ໂຄງການປັບປຸງການຄຸ້ມຄອງການລົງທຶນຂອງລັດສອດຄ່ອງກັບການປະຕິຮູບວຽກງານງົບປະມານ ເປັນຕົ້ນ ການສ້າງແຜນງົບປະມານໄລຍະກາງ ຕາມກໍານົດໃນຮ່າງດໍາລັດວ່າດ້ວຍການສ້າງແຜນງົບປະມານ
ໃນວັນທີ 14 ມັງກອນ 2021 ໄດ້ຈັດກອງປະຊຸມ ລາຍງານຄວາມຄືບໜ້າໂຄງການປັບປຸງການຄຸ້ມຄອງການລົງທຶນຂອງລັດ (JICA-PIMCAP) ຕໍ່ຮອງລັດຖະມົນຕີກະຊວງການເງິນ (ຜ່ານວີດີໂອທາງໄກ) ໂດຍການເປັນປະທານ ຂອງ ປອ ພູທະນູເພັດ ໄຊສົມບັດ ຮອງລັດຖະມົນຕີກະຊວງການເງິນ, ທັງເປັນຮອງປະທານຄະນະຊີ້ນໍາປັບປຸງການຄຸ້ມຄອງການລົງທຶນຂອງລັດ, ມີທ່ານ ກະລຸນາ ນັນທະວົງດວງສີ, ຮອງຫົວໜ້າກົມແຜນການ, ກະຊວງແຜນການ ແລະ ການລົງທຶນ, ມີ ທ່ານ ອິຈິໂຣະ ໂອະຄຸມຸຣະ ຫົວໜ້າທີ່ປຶກສາໂຄງການ PIMCAP, ທ່ານ ໂທມິຕະ ໂນຣິຟຸມິ, ຜູ້ປະສານງານໂຄງການ ປະຈໍາອົງການ JICA ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.
ໃນພິທີທ່ານ ອິຈິໂຣະ ໂອະຄຸມຸຣະ ຫົວໜ້າທີ່ປຶກສາໂຄງການ PIMCAP, ຍັງໄດ້ລາຍງານໂດຍຫຍໍ້ກ່ຽວກັບສະພາບລວມ ແລະ ຄວາມຄືບໜ້າໃນການພັດທະນາແຜນດຳເນີນງານ PIM ແຕ່ປີ 2022-2030 (ສະບັບຮ່າງ 1.1), ແລະ ລາຍງານສະພາບລວມຂອງແຜນການລົງທຶນລັດທີ່ເປັນບູລິມາສິດໄລຍະ 3 ປີລວມທັງເຄື່ອງມືອື່ນໆ.
ໂອກາດດັ່ງກ່າວ ທ່ານ ປອ ພູທະນູເພັດ ໄຊສົມບັດ ຮອງລັດຖະມົນຕີກະຊວງການເງິນຍັງໄດ້ມີຄຳເຫັນ ແລະ ຊີ້ນຳຕໍ່ກອງປະຊຸມ ເຫັນວ່າຜົນສຳເລັດຫຼາຍດ້ານຕໍ່ວຽກງານ ທີ່ກົມແຜນການ ແລະ ຊ່ຽວຊານໂຄງການ ໄດ້ບັນລຸ ແລະ ເຫັນວ່າ ໂຄງການດັ່ງກ່າວ ແມ່ນສອດຄ່ອງກັບການປະຕິຮູບວຽກງານງົບປະມານ ເປັນຕົ້ນ ການສ້າງແຜນງົບປະມານໄລຍະກາງ ຕາມກໍານົດໃນຮ່າງດໍາລັດວ່າດ້ວຍການສ້າງແຜນງົບປະມານ. ພ້ອມນັັ້ນ, ຍັງຈະສາມາດຊ່ວຍໃຫ້ກະຊວງການເງິນ ປັບປຸງກ່ຽວກັບການຄຸ້ມຄອງການຊໍາລະພັນທະງົບປະມານລົງທຶນ ແລະ ໜີ້ສິນ.
ສຳລັບການຮັບຮອງ ແຜນດຳເນີນງານໂຄງການ (Action Plan) ການຄຸ້ມຄອງການລົງທຶນຂອງລັດ ແລະ ແຜນລົງທຶນຂອງລັດທີ່ເປັນບູລິມະສິດໄລຍະ 3 ປີ ທີ່ຈະມີຂຶ້ນໃນເດືອນກຸມພາ 2022, ເຫັນດີໃຫ້ມີການກໍານົດລາຍຊື່ຜູ້ປະສານງານຝ່າຍກະຊວງການເງິນ (ກົມງົບປະມານແຫ່ງລັດ, ກົມນະໂຍບາຍການເງິນ, ຄັງເງິນແຫ່ງຊາດ, ກົມຄຸ້ມຄອງໜີ້ສິນສາທາລະນະ, ກົມປະຕິຮູບລັດວິສາຫະກິດ ແລະ ການປະກັນໄພ) ໃນການຄົ້ນຄ້ວາ ແລະ ວິໄຈ ແຜນດຳເນີນງານໂຄງການ ທີ່ກຳລັງດຳເນີນການຮ່າງແຜນດຳເນີນງານດັ່ງກ່າວ ວ່າກະຊວງການເງິນຍັງຕ້ອງການທີ່ຈະໄດ້ປັບປຸງຈຸດໃດເພີ່ມຕື່ມເຊັ່ນ: ການປັບປຸງດ້ານນິຕິກຳ, ກົນໄກການຄຸ້ມຄອງ, ການເຊື່ອມຈອດຂໍ້ມູນຂ່າວສານ (interface), ການສະຫລຸບລາຍງານ, ການປະເມີນຜົນແຕ່ລະໂຄງການການລົງທຶນ.
ຫວັງຢ່າງຍິ່ງວ່າ ຄະນະວິຊາການຂອງທັງສອງກະຊວງ ແລະ ຜູ້ຮັບຜິດຊອບໂຄງການ ຈະຮ່ວມມືກັນ, ຖອດຖອນບົດຮຽນ ແລະ ປະສານສົມທົບ ລົງລາຍລະອຽດ ໃຫ້ມີຄວາມຊັດເຈນ ເພື່ອເຮັດໃຫ້ການປະຕິຮູບການລົງທຶນຂອງລັດ ເຂົ້າສູ່ລວງເລິກ ແລະ ມີກົນໄກໃນການຕິດຕາມ, ຖອດຖອນບົດຮຽນ ແລະ ປະເມີນໂຄງການ ໃຫ້ມີປະສິດທິຜົນຫຼາຍຂຶ້ນ, ເຊື່ອໝັ້ນວ່າ ພາຍໃຕ້ການຮ່ວມມືກັນຢ່າງສະໜິດແໜ້ນ ລະຫວ່າງເຈົ້າຂອງໂຄງການ ແລະ ສອງກະຊວງຈະເຮັດໃຫ້ວຽກງານດັ່ງກ່າວປະສົມຜົນສຳເລັດຕາມລະດັບຄາດໝາຍ.
