ແນວພັນກາເຟຕ່າງປະເທດ ປູກງ່າຍໃຫ້ຜົນຫລາຍ ປີໜຶ່ງຂາຍໄດ້ເງິນຫລາຍສິບລ້ານກີບ

ການຜະລິດກະສິກໍາເປັນສິນຄ້າ ແມ່ນໜຶ່ງໃນເປົ້າໝາຍ ທີ່ກະຊວງກະສິກໍາ ແລະ ປ່າໄມ້ ໄດ້ສຸມໃສ່ ສົ່ງ ເສີມໂດຍສະເພາະສິນຄ້າທີ່ສາມາດແຂ່ງຂັນໄດ້ ເຊັ່ນ: ພືດໄລຍະສັ້ນ, ໄລຍະກາງ ແລະ ໄລຍະຍາວ ຊຶ່ງກາເຟ ຈັດຢູ່ໃນປະເພດພືດໄລຍະຍາວ ໂດຍປະຊາຊົນເມືອງທ່າແຕງແຂວງເຊກອງນິຍົມປູກ ເໝືອນດັ່ງ ທ່ານ ຄໍາຈັກ ກອນບຸດເຕີ ຢູ່ບ້ານກໍາກອກ ທີ່ປູກກາເຟເປັນສິນຄ້າ.

ທ່ານ ຄໍາຈັກ ກອນບຸດເຕີ ອາຍຸ 41 ປີ ແລະ ໃນຄອບຄົວມີສະມະຊິກ 6 ຄົນ ຊຶ່ງເມື່ອກ່ອນປູກກາເຟໜ້ອຍດຽວ ແລະ ປູກແບບທໍາມະຊາດ “ຂ້ອຍ ເຫັນກະສິກອນຫວຽດນາມ ປູກກາເຟໃນເນື້ອທີ່ໜ້ອຍດຽວ ແຕ່ຜົນເກັບກູ້ພັດໄດ້ຫລາຍ ຈຶ່ງເປັນແຮງບັນດານໃຈໃຫ້ລົງມືປູກທັນທີ, ແຕ່ກໍໄດ້ຊອກຮູ້ຮໍ່າຮຽນບວກ ໃສ່ວິຊາການຈາກຂະແໜງການກ່ຽວຂ້ອງທັງແຂວງ ແລະ ເມືອງ ແນະນໍາເຕັກນິກຕ່າງໆໃຫ້ຮູ້. ນີ້ຄືຈຸດທີ່ຂ້ອຍຫັນການຜະລິດແບບທໍາມະຊາດ ສູ່ການຫັນເປັນອຸດສາຫະກໍາທັນສະໄໝ ຜະລິດເປັນສິນຄ້າ” ທ່ານ ຄຳຈັກ ເລົ່າສູ່ຟັງ. ພາຍຫລັງໄດ້ແນວພັນກາເຟຫວຽດນາມ, ປີ 2016 ຄຳຈັກ ໄດ້ເລີ່ມປູກ 1 ເຮັກຕາ ໂດຍເນັ້ນປູກກາເຟກາງ ເພາະເໝາະສົມກັບສະພາບດິນຟ້າອາກາດ ແລະ ໄລຍະການເກັບກ່ຽວ ພ້ອມທັງບົວລະບັດຮັກສາງ່າຍ ໃຫ້ໝາກດົກ ແລະ ຕໍ່ມາປີ 2017 ກໍໄດ້ປູກຕື່ມອີກໃນເນື້ອທີ່ 2 ເຮັກຕາ “ ຂ້ອຍເນັ້ນການການບົວລະບັດຮັກສາຕາມໄລຍະການເຕີບໃຫຍ່ຂອງຕົ້ນກາເຟ ທັງຕອນ ກິ່ງ-ງ່າ ແລະ ແໜງທີ່ບໍ່ສໍາຄັນຖິ້ມ ເພື່ອເຮັດໃຫ້ກາເຟອອກດອກ ແລະ ໃຫ້ໝາກຫຼາຍ, ໃສ່ຝຸ່ນຄອກ, ເສຍຫຍ້າຂ້າຫຸ່ນ ບໍ່ໃຫ້ຮົກ ຕົ້ນກາເຟຈຶ່ງໃຫຍ່ ແລະ ງາມ” ຄຳຈັກ ບອກ. ມາຮອດປັດຈຸບັນ, ຄຳຈັກ ເກັບກ່ຽວຜົນຜະລິດໄດ້ແລ້ວ 2 ຊຸດ ແລະ ຂາຍໄດ້ເງິນແລ້ວ 135 ລ້ານກີບເມື່ອທຽບໃສ່ຫລາຍປີຜ່ານມາ ເກັບກ່ຽວກາເຟໝາກແດງໄດ້ 25 ໂຕນຕໍ່ປີ ຂາຍໄດ້ເງິນ 60 ລ້ານກວ່າກີບ ເພາະໄລຍະນັ້ນກາເຟບໍ່ທັນເປັນລາຄາ. ນອກຈາກປູກກາ ເຟແລ້ວ, ຄໍາຈັກ ກອນບຸດເຕີ ຍັງລ້ຽງງົວພື້ນເມືອງ, ລ້ຽງປາ, ປູກຖົ່ວລຽນ ແລະ ໝາກໄມ້ໃຫ້ໝາກຕື່ມອີກ ຊຶ່ງຖືວ່າເປັນການລາຍຮັບເສີມ ແລະ ແຮໄວ້ເປັນສະບຽງອາຫານໃນຄອບຄົວ.

ທ່ານ ຄໍາຈັກ ກອນບຸດເຕີ ບອກຕື່ມວ່າ: ຕໍ່ໜ້າ ຈະຂະຫຍາຍເນື້ອທີ່ປູກກາເຟຕື່ມອີກ 7 ເຮັກຕາ ເພື່ອສ້າງລາຍຮັບໃຫ້ຄອບຄົວ ຫຼຸດພົ້ນຈາກຄວາມທຸກຍາກ ກ້າວສູ່ການສ້າງຄວາມເຂັ້ມແຂງໃຫ້ແກ່ລະບົບເສດຖະກິດຂອງເມືອງກໍຄື ແຂວງ ແລະ ປະເທດຊາດ.

ໂດຍ : ລັດຕະນະພອນ ກອງໄຊສະຫວັດ