ້ໃຈ ແລະ ສະບາຍໃຈ.
- ຮູ້ສຶກໝັ້ນຄົງປອດໄພ : ເຖິງວ່າຈະພົບພໍ້ເລື່ອງລາວຫຍັງກໍຕາມ ຂໍພຽງແຕ່ມີກັນ ແລະ ກັນຢູ່ ທ່ານຈະຮູ້ສຶກວ່າເຂົາສາມາດປົກປ້ອງທ່ານໄດ້, ທ່າຈະຮູ້ສຶກປອດໄພສະເໝີ ເມື່ອຢູ່ກັບເຂົາ ຮູ້ສຶກວ່າເຂົາເປັນໜຶ່ງທີ່ເພິ່ງໃຫ້ທ່ານໄດ້.
- ຮູ້ສຶກເປັນໂຕຂອງໂຕເອງ : ທ່ານຮູ້ສຶກເປັນໂຕຂອງໂຕເອງໄດ້ຢ່າງເຕັມທີ່, ບໍ່ຮູ້ສຶກຕ້ອງຝືນຫຍັງທັງໝົດ, ທ່ານກ້າທີ່ຈະເປີດເຜີຍຂໍ້ເສຍຂອງທ່ານໃຫ້ອີກຝ່າຍຮັບຮູ້, ບໍ່ຕ້ອງເຮັດໂຕໃນແບບທີ່ອີກຝ່າຍມັກ ເພື່ອເອົາໃຈເຂົາ ທັງທ່ານ ແລະ ເຂົາກໍບໍ່ໄດ້ຮຽກຮ້ອງ ເພື່ອຄວາມເພິງພໍໃຈຂອງໃຜນຳອີກ.
- ກ້າທີ່ຈະບອກເຖິງບັນຫາຕ່າງໆໃຫ້ອີກຝ່າຍຟັງ : ທ່ານກ້າທີ່ຈະເລົ່າບັນຫາຕ່າງໆຂອງທ່ານໃຫ້ເຂົາຟັງ ໂດຍທີ່ທ່ານເຊື່ອວ່າເຂົາຈະບໍ່ລຳຄານສິ່ງທີ່ທ່ານເລົ່າ, ທ່ານເຊື່ອວ່າເຂົາຈະຮັບຟັງທ່ານຢູ່ສະເໝີ ແລະ ທ່ານຍິນດີທີ່ຈະຮັບຟັງເລື່ອງລາວຂອງເຂົາຄືກັນ.
- ທ່ານມີເປົ້າໝາຍໃນຊີວິດຄືກັນ : ທ່ານທັງສອງມີເປົ້າໝາຍໃນຊີວິດທີ່ຄືກັນ, ທ່ານຢາກໄດ້ຫຍັງທີ່ຄືກັນ ລວມເຖິງທັດສະນະຄະຕິການໃຊ້ຊີວິດຕ່າງໆທີ່ກົງກັນ, ມີຄຳນິຍາມຂອງຄຳວ່າປະສົບຄວາມສຳເລັດຄ້າຍໆກັນ.
- ຢູ່ຄຽງຂ້າງສະເໝີໃນໄລຍະເວລາທີ່ອ່ອນແອ : ທ່ານຈະຮູ້ສຶກໝັ້ນໃຈໄດ້ວ່າ ເຂົາຈະບໍ່ມີມື້ໄປໃສ ແມ່ນແຕ່ໃນມື້ທີ່ທ່ານຮູ້ສຶກອ່ອນແອ ຫລື ພົບເລື່ອງລາວບໍ່ດີໃນຊີວິດຫລາຍປານໃດ ທ່ານຈະມີເຂົາຄຽງຂ້າງຄອຍເປັນກຳລັງໃຈຢູ່ສະເໝີ.
- ຮູ້ສຶກຂອບໃຈ : ທ່ານຈະຮູ້ສຶກຂອບໃຈອີກຝ່າຍຫລາຍໆທີ່ຊ່ວຍເຂົ້າມາຕື່ມເຕັມໃຫ້ຊີວິດຂອງກັນ ແລະ ກັນ ເພາະທ່ານນຶກບໍ່ອອກເລີຍວ່າຖ້າບໍ່ມີເຂົາ ຊີວິດທ່ານຈະເປັນແນວໃດ ຈະມີຄວາມສຸກແບບນີ້ຫລືບໍ່.
