ຜູ້ໄດ້ຮັບບາດເຈັບຈາກຖັງອົກຊີລະເບີດຢູ່ເຂດກໍ່ສ້າງເຂື່ອນນໍ້າງຽບ 1 ພົ້ນຂີດອັນຕະລາຍ ແລ້ວ
ຕາມລາຍງານຈາກເວບໄຊບໍລິສັດນໍ້າງຽບ 1 ໃຫ້ຮູ້ວ່າ: ກໍາມະກອນຊາວຫວຽດນາມສອງຄົນທີ່ໄດ້ຮັບບາດເຈັບຈາກຖັງອົກຊີລະເບີດເມື່ອທ້າຍອາທິດຜ່ານມານັ້ນປັດຈຸບັນແມ່ນພົ້ນຂີດອັນຕະລາຍແລ້ວ.
ບໍລິສັດດັ່ງກ່າວ ລາຍງານວ່າ: ເຫດລະເບີດຂອງຖັງອົກຊີເຈນຄວາມດັນສູງທີ່ເຂື່ອນໃຫຍ່ຂອງໂຄງການກໍ່ສ້າງເຂື່ອນໄຟຟ້ານ້ຳງຽບ 1 ທີ່ເມືອງບໍລິຄັນແຂວງ ບໍລິຄຳໄຊໃນເວລາປະມານ 22:00 ໂມງຂອງວັນທີ 28 ກໍລະກົດຜ່ານມາ, ໄດ້ເຮັດໃຫ້ກຳມະກອນຊາວຫວຽດນາມ 6 ຄົນເສຍຊີວິດ ແລະ ອີກສອງຄົນໄດ້ຮັບບາດເຈັບ ແລະ ອຸປະຕິເຫດດັ່ງກ່າວເກີດຂຶ້ນຂະນະທີ່ກຳມະກອນສອງຄົນກຳລັງເຄື່ອນຍ້າຍຖັງອົກຊີເຈນທີ່ມີຄວາມດັນສູງມາທີ່ເຂດກໍ່ສ້າງເຂື່ອນໃຫຍ່ແລ້ວເກີດລະເບີດຂຶ້ນຢ່າງແຮງເຮັດໃຫ້ກໍາມະກອນທີ່ກໍາລັງເຮັດວຽກຢູ່ຈຸດດັ່ງກ່າວເສຍຊີວິດຄາທີ່ 3 ຄົນ ແລະ ອີກ 3 ຄົນໄປເສຍຊີວິດທີ່ໂຮງໝໍເມືອງປາກຊັນ. ສ່ວນກໍາມະກອນອີກສອງຄົນທີ່ໄດ້ຮັບບາດເຈັບມາຮອດປັດຈຸບັນຄົນຫນຶ່ງແມ່ນພົ້ນຂີດອັນຕະລາຍແລ້ວ ແລະ ໄດ້ກັບມາພັກຟື້ນຢູ່ບ່ອນພັກເຊົາຢູ່ພາກສະໜາມ, ສ່ວນອີກຄົນຫນຶ່ງຍັງຮັກສາຕົວຢູ່ໂຮງໝໍແຕ່ອາການດີຂຶ້ນເປັນລໍາດັບ, ໂດຍຜູ້ເສຍຊີວິດທັງໝົດເປັນກໍາມະກອນຂອງບໍລິສັດຊົງດາ 5 ສສ.ຫວຽດນາມ ເຊິ່ງແມ່ນໜຶ່ງໃນບໍລິສັດຮັບເໝົາຍ່ອຍຂອງໂຄງການກໍ່ສ້າງເຂື່ອນໄຟຟ້າດັ່ງກ່າວ.
ຜູ້ອຳນວຍການບໍລິສັດ ໄຟຟ້ານ້ຳງຽບ 1 ຈຳກັດ ທ່ານ ໂຢຊິຮິໂຣ ຢາມາບາຢາຊິ (Mr. Yoshihiro Yamabayashi) ກ່າວວ່າ: ນີ້ເປັນເຫດການທີ່ເສົ້າສະຫລົດທີ່ສຸດ ແລະ ຂ້າພະເຈົ້າຂໍສະແດງຄວາມເສຍໃຈຢ່າງສຸດຊຶ້ງມາຍັງຄອບຄົວຜູ້ຖືກເຄາະຮ້າຍ ແລະ ນີ້ຖືເປັນຊ່ວງເວລາທີ່ຫຍຸ້ງຍາກທີ່ສຸດສຳລັບທຸກຄົນ,ສ່ວນສາເຫດຂອງອຸປະຕິເຫດຄັ້ງນີ້ແມ່ນຢູ່ໃນຂັ້ນຕອນການສືບສວນ-ສອບສວນຂອງເຈົ້າໜ້າທີ່ ແລະ ການກໍ່ສ້າງໄດ້ຢຸດຊົ່ວຄາວຈົນກວ່າເຫດການຈະກັບມາສູ່ພາວະປົກກະຕິ.
+ເກີດເຫດຖັງອົກຊີລະເບີດໃນເຂດກໍ່ສ້າງເຂື່ອນນໍ້າງຽບ 1 ມີກໍາມະກອນເສຍຊີວິດ 6 ຄົນ
ພິທີຊາປະນະກິດສົບໄດ້ຈັດຂຶ້ນໃນວັນທີ 29 ກໍລະກົດຜ່ານມານີ້ໂດຍມີທ່ານ ເຈົ້າແຂວງບໍລິຄຳໄຊ, ຜູ້ບໍລິຫານຂອງບໍລິສັດໄຟຟ້ານໍ້າງຽບ 1 ແລະ ບັນດາບໍລິສັດຮັບເໝົາ. ສ່ວນສົບຜູ້ເສຍຊີວິດແມ່ນໄດ້ນໍາສົ່ງໄປໃຫ້ຄອບຄົວ ແລະ ຍາດພີ່ນ້ອງຂອງພວກກ່ຽວທີ່ປະເທດຫວຽດນາມ, ພ້ອມທັງໄດ້ມີການລາຍງານກ່ຽວກັບອຸປະຕິເຫດໃຫ້ແກ່ລັດຖະບານ, ບັນດາຜູ້ຖືຫຸ້ນຂອງໂຄງການ ແລະ ຜູ້ທີ່ມີສ່ວນກ່ຽວຂ້ອງຮັບຊາບແລ້ວ.
ເຂື່ອນໄຟຟ້ານ້ຳງຽບ 1 ແມ່ນໂຄງການໄຟຟ້າພະລັງງານນໍ້າທີ່ມີກໍາລັງຕິດຕັ້ງ 290 ເມກາວັດ, ມາຮອດປັດຈຸບັນການກໍ່ສ້າງມີຄວາມຄືບໜ້າຫລາຍກວ່າ 70% ແລະ ຄາດວ່າຈະສໍາເລັດໃນທ້າຍປີ 2018 ແລະ ປະມານ 96% ຂອງກະແສໄຟທີ່ຜະລິດໄດ້ຈະສົ່ງຂາຍໃຫ້ປະເທດໄທ.
