ຫ້ອງການສຳນັກງານນາຍົກລັດຖະມົນຕີ ແຈ້ງການໃຫ້ທິດຊີ້ນຳເປີດການທ່ອງທ່ຽວສີຂຽວ
ວັນທີ 20 ມັງກອນນີ້, ຫ້ອງການສຳນັກງານນາຍົກລັດຖະມົນຕີ ໄດ້ແຈ້ງການເຖິງຮອງນາຍົກລັດຖະມົນຕີ, ຫົວໜ້າຄະນະສະເພາະກິດເພື່ອປ້ງກັນ, ຄວບຄຸມ ແລະ ແກ້ໄຂການແພ່ລະບາດຂອງພະຍາດໂຄວິດ-19, ລັດຖະມົນຕີກະຊວງ ຖວທ ແລະ ກະຊວງສາທາລະນະສຸກ ໂດຍໃຫ້ທຸກພາກສ່ວນ ປະຕິບັດຕາມທິດຊີ້ນຳຂອງກອງປະຊຸມກົມການເມືອງສູນກາງພັກຮ່ວມກັບຄະນະເລຂາ ທິການສູນກາງພັກ ກ່ຽວກັບການຈັດຕັ້ງປະຕິບັດມາດຕະການປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂການລະບາດພະຍາດໂຄວິດ-19 ດັ່ງນີ້:
- ເຫັນດີໃຫ້ເປີດການທ່ອງທ່ຽວສີຂຽວຕາມແຜນການທີ່ໄດ້ກະກຽມໄວ້, ມອບໃຫ້ຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂການແພ່ລະບາດຂອງພະຍາດໂຄວິດ-19 ສົມທົບກັບພາກສ່ວນກ່ຽວຂ້ອງ ຄົ້ນຄວ້າຄືນ ມາດຕະການຕ່າງໆທີ່ໄດ້ກໍານົດອອກມານັ້ນຈະມີຄວາມຮັບປະກັນ ແລະ ສາມາດຮັບມືກັບການແພ່ລະບາດຂອງພະຍາດໂຄວິດ-19 ທັງສາຍພັນໃໝ່ໂອມິຄຣອນ (Omicron) ແລະ ສາຍພັນເດວຕ້າ (Delta) ໄດ້ບໍ່, ພ້ອມທັງປະເມີນຄືນຄວາມ ສຽງແຕ່ລະໄລຍະ ເພື່ອໃຫ້ສາມາດກໍານົດມາດຕະການ ແລະ ແຜນການຮັບມືໃນການປ້ອງກັນ, ຄວບຄຸມ, ສະກັດກັ້ນ ແລະ ແກ້ໄຂການແພ່ລະບາດ ໄດ້ຢ່າງທັນການ, ພ້ອມນັ້ນ ກໍຄົ້ນຄວ້າກ່ຽວກັບມາດຕະການຜ່ອນຜັນ ເປັນຕົ້ນ:
– ຄົ້ນຄວ້າກ່ຽວກັບການອະນຸມັດໃຫ້ຜູ້ທີ່ຈະເດີນທາງເຂົ້າມາ ສປປ ລາວ ໂດຍສະເພາະແມ່ນນັກທຸລະກິດ, ພະນັກງານ, ຜູ້ປະກອບການ ແລະ ອື່ນໆ ເພື່ອເປັນການດຶງດູດ ແລະ ຊຸກຍູ້ການດໍາເນີນທຸລະກິດ ແລະ ການລົງທຶນຕ່າງໆ ໃຫ້ສາມາດດໍາເນີນໄດ້ຕາມແຜນການ.
