ເມສຊີ ເປັນນັກເຕະຄົນທີ 2 ທີ່ຄົນຕິດຕາມໃນໄອຈີເກີນ 300 ລ້ານ

ESPN ແລະ ເດລີ ມິຣເຣີ ສື່ກິລາຊັ້ນນຳລາຍງານວ່າ ລີໂອເນລ ເມສຊີ ກາຍເປັນນັກເຕະບານອາຊີບຄົນທີ 2 ທີ່ມີຜູ້ຕິດຕາມອິນສະຕາແກຣມເກີນ 300 ລ້ານຄົນ ໂດຍຫລ້າສຸດຫາກໍເຮັດຍອດເຖິງ 302 ລ້ານຄົນ ຫລັງຈົບງານປະກາດລາງວັນດີເດ່ັນແຫ່ງປີ 2021 ‘‘ The Best FIFA Football Awards 2021 ’’ ໂດຍສະຫະພັນບານເຕະນາໆຊາດ ເຊິ່ງລາວພາດລາງວັນນັກເຕະດີເດ່ັນແຫ່ງປີໃຫ້ກັບ ໂຣເບີດ ເລວານດອບສະກີ ຈາກ ບາເຢິນ ມິວນິກ ເມື່ອວັນຈັນທີ 17 ມັງກອນ.

ສ່ວນນັກເຕະຄົນທຳອິດທີ່ມີຜູ້ຕິດຕາມໄອຈີ ເກີນ 300 ລ້ານຄົນ ຄື ຄຣິສຕຽນໂນ ໂຣນັລໂດ ເຊິ່ງເປັນຄູ່ແຂ່ງທີ່ຍາດຊີງຄວາມສຳເລັດທັງໃນ ແລະ ນອກສະຫນາມກັນມາຕະຫລອດ ໂດຍດາວຍິງທີມຊາດໂປຣຕຸເກສຈາກສະໂມສອນ ແມນເຊສເຕີ ຢູໄນເຕັດ ມີຍອດຜູ້ຕິດຕາມຫລ້າສຸດຢູ່ທີ່ 392 ລ້ານຄົນ ຂະນະທີ່ ອັນດັບ 3 ເປັນ ເນມາ ຫມູ່ຮ່ວມທີມ ປາຣີສ ແຊັງ ແຊັກແມັງ ຂອງ ເມສຊີ ໂດຍມີຜູ້ຕິດຕາມຫລ້າສຸດ 168 ລ້ານຄົນ.

ແນວໃດກໍຕາມ ຫາກນັບຈຳນວນໂພສລະຫວ່າງ ໂຣນັລໂດ ກັບ ເມສຊີ ຖືວ່າແຕກຕ່າງກັນເກືອບເທົ່າ ໂດຍໄອຈີຂອງ ເມສຊີ ມີພຽງ 823 ໂພສ ສ່ວນຂອງ ໂຣນັລໂດ ມີເຖິງ 3,225 ໂພສຫລາຍກວ່າ 3,92 ເທົ່າ.

ເມື່ອປີ 2021 ຮອບເປີ ເອສຄິວ (Hopper HQ) ບໍລິສັດວິເຄາະຂໍ້ມູນການຕະຫລາດໃນໂຊຊຽລມີເດຍຊັ້ນນຳ ເຜີຍຜົນການຈັດອັນດັບຄົນດັງລະດັບໂລກທີ່ສາມາດສ້າງລາຍໄດ້ຫລາຍທີ່ສຸດຈາກການໂພສທີ່ໄດ້ຮັບການສະຫນັບສະຫນູນໃນອິນສະຕາແກຣມປະຈຳປີ 2021 ໂດຍພິຈາລະນາຈາກປັດໄຈຕ່າງໆ ເຊ່ັນ : ການມີສ່ວນຮ່ວມໂດຍສະເລ່ຍ, ຄວາມຖີ່ໃນການໂພສ, ຕົວແປໃນແວດວົງຂອງແຕ່ລະບຸກຄົນ ແລະ ຈຳນວນຜູ້ຕິດຕາມ.

ປາກົດວ່າ ຄຣິສຕຽນໂນ ໂຣນັລໂດ ຂຶ້ນສູ່ອັນດັບ 1 ເປັນຄັ້ງທຳອິດນັບຕັ້ງແຕ່ເລີ່ມມີການຈັດອັນດັບໃນປີ 2017 ໂດຍແຊງ ດະເວ ຈອນສັນ ຫລື  ‘‘ The Rock ’’ ອະດີດນັກມວຍປຳ້ທີ່ຜັນຕົວມາເປັນນັກສະແດງ ແລະ ອາເຣຍນາ ແກຣເດ ນັກຮ້ອງ ແລະ ນັກສະແດງຊາວເຢຍລະມັນຈາກການສ້າງລາຍໄດ້ໂພສລະ 1,6 ລ້ານໂດລາສະຫະລັດ, ສ່ວນ ເມສຊີ ໄດ້ພຽງອັນດັບ 7 ຈາກການສ້າງລາຍໄດ້ໂພສລະ 1,16 ລ້ານໂດລາສະຫະລັດ.