- ເຄົາລົບເຊິ່ງກັນ ແລະ ກັນ : ທ່ານຈະເຄົາລົບກັນ ບໍ່ກ້າວກ່າຍ ຫລື ເຂົ້າໄປຫຍຸ້ງ ແລະ ເຂົາຕ່າງກໍເຄົາລົບສະມາຊິກໃນຄອບຄົວຂອງກັນ, ໃຫ້ກຽດພໍ່ແມ່ ແລະ ສະມາຊິກໃນຄອບຄົວຄົນອື່ນໆ ແລະ ຮູ້ສຶກວ່າທ່ານເປັນສ່ວນໜຶ່ງຂອງຄອບຄົວເຂົາ ແລະ ເຂົາກໍເປັນສ່ວນໜຶ່ງຂອງຄອບຄົວທ່ານ.
- ຮູ້ສຶກຄິດເຖິງກັນເມື່ອຕ້ອງຫ່າງ : ຄົນຮັກກັນກໍຕ້ອງຄິດຮອດຄິດເຖິງກັນເປັນປົກກະຕິ ແລະ ທ່ານຈະຮູ້ສຶກຄິດຮອດກັນເມື່ອມີເຫດຈຳເປັນທີ່ຈະຕ້ອງຫ່າງກັນ ເຊິ່ງບໍ່ແມ່ນຄວາມຮູ້ສຶກຂອງຝ່າຍໃດຝ່າຍໜຶ່ງ, ແຕ່ທ່ານທັງສອງຄົນຈະຮູ້ສຶກຄືກັນ.
- ຮູ້ສຶກຫລົງໄຫລກັນ : ທ່ານທັງສອງຮູ້ສຶກຫລົງໄຫລໃນກັນ ແລະ ກັນ ບໍ່ແມ່ນຮູ້ສຶກສະເພາະຕອນທຳອິດທີ່ຄົບຫາກັນ, ຢາກໃຊ້ເວລານຳກັນຢ່າງສະໝໍ່າສະເໝີ, ຢາກສຳຜັດ, ຢາກກອດ ແລະ ບໍ່ເຄີຍຮູ້ສຶກເບື່ອກັນເລີຍ.
- ຢາກໃຊ້ເວລາຮ່ວມກັນ ໂດຍທີ່ຝ່າຍໃດຝ່າຍໜຶ່ງບໍ່ຕ້ອງຮ້ອງຂໍ : ຕ່າງຝ່າຍຕ່າງຮູ້ສຶກຢາກໃຊ້ເວລາຮ່ວມກັນໃນລະດັບພໍດີກັນ ເມື່ອທ່ານຢາກພົບເຂົາ ເຂົາກໍຢາກພົບທ່ານ ໂດຍບໍ່ມີຝ່າຍໃດຝ່າຍໜຶ່ງຮ້ອງຂໍ ແລະ ບໍ່ໄດ້ຮູ້ສຶກວ່າຫລາຍຈົນເກີນໄປ.
- ເມື່ອຢູ່ນຳກັນແລ້ວຮູ້ສຶກວ່າຊີວິດປ່ຽນແປງໄປໃນທາງທີ່ດີຂຶ້ນ : ການຄົບຫາກັນຂອງທ່ານ ແລະ ເຂົາເຮັດໃຫ້ຕ່າງຝ່າຍຕ່າງປ່ຽນແປງໄປໃນທາງທີ່ດີຂຶ້ນ ທັງເລື່ອງໜ້າທີ່ວຽກງານ, ທັງການເບິ່ງແຍງດູແລສຸຂະພາບຕົນເອງ ເພາະຢາກຢູ່ນຳກັນດົນໆ ແລະ ເລື່ອງອື່ນໆທີ່ເຮັດໃຫ້ຮູ້ສຶກວ່າຢາກເຮັດຕົນເອງໃຫ້ດີຂຶ້ນ ເພື່ອຄົນທີ່ເຮົາຮັກ.
- ບໍ່ຮູ້ສຶກວ່າຢາກຄົບຫາກັບໃຜອີກນອກຈາກເຂົາ : ເຖິງຈະມີໜຸ່ມຫລໍ່ສາວງາມພຽບພ້ອມຫລາຍປານໃດມາລົມທ່ານ ທ່ານກໍຈະບໍ່ຮູ້ສຶກຫວັ່ນໄຫວ ຫລື ຢາກຈະນອກໃຈເຂົາເລີຍແມ່ນແຕ່ໜ້ອຍດຽວ ເພາະເຂົາແມ່ນຄົນທີ່ກົງໃຈທີ່ສຸດສຳລັບທ່ານແລ້ວ ແລະ ບໍ່ມີໃຜມາແທນເຂົາໄດ້.
