ປັດຈຸບັນ ພະນັກງານລັດຖະກອນ ກະຊວງ ຖວທ ມີວຸດທິລະດັບ ປ.ຕີ 817 ຄົນ, ປ.ໂທ 218 ຄົນ ແລະ ປ.ເອກ 9 ຄົນ
ທ່ານ ອາລຸນ ບຸນມີໄຊ ຫົວໜ້າກົມຈັດຕັ້ງ ແລະ ພະນັກງານ ກະຊວງ ຖວທ ໄດ້ລາຍງານຕໍ່ກອງປະຊຸມສະຫລຸບວຽກງານຈັດຕັ້ງ ໃນວັນທີ 24 ມັງກອນ 2022 ນີ້ວ່າ:
ຜ່ານການກໍ່ສ້າງ-ບຳລຸງ ພະນັກງານແບບຮອບດ້ານ ເຮັດໃຫ້ພະນັກງານພາຍໃນຂະແຫນງການມີຄວາມຮູ້, ຄວາມສາມາດ, ກໍາແໜ້ນແນວທາງ, ຫລັກມູນທິດສະດີມາກ-ເລນິນ, ແນວຄິດປະທານໄກສອນພົມວິຫານ, ການບໍລິຫານຄຸ້ມຄອງວຽກງານ ແລະ ວິຊາສະເພາະຕ່າງໆ ນັບມື້ນັບເພີ່ມຂຶ້ນ; ພົ້ນເດັ່ນທີ່ສຸດ ແມ່ນ ພະນັກງານ-ລັດຖະກອນ ທີ່ມີການສຶກສາລະດັບປະລິນຍາຕີ ແລະ ປະລິນຍາໂທແມ່ນເພີ່ມຂຶ້ນ ແບບກ້າວກະໂດດ ຄື: ລະດັບປະລິນຍາຕີ ປັດຈຸບັນມີ 817ຄົນ ຖ້າທຽບໃສ່ປີ 2015 ມີພຽງແຕ່ 297 ຄົນ ເພີ່ມຂຶ້ນ 520 ຄົນ(ຫຼືເພີ່ມຂຶ້ນເກືອບ 3 ເທົ່າ) ແລະ ປະລິນຍາໂທ 218 ຄົນ ຖ້າທຽບໃສ່ປີ 2015 ມີພຽງ 38 ຄົນ ເພີ່ມຂຶ້ນ 180 ຄົນ(ຫຼືເພີ່ມຂຶ້ນເກືອບ 6 ເທົ່າ). ນອກນັ້ນ ຍັງໄດ້ເອົາໃຈໃສ່ ການຝຶກອົບຮົມພະນັກງານ ຢູ່ທັງພາຍໃນ ແລະ ຕ່າງປະເທດ ໃນຫົວຂໍ້ຕ່າງໆ ມີທັງຫມົດ 83 ຫົວຂໍ້ ມີຜູ້ເຂົ້າຮ່ວມທັງຫມົດ 428 ຄົນ, ເປັນຍິງ 138 ຄົນ, ນອກນັ້ນຍັງ ຖືສໍາຄັນວຽກງານການຈັດຕັ້ງເຊື່ອມຊຶມແນວທາງນະໂຍບາຍຂອງພັກ-ລັດ ປະ ຕິບັດໄດ້ 14ຄັ້ງ ມີຜູ້ເຂົ້າຮ່ວມທັງຫມົດ 6.848 ເທື່ອຄົນ, ເປັນຍິງ 1.615 ເທື່ອຄົນ.
ການຈັດຕັ້ງປະຕິບັດ ວຽກງານການກໍ່ສ້າງພັກ-ພະນັກງານ ແລະ ປັບປຸງກົງຈັກການຈັດຕັ້ງ ໃນໄລຍະ 5 ປີຜ່ານມາ (2016-2020) ເຫັນໄດ້ວ່າ:
ຄະນະບໍລິຫານພັກກະຊວງ ຖວທ ໄດ້ຖືສຳຄັນ ແລະ ເອົາໃຈໃສ່ວຽກງານພະນັກງານ ໂດຍໄດ້ຈັດຕັ້ງຜັນຂະຫຍາຍແຜນກຳນົດພະນັກງານນຳພາ-ຄຸ້ມຄອງ ຂັ້ນສູນກາງສຳເລັດໃນປີ 2019 ແລະ ຖືເປັນບູລິມະສິດໜຶ່ງໃນທົ່ວຂະແໜງຖະແຫລງຂ່າວ, ວັດທະນະທຳ ແລະ ທ່ອງທ່ຽວ. ພາຍຫລັງມີແຜນກຳນົດພະນັກງານແລ້ວ ຄະນະພັກ-ຄະນະນຳ ຍັງໄດ້ເອົາໃຈໃສ່ກໍ່ສ້າງ-ບໍາລຸງພະນັກງານຢ່າງຮອບດ້ານ ທັງເນັ້ນຄຸນນະພາບ ໂດຍແນໃສ່ເປົ້າໝາຍທີ່ນອນຢູ່ໃນແຜນກຳນົດເປັນຕົ້ນຕໍ, ພ້ອມທັງເອົາໃຈໃສ່ຍົກລະດັບໃຫ້ພະນັກງານຢ່າງເປັນປົກກະຕິ ມີທັງຄວາມຮູ້ທາງດ້ານທິດສະດີການເມືອງ-ການປົກຄອງ ແລະ ວິຊາສະເພາະທັງພາຍໃນ ແລະ ຕ່າງປະເທດ.
ທ່ານ ອາລຸນ ບຸນມີໄຊ ໃຫ້ຮູ້ອີກວ່າ: ປັດຈຸບັນ ທົ່ວກະຊວງ ຖວທ ມີພະນັກງານ-ລັດຖະກອນ ທັງໝົດ 1.430 ຄົນ, ເປັນຍິງ 618 ຄົນ ຢູ່ຂັ້ນສູນກາງ (ບໍ່ລວມລັດຖະກອນຄູສອນທີ່ຢູ່ໃນໂຮງຮຽນ ແລະ ສະຖາບັນການສຶກສາທີ່ຂຶ້ນກັບກະຊວງ), ລັດຖະກອນທີ່ແຍກຕາມວິຊາສະເພາະ ຊັ້ນປະລິນຍາເອກມີ 09 ຄົນ, ຍິງ 01 ຄົນ, ປະລິນຍາໂທມີ 218 ຄົນ, ຍິງ 80 ຄົນ, ປະລິນຍາຕີມີ 817 ຄົນ, ຍິງ 370 ຄົນ, ຊັ້ນສູງ 277 ຄົນ, ຍິງ 119 ຄົນ, ຊັ້ນກາງ 130 ຄົນ, ຍິງ 51 ຄົນ, ຊັ້ນຕົ້ນ ແລະ ບໍ່ມີຊັ້ນ ມີ 46 ຄົນ, ຍິງ 08 ຄົນ.
