ດູໄບເລີ່ມຫ້າມຄົນນຳອຸປະກອນໃຫຍ່ກວ່າມືຖືຂຶ້ນເຮືອບິນອາເມລິກາແລ້ວ

    ສະໜາມບິນ ແລະ ສາຍການບິນຂອງດູໄບເລີ່ມໃຊ້ມາດຕະການຫ້າມຜູ້ໂດຍສານຖ້ຽວບິນໄປອາເມລິການຳເອົາອຸປະ ກອນເອເລັກໂຕຣນິກທີ່ມີຂະໜາດໃຫຍ່ກວ່າໂທລະສັບເຄື່ອນທີ່ຂຶ້ນເຮືອບິນແລ້ວຕາມຄຳສັ່ງຂອງອາເມລິກາ.

ສະໜາມບິນນາໆຊາດດູໄບເລີ່ມໃຊ້ມາດຕະການດັ່ງກ່າວນັບແຕ່ວັນທີ 25 ມີນານີ້ ຕາມອາເມລິກາປະກາດໃຊ້ກັບຖ້ຽວບິນຈາກ 10 ສະໜາມບິນໃນ 8 ປະເທດຕາເວັນອອກກາງ ແລະ ອາຟຣິກາເໜືອເມື່ອມໍ່ໆມານີ້. ນອກຈາກນີ້ ຍັງຄວບຄຸມເຖິງອຸປະກອນເອເລັກໂຕຣນິກທັງໝົດທີ່ຈຳໜ່າຍໃນຮ້ານຄ້າປອດພາສີພາຍໃນສະໜາມບິນດູໄບອີກ. ເຈົ້າໜ້າທີ່ອາວຸໂສຂອງສະໜາມບິນເປີດເຜີຍວ່າ: ໄລຍະນີ້ເຂົ້າສູ່ໄລຍະທ່ອງທ່ຽວໃນລະດູໃບໄມ້ຫລົ່ນ ເຊິ່ງອາດຈະມີຜູ້ໂດຍສານ ໃຊ້ບໍລິການສູງເຖິງມື້ລະ 260.000 ຄົນ, ສ່ວນຈຳນວນຜູ້ໂດຍສານໃຊ້ບໍລິການໝົດປີຄາດວ່າຈະບັນລຸ 89 ລ້ານຄົນໃນປີນີ້.

ສ່ວນສາຍການບິນເອມິເຣດຂອງລັດຖະບານ ເຊິ່ງມີຖ້ຽວບິນຈາກດູໄບໄປອາເມລິກາມື້ລະ 18 ຖ້ຽວບິນປະກາດວ່າ: ຈະມີບໍລິການເກັບອຸປະກອນເອເລັກໂຕຣນິກຂອງຜູ້ໂດຍສານ ແລະ ສົ່ງໄປໃຫ້ໃຊ້ລະຫວ່າງລໍຖ້າຂຶ້ນເຮືອບິນຫວັງຫລຸດຄວາມບໍ່ພໍໃຈຂອງຜູ້ໂດຍສານເອມິເຣດເປັນ 1 ໃນ 9 ສາຍການບິນອື່ນທີ່ໄດ້ຮັບຜົນກະທົບຈາກຄຳສັ່ງດັ່ງກ່າວ. ອາເມລິກາບໍ່ໄດ້ເປີດເຜີຍວ່າ: ຈະບັງຄັບໃຊ້ຈົນຮອດເວລາໃດ, ແຕ່ເອມິເຣດເປີດເຜີຍວ່າ: ໄດ້ຮັບຄຳສັ່ງໃຫ້ໃຊ້ຈົນຮອດຢ່າງໜ້ອຍວັນທີ 14 ຕຸລາ.