ແມັກໄກວ ຫລື ໂຣນັລໂດ, ຣັງນິກ ຢືນຢັນຊັດເຈນ ຫລັງແຟນບານແມນຢູ ຮຽກຮ້ອງໃຫ້ປ່ຽນຫົວຫນ້າທີມ

ຣາຟ ຣັງນິກ ຜູ້ຈັດການທີມຊົ່ວຄາວຂອງ ແມນເຊສເຕີ ຢູໄນເຕັດ ໃຫ້ສຳພາດກ່ອນເກມພຣີເມຍລີກ ອັງກິດ ທີ່ຈະອອກໄປຢາມ ແອສຕັນ ວິລລາ ໃນຄືນວັນທີ 15 ມັງກອນ 2022 ນີ້ ເວລາ 00:30 ນາທີ (ເວລາໃນລາວ) ຫລັງເກີດກະແສຮຽກຮ້ອງຈາກແຟນບານແມນຢູ ໃຫ້ປ່ຽນຫົວຫນ້າທີມມາເປັນ ຄຣິສຕຽນໂນ ໂຣນັລໂດ ທີ່ໄລຍະຫລັງໆໄດ້ສວມປອກແຂນຫົວຫນ້າທີມແທນ ແຣຣີ ແມັກໄກວ ທີ່ມີອາກາດບາດເຈັບ.

ໂດຍ ໂຣນັລໂດ ອາຍຸ 36 ປີ ຫາກໍໃຫ້ສຳພາດຢ່າງກົງໄປກົງມາກັບ ສະກາຍ ສະປອດ ວ່າ ແມນຢູ ຄວນຍັກລະດັບການຫລິ້ນ ແລະ ປັບປຸງທັດສະນະຄະຕິຂອງເພື່ອນຮ່ວມທີມບາງຄົນໃຫ້ຫັນມາຍອມຮັບຄຳວິຈານພາຍໃນທີມ ເພື່ອເປົ້າຫມາຍການຕິດອັນດັບ 1 ໃນ 3 ຂອງພຣີເມຍລີກ ຫລາຍກວ່າທີ່ຈະຈົບລະດູການແບບມືເປ່ົາ ເຊິ່ງບຸກຄະລິກນີ້ເຮັດໃຫ້ແຟນບານເກີດຄວາມປະທັບໃຈ ແລະ ຢາກເຫັນຍອດດາວຍິງທີມຊາດໂປຣຕຸເກສ ເຮັດຫນ້າທີມຫົວຫນ້າທີມແທນ ແມັກໄກວ ແບບຖາວອນ.

ແຕ່ຫລ້າສຸດ ຣັງນິກ ອອກມາໃຫ້ສຳພາດເຖິງເລື່ອງດັ່ງກ່າວວ່າ : ‘‘ ຕອນນີ້ຂ້ອຍຍັງບໍ່ເຫັນເຫດຜົນທີ່ຈະເຮັດແບບນັ້ນ ເພາະ ແຮຣີ ເປັນຫົວຫນ້າທີມມາຍາວນານ ແລະ ເມື່ອໃດທີ່ລາວຍັງລົງສະຫນາມ ລາວກໍຍັງເປັນຫົວຫນ້າທີມຄືເກ່ົາ ແລະ ຖ້າລາວບໍ່ໄດ້ລົງຫລິ້ນ ເຮົາກໍຈະໃຫ້ຄົນອື່ນເຮັດຫນ້າທີ່ແທນ ນີ້ເປັນການປ່ຽນແປງແບບນັດຕໍ່ນັດ ຂຶ້ນຢູ່ກັບວ່າໃຜທີ່ໄດ້ລົງສະຫນາມ ’’.

‘‘ ໂຣນັລໂດ ບໍ່ແມນຄົນດຽວທີ່ເປັນຜູ້ຫລິ້ນອາວຸໂສຂອງທີມ ຍັງມີ ຄາວານີ, ເດ ເຄອາ, ລິນເດເລີບ, ເຟີນານເດສ ເຮົາມີນັກເຕະທີ່ມີປະສົບການຫລາຍຈຳນວນຫລາຍພໍ ພວກເຮົາບໍ່ໄດ້ເປັນພຽງແບບຢ່າງໃຫ້ກັບຄົນອື່ນໆໃນການເຝິກຊ້ອມ, ໃນສະຫນາມ ໃນການແຂ່ງຂັນຕ່າງໆ ແຕ່ຍັງເປັນແບບຢ່າງໃນການສົນທະນາພາຍໃນຫ້ອງແຕ່ງຕົວ ຫລື ແມ່ນແຕ່ເວລາຢູ່ນຳກັນໃນໂຮງແຮມ ທັງໃນເກມຢາມ ຫລື ເກມໃນບ້ານ ’’.

‘‘ ນັ້ນຄືສິ່ງທີ່ເກີດຂຶ້ນໂດຍອັດຕະໂນມັດພາຍໃນທີມ ເຊິ່ງຂ້ອຍເຮັດໄດ້ພຽງເຊີນຊວນ, ທ້າທາຍ ແລະ ບອກຜູ້ຫລິ້ນທຸກຄົນ ລວມເຖິງເຫລົ່ານັກເຕະອາວຸໂສໃຫ້ເຮັດສິ່ງນັ້ນເປັນປະຈຳ ເພາະສິ່ງນັ້ນຊ່ວຍໄດ້ຫລາຍໃນທີມທີ່ເຮົາມີຢູ່ໃນປັດຈຸບັນ ’’.