WHO ເຕືອນ ການແພ່ລະບາດຂອງໂຄວິດຍັງບໍ່ຈົບ ເອີຣົບຍັງຕິດເຊື້ອສູງ ສ້າງສະຖິຕິໃໝ່ຕໍ່ເນື່ອງ
ວັນທີ 19 ມັງກອນ 2022, ດຣ. ທີໂດຣສ ອັດຮານອມ ກີບຣີເຍຊຸສ ຜູ້ອຳນວຍການອົງການອະນາໄມໂລກ (WHO) ປະກາດເຕືອນວ່າ: ສະຖານະການການແພ່ລະບາດຂອງພະຍາດໂຄວິດຍັງບໍ່ຈົບ ບໍ່ມີບ່ອນໃດທີ່ການແພ່ລະບາດຈົບລົງແລ້ວ ຫລາຍປະເທດໃນເອີຣົບຍັງຕິດເຊື້ອສູງຂຶ້ນ ສ້າງສະຖິຕິໃໝ່ຕໍ່ເນື່ອງນັບແຕ່ເຊື້ອໂອມິຄຣອນແພ່ລະບາດ.
WHO ເຜີຍວ່າ: ໃນອາທິດຜ່ານມາ ມີຜູ້ຕິດເຊື້ອໂຄວິດສາຍພັນໂອມິຄຣອນສູງກວ່າ 18 ລ້ານຄົນທົ່ວໂລກ ໂດຍຄຳອະທິບາຍທີ່ວ່າ: “ເຊື້ອໂອມິຄຣອນເປັນເຊື້ອທີ່ຖ້າຕິດແລ້ວມີອາການບໍ່ຮຸນແຮງ” ອາດນຳໄປສູ່ການສ້າງຄວາມເຂົ້າໃຈຜິດ ເພາະເຊື້ອໂອມິຄຣອນເປັນສາເຫດທີ່ເຮັດໃຫ້ຜູ້ຕິດເຊື້ອຈຳນວນບໍ່ໜ້ອຍເຂົ້າຮັບການປິ່ນປົວໃນໂຮງໝໍ ແລະ ເສຍຊີວິດໄດ້ ແລະ ເຖິງວ່າອາດມີອາການຮຸນແຮງບໍ່ເທົ່າເຊື້ອໄວຣັສກ່ອນໜ້ານີ້, ແຕ່ກໍສາມາດເຮັດໃຫ້ສະຖານພະຍາບານ ແລະ ພື້ນທີ່ຮອງຮັບຜູ້ຕິດເຊື້ອແອອັດໄປດ້ວຍຜູ້ຕິດເຊື້ອຈຳນວນຫລາຍໄດ້ພາຍໃນໄລຍະເວລາບໍ່ດົນ.
ນອກຈາກນີ້, ດຣ. ກີບຣີເຍຊຸສ ຍັງເຕືອນບັນດາຜູ້ນຳໂລກເຖິງສະຖານະການການແພ່ລະບາດທີ່ມີຜູ້ຕິດເຊື້ອໂອມິຄຣອນເພີ່ມສູງຂຶ້ນທົ່ວໂລກ ອີກທັງເຊື້ອກາຍພັນຊະນິດໃໝ່ເອງກໍອາດເກີດຂຶ້ນໃນອະນາຄົດອັນໃກ້. ດັ່ງນັ້ນ ການຕິດຕາມ ແລະ ປະເມີນສະຖານະການຍັງເປັນສິ່ງສຳຄັນ ອີກທັງໃນປະເທດທີ່ມີອັດຕາຜູ້ເຂົ້າຮັບການສັກວັກຊີນປ້ອງກັນໂຄວິດຕໍ່າ ມີຄວາມສ່ຽງທີ່ຜູ້ຕິດໂຄວິດຈະເຂົ້າຮັບການປິ່ນປົວໃນໂຮງໝໍ ຫລື ອາດເສຍຊີວິດໄດ້ສູງ ໂດຍສະເພາະຖ້າເປັນກຸ່ມສ່ຽງ.
ໂດຍຫລາຍປະເທດໃນເອີຣົບຍັງມີຜູ້ຕິດເຊື້ອເພີ່ມຂຶ້ນຢ່າງວ່ອງໄວເຊັ່ນ: ຢູ່ອິຕາລີຈຳນວນຜູ້ຕິດເຊື້ອພາຍໃນວັນດຽວມີເກືອບ 2,3 ແສນຄົນ ເພີ່ມຂຶ້ນຈາກປະມານ 8 ໝື່ນຄົນໃນວັນກ່ອນໜ້າໜຶ່ງວັນ. ຂະນະທີ່ຈຳນວນຜູ້ຕິດເຊື້ອໃນຝຣັ່ງມີ 4,6 ແສນຄົນພາຍໃນວັນດຽວໃນວັນທີ 19 ມັງກອນຜ່ານມາ ໂດຍເພີ່ມຂຶ້ນຈາກປະມານ 1 ແສນຄົນໃນວັນທີ 18 ມັງກອນ ສົ່ງຜົນໃຫ້ຫລາຍປະເທດຍັງຕ້ອງດຳເນີນ ແລະ ຍົກລະດັບມາດຕະການຮັບມືການແພ່ລະບາດຂອງໂຄວິດຕໍ່ໄປອີກ.
ອ້າງອີງ:
- https://www.bbc.com/news/world-europe-60048390
- https://www.irishtimes.com/news/health/covid-19-pandemic-is-nowhere-near-over-who-chief-warns-1.4779908
- https://www.euronews.com/2022/01/18/pandemic-is-nowhere-near-over-world-health-organization-warns