– ຄົ້ນຄວ້າກ່ຽວກັບມາດຕະການຜ່ອນຜັນໃຫ້ກັບກິດຈະການຕ່າງໆ ທີ່ບໍ່ມີຄວາມສ່ຽງ ໂດຍໃຫ້ຄົ້ນຄວ້າ ແລະ ກໍານົດມາດຕະການຜ່ອນຜັນຢ່າງຈະແຈ້ງ, ຮອບຄອບ ແລະ ຮັບປະກັນ ເພື່ອສົ່ງເສີມການທໍາມາຫາກິນພາຍໃນປະເທດເຮົາ ໃຫ້ມີຄວາມຄ່ອງຕົວຫລາຍຂຶ້ນ, ໃນນັ້ນ ເດັດຂາດບໍ່ອະນຸຍາດໃຫ້ຜ່ອນຜັນບັນດາຮ້ານບັນເທີງ, ຮ້ານກິນດື່ມ, ຄາລາໂອເກະ ແລະ ສະຖານທີ່ອື່ນໆ ທີ່ເຫັນວ່າຍັງມີຄວາມສ່ຽງສູງຢູ່ທີ່ຈະພາໃຫ້ເກີດມີການແພ່ລະບາດພະຍາດເປັນວົງກວ້າງ ແລະ ບໍ່ສາມາດຄວບຄຸມໄດ້. ກໍລະນີເກີດມີການລະບາດໜັກ ແລະ ແພ່ກະຈາຍເປັນວົງກວ້າງກໍໃຫ້ຮີບຮ້ອນດໍາເນີນການປະເມີນ ຄວາມສ່ຽງ ແລະ ວາງມາດຕະການຮັບມື, ຄວບຄຸມ ແລະ ແກ້ໄຂໃຫ້ທັນການ.
- ໃຫ້ກະຊວງສາທາລະນະສຸກເປັນໃຈກາງສົມທົບກັບພາກສ່ວນກ່ຽວຂ້ອງ ຈັດຕັ້ງປະຕິບັດຄື:
-ເພີ່ມທະວີການຈັດຕັ້ງປະຕິບັດວຽກງານ ທີ່ມີຄວາມຈໍາເປັນໃນໄລຍະນີ້ ເປັນຕົ້ນແມ່ນ: ການປິ່ນປົວ ແລະ ການກວດຫາເຊື້ອ ໂດຍໃຫ້ພາກເອກະຊົນມີສ່ວນຮ່ວມຕື່ມ ທັງໃຫ້ມີການໂຄສະນາ ຮູບແບບຕ່າງໆ ໃຫ້ກວ້າງຂວາງ ແລະ ທົ່ວເຖິງ ສ້າງສິ່ງຈູງໃຈ ເພື່ອເຮັດໃຫ້ປະຊາຊົນ ຫລື ຜູ້ບໍລິໂພກຂ່າວລັດຖະບານເຮົາ ມີຄວາມສົນໃຈ ແລະ ມີສະຕິລະວັງຕົວສູງຂຶ້ນ ໃນການດໍາລົງຊີວິດປົກກະຕິແບບໃໝ່ (New normal).
– ຮີບຮ້ອນດໍາເນີນການແຈກຢາຍ ແລະ ສັກວັກຊີນ ໃຫ້ໄດ້ຢ່າງທົ່ວເຖິງ ໂດຍສະເພາະ ການສັກວັກຊີນ ໃຫ້ກັບ ພະນັກງານຂົງເຂດປ້ອງກັນຊາດ-ປ້ອງກັນຄວາມສະຫງົບ, ຄູ-ອາຈານ, ນັກຮຽນ-ນັກສຶກສາ ແລະ ພາກສ່ວນອື່ນໆ ໃຫ້ ສໍາເລັດຕາມແຜນການທີ່ໄດ້ກໍານົດໄວ້; ສໍາລັບແພດ-ໝໍ ແລະ ພະນັກງານດ່ານໜ້າ ທີ່ຮັບຜິດຊອບວຽກງານປ້ອງກັນ, ຄວບຄຸມ ແລະ ແກ້ໄຂການແພ່ລະບາດຂອງພະຍາດ-19 ນັ້ນ ແມ່ນໃຫ້ຮີບຮ້ອນສັກວັກຊີນ ເຂັມສາມ (ເຂັ້ມກະຕຸ້ນ) ໃຫ້ໄດ້ຢ່າ ທົ່ວເຖິງ ແລະ ທັນການ ເພື່ອຮັບປະກັນໃນການປະຕິບັດໜ້າທີ່ ໃຫ້ມີຄວາມປອດໄພ, ມີປະສິດທິພາບ ແລະ ປະສິດທິຜົນສູງຂຶ້ນ, ພ້ອມນັ້ນ ກໍໃຫ້ສະຫລຸບ, ສັງລວມ ຈໍານວນວັກຊີນທີ່ໄດ້ຮັບ ແລະ ໄດ້ແຈກຢາຍ ຜ່ານມາຢ່າງລະອຽດ ເພື່ອໃຫ້ສາມາດ ກໍານົດຄວາມຕ້ອງການ ແລະ ຂຶ້ນແຜນແຈກຢາຍ, ຈັດຊື້ ແລະ ຂໍການສະໜັບສະໜູນ ໃນຕໍ່ໜ້າ.
