ກັນດີກວ່າແກ້ ບັດເປັນແທ້ ການແກ້ບໍ່ທົ່ວ

ໜ້າທີ່, ຄວາມຮັບຜິດຊອບ ແລະ ຄວາມເປັນເຈົ້າການຂອງທົ່ວປວງຊົນ ເປັນປັດໄຈຕັດສິນຊີ້ຂາດເພື່ອຕ້ານການລະບາດພະຍາດໂຄວິດ-19 ແລະ ແນວໃດກໍດີເຖິງວ່າພວກເຮົາໄດ້ເຮັດແທ້, ແຕ່ມາເຖິງປັດຈຸບັນຜູ້ຕິດພະຍາດໂຄວິດ-19 ພາຍໃນຍັງມີຫລາຍ ແລະ ແພ່ລາມເປັນວົງກວ້າງ ຊຶ່ງເປັນການສົ່ງສັນຍານບອກ ໃຫ້ຮູ້ວ່າ: ຖ້າພວກເຮົາບໍ່ປະຕິບັດມາດຕະການຕ່າງໆຢ່າງເອົາການເອົາງານແທ້ ຫລື ພາກັນຕີຖອຍ ແລະ ລະເຫລີງກໍບໍ່ມີທ່າທີວ່າມັນຈະຢຸດໜ້ອຍຖອຍລົງ ເນື່ອງຈາກບໍ່ມີອາການສະແດງ ພວກເຮົາຈຶ່ງບໍ່ສາມາດຮູ້ວ່າ ເຊື້ອພະຍາດບົ່ມຊ່ອນຢູ່ໃສ, ນຳໃຜ ແລະ ນີ້ຄືສິ່ງດຽວທີ່ສາມາດຕັດວົງຈອນການລະບາດນີ້ໄດ້ຕ້ອງປະຕິບັດຕາມມາດຕະການຕ່າງໆທີ່ຂັ້ນເທິງວາງອອກ, ຄຳແນະນຳຂອງຄະນະສະເພາະກິດຂັ້ນຕ່າງໆລວມເຖິງການປະຕິບັດມາດຕະການປ້ອງກັນໂຕເອງ ໂດຍການຮັກສາໄລຍະຫ່າງ, ຢຸດຊຸມແຊວ, ບໍ່ໄປສະຖານທີ່ຊຸມຊົນແອອັດ ທີ່ສ່ຽງຕິດເຊື້ອທີ່ສຸດ, ໝັ່ນລ້າງມື, ໃສ່ຜ້າອັດປາກ-ດັງ ແລະ ອື່ນໆ.

ຢ້ອນໄປເບິ່ງການຖະແຫລງຂ່າວແຕ່ລະວັນຂອງຄະນະສະເພາະກິດວ່າ: ປັດຈຸບັນໜ້າເປັນຫ່ວງຫລາຍຫລັງຍັງເຫັນວ່າຢູ່ຫລາຍບ້ານ, ຫລາຍເມືອງ ໃນນະຄອນຫລວງວຽງຈັນ ແລະ ແຂວງອື່ນໆ ຍັງມີບຸກຄົນ, ກຸ່ມຄົນ ຈຳນວນບໍ່ໜ້ອຍ ຖືເບົາການຈຳກັດບໍລິເວນຕົນເອງຢູ່ເຮືອນ. ຂະນະທີ່ຫາງສຽງຂອງສັງຄົມທົ່ວໄປ ຍັງເຫັນການຕັ້ງຈັບກຸ່ມຊຸມແຊວກັນກິນເຂົ້າ, ດື່ມເຫລົ້າດື່ມເບຍ ຢ່າງສະບາຍກັນຢູ່ ຊຶ່ງສະພາບນີ້ແນ່ນອນມັນຄືສາເຫດໜຶ່ງຂອງການຕິດ ແລະ ແພ່ເຊື້ອເປັນພຶງເປັນແພ ທັງເປັນການຝືນກົດຫ້າມຂອງຂັ້ນເທິງ ກໍຄືຄະນະສະເພາະກິດ ໂດຍສະເພາະຫລັກວິຊາການແພດທີ່ອັນຕະລາຍທີ່ສຸດ. “ ຖ້າພວກເຮົາຍັງຖືເບົາແລະ ພາກັນຈັດຕັ້ງກຸ່ມຊຸມແຊວ ແບບບໍ່ຢ້ານຄືແນວນີ້ ຄວາມສ່ຽງການຕິດ ແລະ ແພ່ເຊື້ອຈະມີຫລາຍທີ່ສຸດ ຈົນເຖິງຂັ້ນລົ້ນໂຮງໝໍ, ແພດໝໍຜູ້ປິ່ນປົວຈະຮັບມືບໍ່ໄຫວເນື່ອງຈາກເຫລັກຫລາຍກວ່າຖ່ານ. ຂະນະທີ່ເຄື່ອງມື, ອຸ ປະກອນການປິ່ນປົວ ກໍຈະບໍ່ພຽງພໍ ສຸດທ້າຍຈະມີຜູ້ເສຍຊີວິດຈຳນວນຫລາຍ ດັ່ງທີ່ເຫັນມາແລ້ວ” ແພດໝໍ ທີ່ເພິ່ນປິ່ນປົວຕັກເຕືອນໃນບັນຫານີ້.

ມາເຖິງເວລານີ້, ພວກເຮົາທຸກຄົນ ໂດຍສະເພາະຜູ້ທີ່ຍັງຖືເບົາຕໍ່ມາດຕະການປ້ອງກັນ ຂໍໃຫ້ປ່ຽນພຶດຕິກຳທີ່ມີຄວາມສ່ຽງ ມາດຳລົງຊີວິດໃນຮູບແບບໃໝ່ ທີ່ປອດໄພບໍ່ຕິດເຊື້ອ ໂດຍປະຕິບັດມາດຕະການປ້ອງກັນຕົນເອງ, ຄອບຄົວ ແລະ ສັງຄົມ ຢ່າງເຂັ້ມງວດ. ຜູ້ໃດບໍ່ທັນໄດ້ສັກວັກຊິນປ້ອງກັນໂຄວິດ-19 ກໍໃຫ້ຮີບຮ້ອນໄປສັກ ເພື່ອສ້າງພູມຕ້ານທານໃຫ້ຕົນເອງ ແລະ ທຸກຄົນໃນຄອບຄົວ ຈຶ່ງຈະສາມາດຢຸດການແພ່ລະບາດຂອງພະຍາດນີ້ໄດ້ໂດຍໄວ.