ມີສະຕິ ຮ່ວມກັນບໍ່ໃຫ້ເກີດອັກຄີໄພໃນລະດູແລ້ງ
ອາກາດຢູ່ບ້ານເຮົາໜາວແດ່ເຢັນພ້ອມ ແລະ ໄລຍະນີ້ກໍແມ່ນໄລຍະແຫ້ງແລ້ງ ຊຶ່ງມັກເກີດອັກຄີໄພ ໂດຍ ສະເພາະບັນຫາໄຟໄໝ້ເຮືອນຊານງ່າຍທີ່ສຸດ ຖ້າພວກເຮົາ ບໍ່ລະມັດລະວັງໃຊ້ໄຟຟ້າ-ຟືນໄຟໃນການດຳລົງຊີວິດປະຈຳວັນ. ຂະນະທີ່ບັນຫາໄຟໄໝ້ລາມປ່າ ກໍເກີດງ່າຍເຊັ່ນດຽວກັນຖ້າຂາດສະຕິ ເມື່ອຈູດປ່າຫຍ້າຢູ່ສວນ, ໄຮ່ ຫລື ຄັັງສັດ ໂດຍບໍ່ພາກັນຕັດແລວໄຟ.
ແຕ່ລະປີເມື່ອກ້າວສູ່ລະດູແລ້ງ, ບັນຫາອັກຄີໄພມັກມີໃຫ້ເຫັນຢ່າງຕໍ່ເນື່ອງ ຊຶ່ງຊີ້ໃຫ້ເຫັນເຖິງການຂາດສະ ຕິໃນການຊົມໃຊ້ໄຟຟ້າໂດຍສາເຫດຕົ້ນໆກໍຄືຄວາມຜິດພາດດ້ານເຕັກນິກ, ໄຟຟ້າລັດວົງຈອນ ແລະອື່ນໆ. ດ້ານໜຶ່ງ ກໍ່ເປັນຍ້ອນສະພາບອາກາດໃນປັດຈຸບັນຢູ່ບາງທ້ອງຖິ່ນໜາວ, ບາງທ້ອງຖິ່ນພັດຮ້ອນອົບເອົ້າໃນ ຕອນບ່າຍຈຶ່ງພາໃຫ້ເກີດອັກຄີໄພໄດ້ງ່າຍເມື່ອຂາດສະຕິ ດັ່ງເຫັນໃນສື່ອອນລາຍທີ່ໄດ້ເຜີຍແຜ່ພາບໄຟໄໝ້ ເຮືອນສ້າງເສຍຫາຍບໍ່ໜ້ອຍ.
ໃນຄວາມເປັນຈິງແລ້ວບໍ່ມີໃຜຢາກໃຫ້ເກີດບັນຫານີ້ ແລະ ການທີ່ຈະບໍ່ໃຫ້ມັນເກີດຂຶ້ນອີກ, ທຸກຊັ້ນຄົນໃນສັງຄົມ ຕ້ອງເອົາໃຈໃສ່ຊົມໃຊ້ໄຟຟ້າ-ຟືນໄຟຢ່າງລະມັດລະວັງ ສາຍໄຟເສັ້ນໃດເກົ່າ ກໍປ່ຽນໃໝ່ ແລະ ໃຊ້ໃຫ້ຖືກຕາມມາດຖານເຕັກນິກຂອງລະບົບໄຟຟ້າ, ການໄຕ້ທຽນຈູດທູບບູຊາ ກໍຕ້ອງມີສະຕິແທ້ໆ ໄຫວ້ພະບູ ຊາແລ້ວ ພໍມອດໄຟທຽນກໍມອດ, ການໃຊ້ຖ່ານໃຊ້ຟືນໃຊ້ຫລົວ ດັງໄຟແຕ່ງຢູ່ຄົວກິນ ເມື່ອເຮັດແລ້ວກໍມອດ ໃຫ້ຄັກແນ່ ຫລື ການໃຊ້ເຕົາກ໊າສກໍດັ່ງດຽວກັນ ຫລີກເວັ້ນແທ້ໆບໍ່ໃຫ້ລູກຫລານທີ່ຍັງບໍ່ທັນຮູ້ພໍ ໄປເຮັດເດັດ ຂາດ ບັນຫາອັກຄີໄພ ທີ່ສົ່ງຜົນກະທົບຕໍ່ຊັບສິນ ຊີວິດທີ່ແສນປະເສີດຂອງພວກເຮົາເຈົ້າຂ້ອຍກໍຈະບໍ່ເກີດແນ່ນອນ ວ່າແລ້ວກໍຄືການມີສະຕິ ລະມັດລະວັງແທ້ໆນັ້ນເອງ ຊ່ວຍໆກັນນໍ.
