ຜູ້ນຳຕວກກີເລັ່ງ EU ໃຫ້ຕັດສິນໃຈເລື່ອງເຂົ້າເປັນສະມາຊິກ

     ປະທານາທິບໍດີ ເຣເຈບ ທາຍຍິບ ແອໂດອານ ຂອງຕວກກີ ກ່າວວ່າ: ຈະເປັນເລື່ອງງ່າຍກວ່າ. ຖ້າສະຫະພາບເອີຣົບ (EU) ຕັດສິນໃຈລະງັບຄຳຮ້ອງຂອງຕວກກີໃນການຂໍເຂົ້າ ເປັນສະມາຊິກ EU.

ຄຳຖະແຫລງຂອງຜູ້ນຳຕວກກີຖືເປັນສຽງວິຈານຫລັງສຸດທີ່ມີຕໍ່ຄວາມຂັດແຍ່ງລະຫວ່າງຕວກກີກັບເອີຣົບ, ພາຍ ຫລັງເຢຍລະມັນ ແລະ ເນເທີແລນສະກັດບໍ່ໃຫ້ລັດຖະມົນຕີຕວກກີເຂົ້າປະເທດ ເພື່ອມາຮ່ວມການຊຸມນຸມຂອງກຸ່ມຊາວຕວກກີໃນຕ່າງແດນ. ນອກຈາກນີ້ ປະທານາທິບໍດີ ແອໂດອານ ຍັງກ່າວອີກວ່າ: ທ່ານຈະຈັດໃຫ້ມີການລົງປະຊາມະຕິໃນການຂໍເຂົ້າເປັນສະມາຊິກ EU ແລະ ຈະເຄົາລົບການຕັດສິນໃຈຂອງປະຊາຊົນທົ່ວປະເທດ. ຂະນະທ່ີຕວກກີຈະມີການລົງປະຊາມະຕິເພື່ອອະນຸມັດແກ້ໄຂລັດຖະທຳມະນູນເພີ່ມອຳນາດໃຫ້ປະທານາທິບໍດີໃນວັນທີ 16 ເມສານີ້.