ໄອຍະການປະຊາຊົນລາວ-ຫວຽດນາມ ສືບຕໍ່ເພີ່ມທະວີການຮ່ວມມື
ຂ່າວສານປະເທດລາວ ລາຍງານວ່າ: ການພົບປະທາງໄກໃນວັນທີ 21 ມັງກອນ ລະຫວ່າງທ່ານ ໄຊຊະ ນະ ໂຄດພູທອນ ຫົວໜ້າອົງການໄອຍະການປະຊາຊົນສູງສຸດແຫ່ງສປປລາວ ແລະ ທ່ານ ເລ ມິງ ຈີ ຫົວໜ້າອົງການໄອຍະການປະຊາຊົນສູງສຸດແຫ່ງສສ ຫວຽດນາມ, ທັງສອງຝ່າຍເຫັນພ້ອມກັນວ່າ: ປີ 2022 ຈະພ້ອມກັນຄົ້ນຄວ້າບົດບັນທຶກຊ່ວຍຈໍາສະບັບໃໝ່ເພື່ອເປັນພື້ນຖານໃຫ້ແກ່ການຮ່ວມມືຢ່າງມີປະສິດທິຜົນ ໂດຍສຸມໃສ່ແລກປ່ຽນຄະນະຜູ້ແທນຂັ້ນສູງ, ຜູ້ແທນຂັ້ນວິຊາການ, ການຖອດຖອນບົດຮຽນກ່ຽວກັບການດໍາເນີນຄະດີປົກຄອງ ແລະ ບົດບາດຂອງອົງການໄອຍະການປະຊາຊົນ, ການຮ່ວມມືທາງອາຍາ, ການປະ ຈຳຄ້າຍຄຸມຂັງຂອງພະນັກງານໄອຍະການປະຊາຊົນ, ການຂຽນຄຳຖະແຫຼງ ແລະ ການເຂົ້າຮ່ວມປະຊຸມສານຂອງພະນັກງານໄອຍະການປະຊາຊົນ, ການກໍ່ສ້າງພະນັກງານໄອຍະການປະຊາຊົນ, ການຮ່ວມມືລະຫວ່າງອົງການໄອຍະການປະຊາຊົນທ້ອງຖິ່ນທີ່ມີຊາຍແດນຕິດຈອດກັນ, ວຽກສື່ມວນຊົນ, ການຫັນເປັນທັນສະໄໝ ແລະ ວຽກງານອື່ນໆ ທີ່ສອງຝ່າຍສົນໃຈ ຊຶ່ງການເພີ່ມທະວີການຮ່ວມມືລະຫວ່າງສອງຝ່າຍເປັນການປະກອບສ່ວນສຳຄັນເສີມຂະຫຍາຍສາຍພົວພັນມິດຕະພາບ, ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງສອງພັກ, ສອງລັດ ແລະ ປະຊາຊົນສອງຊາດລາວ-ຫວຽດນາມ, ຫວຽດນາມ-ລາວ ກໍຄືການພົວພັນ-ຮ່ວມມືລະຫວ່າງສອງອົງການໄອຍະການປະຊາຊົນ ໃຫ້ນັບມື້ກ້າວສູ່ລວງເລິກ, ມີຜົນສຳເລັດໃຫຍ່ຫຼວງກວ່າເກົ່າ ແລະ ໝັ້ນຄົງຂະໜົງແກ່ນຊົ່ວກາລະນານທັງເປັນເພີ່ມທະວີການຮ່ວມມືດ້ານກົດໝາຍ, ຕ້ານອາຊະຍາກໍາຂ້າມຊາດ, ເຮັດໃຫ້ສັງຄົມມີຄວາມສະຫງົບ, ເປັນລະບຽບຮຽບຮ້ອຍ ຈະ ເລີນກ້າວໜ້າຢ່າງບໍ່ຢຸດຢັ້ງ ຕາມທິດສັງຄົມນິຍົມ.
ປີ 2021, ອົງການໄອຍະການປະຊາຊົນສອງປະເທດໄດ້ພ້ອມກັນວາງແຜນການເຄື່ອນໄຫວແລກປ່ຽນຄະ ນະຜູ້ແທນຂັ້ນສູງ, ການເຂົ້າຮ່ວມກອງປະຊຸມຫົວໜ້າອົງການໄອຍະການສູງສຸດອາຊຽນ-ຈີນຄັ້ງທີ 13,ການ ຝຶກອົບຮົມວຽກງານໄອຍະການ, ການຢ້ຽມຢາມ ສສ ຫວຽດນາມຂອງຄະນະຜູ້ແທນວາລະສານອົງການໄອຍະການປະຊາຊົນສູງສຸດແຫ່ງ ສປປ ລາວ, ແຕ່ຍ້ອນການລະບາດຂອງພະຍາດໂຄວິດ-19 ຈຶ່ງບໍ່ສາມາດຈັດຕັ້ງປະຕິບັດໄດ້.
