ເຢຍລະມັນ ສົ່ງເສີມການຜະລິດກະສິກຳແບບຍືນຍົງ ຢູ່ 6 ເມືອງແຂວງຂຽງຂວາງ

ຂ່າວສານປະເທດລາວລາຍງານວ່າ: ເມື່ອບໍ່ດົນມານີ້, ທ່ານ ສົມສະໝອນ ຜະລິຈັນ ຮອງຫົວໜ້າພະແນກກະສິກຳ ແລະ ປ່າໄມ້ແຂວງຊຽງຂວາງ ແລະ ທ່ານນາງ ຈິວລ້ຽນ ໂກຣລິມັນ ຜູ້ອຳນວຍການອົງການ ອາ ດຣາ ປະຈຳສປປ ລາວ ໄດ້ລົງນາມໃນບົດບັນທຶກຄວາມເຂົ້າໃຈການສົ່ງເສີມການຜະລິດກະສິກຳແບບຍືນ ຍົງ ແລະ ພັດທະນາຊີວິດການເປັນຢູ່ຂອງປະຊາຊົນເຂດຊົນນະບົດ 6 ເມືອງເປົ້າໝາຍ ຄື ເມືອງແປກ, ເມືອງຄູນ, ຜາໄຊ, ພູກູດ, ເມືອງຄຳ ແລະ ໜອງແຮດໂດຍທ່ານ ບົວເງິນ ຫຸມໄຊຍະພົມ ຮອງເຈົ້າແຂວງຊຽງຂວາງ ພ້ອມດ້ວຍຜູ້ຕາງໜ້າພະແນກການອ້ອມຂ້າງແຂວງ ແລະ ພາກສ່ວນກ່ຽວຂ້ອງເຂົ້າຮ່ວມເປັນສັກຂີພິຍານ.

ໂຄງການນີ້ໄດ້ຮັບທຶນສະໜັບສະໜູນຈາກກະຊວງການຮ່ວມມືດ້ານເສດຖະກິດ ແລະ ການພັດທະນາເຢຍລະມັນ ແລະ ອົງການ ອາດຣາ ເຢຍລະມັນ ມູນຄ່າ 1 ລ້ານກວ່າໂດລາສະຫະລັດ ແນໃສ່ປະກອບ ສ່ວນພັດທະນາເສດຖະກິດ-ສັງຄົມ, ການພັດທະນາຊົນນະບົດ ແລະ ຫລຸດຜ່ອນຄວາມທຸກຍາກຢູ່ ສປປ ລາວ ໂດຍສົ່ງເສີມກະສິກຳຍືນຍົງ-ປັບໂຕ ເຂົ້າກັບການປ່ຽນແປງດິນຟ້າອາກາດ, ຍົກລະດັບຄວາມທົນທານ ແລະ ຊີວິດການເປັນຢູ່ຂອງກະສິກອນເຂດຊົນນະບົດໂດຍການສ້າງຄວາມສາມາດຂອງອົງກອນ ແລະ ຂະບວນການທາງສັງຄົມຢູ່ພາຍໃນແຂວງດັ່ງກ່າວ.