ເກີດເຫດເສົ້າ! ອາຟຣິກາ ຄັຟ ອັອຟ ນາຊັ່ນ ແຟນບານຍາດກັນເຂົ້າຊົມບານເຕະຈົນເຮັດໃຫ້ມີຜູ້ເສຍຊີວິດ ຢ່າງໜ້ອຍ 6 ຄົນ.
ການແຂ່ງຂັນບານເຕະ ອາຟຣິກາ ຮອບ 16 ທີມສຸດທ້າຍລະຫວ່າງ ແຄມເມີຣູນ ກັບ ຄໍໂມໂຣສ ເກີດເຫດສະລົດໃຈຂຶ້ນຢູ່ນອກສະໜາມກິລາ ເມື່ອມີແຟນບານເຕະຈຳນວນຫລາຍຍາດກັນເຂົ້າຊົມເກມ, ຈົນເຮັດໃຫ້ມີຄົນເສຍຊີວິດແລ້ວ 6 ຄົນ ແລະ ໄດ້ຮັບບາດເຈັບອີກຢ່າງໜ້ອຍ 40 ຄົນ.
ການແຂ່ງຂັນດັ່ງກ່າວໄດ້ຖືກຈໍາກັດຈຳນວນຜູ້ຊົມພຽງ 80% ຂອງຈຳນວນຄວາມຈຸ 60,000 ບ່ອນນັ່ງຂອງສະຫນາມກິລາ ໂອເລມເບ່ ສະເຕດ້ຽມ ໃນນະຄອນຫລວງ ຢາອູເດ ຂອງປະເທດ ແຄມເມີຣູນ, ອີງຕາມມາດຕະການປ້ອງກັນພະຍາດໂຄວິດ-19 ໃນຂະນະທີ່ມີລາຍງານວ່າມີປະຊາຊົນເຖິງ 50,000 ຄົນ ທີ່ຢາກເຂົ້າຊົມເກມນັດນີ້.
ເຫດການດັ່ງກ່າວ ເຮັດໃຫ້ມີຜູ້ບາດເຈັບຢ່າງໜ້ອຍ 40 ຄົນ ແລະ ເສຍຊີວິດຢ່າງໜ້ອຍ 6 ຄົນ, ແຕ່ຈາກການລາຍງານເບື້ອງຕົ້ນຄາດວ່າຈະມີຜູ້ບາດເຈັບ ແລະ ເສຍຊີວິດຕື່ມອີກ.
ພາຍຫລັງເກີດເຫດດັ່ງກ່າວ ສະຫະພັນບານເຕະອາຟຣິກາ (CAF) ໄດ້ອອກຖະແຫລງການໂດຍກ່າວວ່າຈະມີສືບສວນຫາຄວາມຈິງກ່ຽວກັບເຫດການດັ່ງກ່າວ ແລະ ຈະປັບປຸງມາດຕະການບາງຢ່າງເພື່ອບໍ່ໃຫ້ເກີດເຫດການດຽວກັນຊ້ຳອີກ.
ທັ້ງນີ້ ເກມດັ່ງກ່າວຈົບລົງດ້ວຍໄຊຊະນະຂອງ ແຄມເມີຣູນ 2-1 ແລະ ຈະໄດ້ເຂົ້າໄປພົບ ແກມເບຍ ໃນຮອບກ່ອນຮອງຊະນະເລີດ ໃນວັນທີ 29 ມັງກອນ ເວລາ 23:00 ໂມງ.
