ອາເມລິກາກຽມແຈກຜ້າປິດປາກ N95 ໃຫ້ປະຊາຊົນຟຣີ 400 ລ້ານຊຸດ
ອາເມລິກາ ກຽມແຈກຜ້າປິດປາກ-ດັງ N95 ຈຳນວນ 400 ລ້ານຊຸດ ໃຫ້ປະຊາຊົນຮັບຟຣີຢູ່ຮ້ານຂາຍຢາ ຫລື ສູນອະນາໄມໃນຊຸມຊົນທົ່ວປະເທດ ຫວັງສະກັດໄວຣັສໂອມິຄຣອນລະບາດ.
ວັນທີ 19 ມັງກອນ 2022, ສຳນັກຂ່າວຕ່າງປະເທດລາຍງານໂດຍອ້າງການເປີດເຜີຍຂອງເຈົ້າໜ້າທີ່ທຳນຽບຂາວວ່າ: ລັດຖະບານອາເມລິກາຈະແຈກຜ້າປິດປາກ-ດັງແບບ N95 ຈຳນວນ 400 ລ້ານຊຸດໃຫ້ຊາວອາເມລິກາ ໂດຍຈະກະຈາຍໄປຕາມຮ້ານຂາຍຢາ ແລະ ສູນອະນາໄມໃນຊຸມຊົນທົ່ວປະເທດ ໃຫ້ປະຊາຊົນສາມາດໄປຮັບໄດ້ຟຣີ ເລີ່ມແຕ່ອາທິດໜ້າເປັນຕົ້ນໄປ.
ໂຄງການດັ່ງກ່າວ ເຊິ່ງຖືເປັນໂຄງການແຈກອຸປະກອນປ້ອງກັນສ່ວນບຸກຄົນຄັ້ງໃຫຍ່ສຸດໃນປະຫວັດສາດອາເມລິກາ ມີຂຶ້ນຫລັງຈາກອາທິດຜ່ານມາ ສູນຄວບຄຸມ ແລະ ປ້ອງກັນພະຍາດຂອງອາເມລິກາ (CDC) ອອກມາແນະນຳວ່າ: ຜ້າປິດປາກ-ດັງແບບ N95 ມີປະສິດທິພາບໃນການປ້ອງກັນການແພ່ກະຈາຍເຊື້ອໄວຣັສໄດ້ຫລາຍກວ່າຜ້າປິດປາກ-ດັງແບບທຳມະດາ, ແຕ່ຍັງຢືນຢັນວ່າ: ການໃສ່ຜ້າປິດປາກ-ດັງຊະນິດໃດກໍຕາມຍັງມີຄວາມຈຳເປັນໃນການຊ່ວຍປ້ອງກັນການຕິດເຊື້ອໄວຣັສ.
CDC ລະບຸວ່າ: ການໃສ່ຜ້າປິດປາກ-ດັງແບບ N95 ຈະຕ້ອງໝັ້ນໃຈວ່າຜ້າປິດປາກ-ດັງແນບຊິດກັບໃບໜ້າ ເພື່ອໃຫ້ມີປະສິດທິພາບສູງທີ່ສຸດ ເພາະຖ້າມີຊ່ອງຫວ່າງລະຫວ່າງຜ້າປິດປາກ ແລະ ໃບໜ້າອາດເຮັດໃຫ້ມີອະນຸພາກໄວຣັສຫລຸດລອດ ຫລື ເຂົ້າສູ່ລະບົບທາງເດີນຫາຍໃຈໄດ້.
ນອກຈາກນີ້, CDC ຍັງແນະນຳໃຫ້ຜູ້ທີ່ອາຍຸແຕ່ 2 ປີຂຶ້ນປີ ໃສ່ຜ້າປິດປາກ-ດັງຕະຫລອດເວລາຂະນະຢູ່ພາຍໃນອາຄານທີ່ເປັນພື້ນທີ່ສາທາລະນະ ໂດຍສະເພາະພື້ນທີ່ທີ່ມີການແພ່ລະບາດສູງ ບໍ່ວ່າຈະໄດ້ຮັບການສັກວັກຊີນແລ້ວ ຫລື ຍັງບໍ່ໄດ້ສັກວັກຊີນກໍຕາມ.
ການແຈກຜ້າປິດປາກ-ດັງຫລາຍລ້ານຊຸດໃນຄັ້ງນີ້ເກີດຂຶ້ນໃນຂະນະທີ່ລັດຖະບານຂອງປະທານາທິບໍດີ ໂຈ ໄບເດນ ກຳລັງຜະເຊີນສຽງວິພາກວິຈານຢ່າງໜັກກ່ຽວກັບການຮັບມືການແພ່ລະບາດຂອງໄວຣັສໂອມິຄຣອນ ເຊິ່ງສົ່ງຜົນໃຫ້ອາເມລິກາພົບຜູ້ຕິດເຊື້ອຈຳນວນຫລາຍທົ່ວປະເທດ.
ອ້າງອີງ:
https://www.straitstimes.com/…/us-to-make-400-million…
https://www.cnbc.com/…/biden-will-make-400-million-n95…
