ເອີຣົບສ່ຽງຜະເຊີນພະຍາດລະບາດຊ້ອນ ທັງໄຂ້ຫວັດໃຫຍ່ ແລະ ໂຄວິດ-19 ຈາກການຫລຸດຜ່ອນມາດຕະການ
ຈຳນວນຜູ້ເປັນໄຂ້ຫວັດໃຫຍ່ໃນເອີຣົບເລີ່ມມີທ່າອ່ຽງເພີ່ມສູງຂຶ້ນ ຢ້ານລະບາດຊ້ອນກັບໂຄວິດ-19 ຈົນສົ່ງຜົນຕໍ່ລະບົບສາທາລະນະສຸກ.
ວັນທີ 17 ມັງກອນ 2022, ສຳນັກຂ່າວຣອຍເຕີ (Reuters) ລາຍງານວ່າ: ສູນຄວບຄຸມ ແລະ ປ້ອງກັນພະຍາດແຫ່ງສະຫະພາບເອີຣົບ (ECDC) ພົບຈຳນວນຜູ້ຕິດເຊື້ອໄວຣັສໄຂ້ຫວັດໃຫຍ່ (Influenza) ໃນຈຳນວນທີ່ສູງກວ່າຄາດການໄວ້ ໂດຍເລີ່ມມີທ່າອ່ຽງເພີ່ມຂຶ້ນນັບແຕ່ກາງເດືອນທັນວາຜ່ານມາ.
ຕົວເລກດັ່ງກ່າວເຮັດໃຫ້ເກີດຄວາມກັງວົນວ່າ: ເອີຣົບອາດຜະເຊີນສະພາບພະຍາດລະບາດຊ້ອນ (Twindemic) ທັງຈາກພະຍາດໄຂ້ຫວັດໃຫຍ່ ແລະ ພະຍາດໂຄວິດ-19.
ຕາມລາຍງານລະບຸວ່າ: ມີການກວດພົບຄົນເຈັບຈາກພະຍາດໄຂ້ຫວັດໃຫຍ່ໜ້ອຍຫລາຍໃນຊ່ວງໜ້າໜາວເມື່ອປີກ່ອນ ເຊິ່ງເປັນຜົນມາຈາກການບັງຄັບໃຊ້ມາດຕະການລັອກດາວ, ໃສ່ຜ້າປິດປາກ-ດັງ ແລະ ຮັກສາໄລຍະຫ່າງທາງສັງຄົມ ເຊິ່ງນອກຈາກຈະຊ່ວຍຫລຸດການລະບາດຂອງໂຄວິດ-19 ແລ້ວ ຍັງເປັນການປ້ອງກັນບໍ່ໃຫ້ໄຂ້ຫວັດໃຫຍ່ລະບາດນຳອີກ.
ເຖິງຢ່າງໃດກໍຕາມ, ໃນຕອນນີ້ຫລາຍປະເທດຕັດສິນໃຈຫລຸດຜ່ອນມາດຕະການ ເຮັດໃຫ້ເລີ່ມເຫັນຈຳນວນຜູ້ເປັນໄຂ້ຫວັດໃຫຍ່ເພີ່ມຂຶ້ນ ໂດຍໃນອາທິດສຸດທ້າຍຂອງປີ 2021 ທາງ ECDC ແລະ ອົງການອະນາໄມໂລກ (WHO) ເປີດເຜີຍວ່າ: ມີຜູ້ເປັນໄຂ້ຫວັດໃຫຍ່ທີ່ຕ້ອງເຂົ້າຮັບການປິ່ນປົວໃນຫ້ອງໄອຊີຢູ 43 ຄົນ.
ຖ້ານຳໄປປຽບທຽບໃສ່ໄລຍະປີ 2018 ກ່ອນການລະບາດຂອງພະຍາດໂຄວິດ-19 ຍັງຖືວ່າມີຈຳນວນຜູ້ເປັນໄຂ້ຫວັດໃຫຍ່ທີ່ເຂົ້າໄອຊີຢູໜ້ອຍກວ່າປີດັ່ງກ່າວ ທີ່ເຄີຍມີຈຳນວນຫລາຍທີ່ສຸດເຖິງ 400 ຄົນ.
ແຕ່ຖ້າທຽບໃສ່ປີ 2020 ທີ່ມີຜູ້ເປັນເຂົ້າໄອຊີຢູພຽງ 1 ຄົນໝົດເດືອນທັນວາ ເທົ່າກັບວ່າຈຳນວນຜູ້ເປັນໃນຕອນນີ້ເພີ່ມສູງຂຶ້ນຫລາຍ.
ອີກບັນຫາໜຶ່ງທີ່ທາງເອີຣົບກຳລັງຜະເຊີນຢູ່ ຄືຄວາມຜິດພາດໃນການຄາດການສາຍພັນທີ່ລະບາດໃນປີນີ້.
ປົກກະຕິແລ້ວ ຜູ້ຜະລິດວັກຊີນຈະມີການປະເມີນຂໍ້ມູນແບບປີຕໍ່ປີ ເພື່ອວິເຄາະວ່າຈະຕ້ອງໃຊ້ວັກຊີນຊະນິດໃດໃນການຮັບມືກັບສາຍພັນທີ່ຄາດວ່າຈະລະບາດໃນປີຕໍ່ໄປ ໂດຍຈະມີການສະຫລຸບລ່ວງໜ້າ 6 ເດືອນກ່ອນຈະຮອດລະດູຂອງການລະບາດ.
ແຕ່ການທີ່ປີກ່ອນບໍ່ມີການລະບາດຂອງໄຂ້ຫວັດໃຫຍ່ເກີດຂຶ້ນ ເຮັດໃຫ້ຜູ້ຜະລິດມີຂໍ້ມູນບໍ່ພຽງພໍໃນການກຽມວັັກຊີນໄວ້ຮອງຮອບກັບສາຍພັນທີ່ກຳລັງລະບາດໃນຊ່ວງນີ້.
ພາຊີ ເພດຕິເນນ ຜູ້ຊ່ຽວຊານດ້ານພະຍາດໄຂ້ຫວັດໃຫຍ່ຂອງ ECDC ເປີດເຜີຍວ່າ: ໄຂ້ຫວັດໃຫຍ່ສາຍພັນທີ່ລະບາດໃນປີນີ້ຄືຊະນິດ A ສາຍພັນ H3 ແຕ່ວັກຊີນທີ່ໃຊ້ໃນປີນີ້ພັດບໍ່ແມ່ນສູດທີ່ຮັບມືກັບ H3 ໄດ້ດີທີ່ສຸດ.
ສຳລັບກໍລະນີຮ້າຍແຮງທີ່ສຸດ ຄືການທີ່ມີຜູ້ເປັນໄຂ້ຫວັດໃຫຍ່ຕ້ອງໃຊ້ຫ້ອງໄອຊີຢູເພີ່ມຂຶ້ນ ແລະ ເຊື້ອໂຄວິດ-19 ສາຍພັນໂອມິຄຣອນຍັງແພ່ລະບາດ ອາດເຮັດໃຫ້ລະບົບສາທາລະນະສຸກໃນເອີຣົບບໍ່ສາມາດຮັບມືການຊ່ວຍເຫລືອຄົນເຈັບອາການໜັກຈາກທັງ 2 ພະຍາດພ້ອມກັນໄດ້.
ອ້າງອີງ:
https://www.reuters.com/…/return-flu-eu-faces-threat…/
