ຢໍໂຄວິດ ຖືກຍົກເລີກວີຊາ ຄັ້ງທີ 2 ອາດຫມົດສິດປ້ອງກັນແຊ໊ມອອສເຕຣລຽນ ໂອເພັນ

ບັນຫາລະຫວ່າງນັກເທັນນີສຊາຍດ່ຽວມື 1 ຂອງໂລກກັບ ອອສເຕຣລຽນ ຍັງບໍ່ຈົບ ຫລ້າສຸດທາງການໃຊ້ອຳນາດຍົກເລີກວີຊາກ່ອນເປີດສາກການແຂ່ງຂັນເທັນນິສ ແກຣນສະແລມ ທຳອິດຂອງປີ.

ສຳລັບນັກຂ່າວ ບີບີຊີ ລາຍງານວ່າ ທາງການອອສເຕຣເລຍ ໂດຍ ອາເລັກ ຮອກ ລັດຖະມົນຕີປະຈຳສຳນັກງານກວດຄົນເຂົ້າເມືອງອອກມາຖະແຫລງວ່າ :  ‘‘  ມື້ນີ້ຂ້ອຍໄດ້ໃຊ້ອຳນາດຕາມມາດຕາ 133 ຊີ ແຫ່ງພະລາດຊະບັນຢັດຄົນເຂົ້າເມືອງ ເພື່ອຍົກເລີກວີຊາຂອງ ມິສຕີ ໂນວັກ ຢໍໂຄວິດ ດ້ວຍເຫດຜົນດ້ານສຸຂະພາບ ແລະ ຄວາມສະຫງົບຮຽບຮ້ອຍ ອັນເປັນເຮັດເພື່ອປະໂຫຍດສ່ວນລວມ ’’.

ນັກເທັນນິສມື 1 ຂອງໂລກ ປະເພດຊາຍດ່ຽວ ຊາວເຊີເບຍ ຖືກຍົກເລີກວີຊາຄັ້ງທຳອິດເມື່ອວັນທີ 6 ມັງກອນ ຫລັງເດີນທາງມາເຖິງ ອອສເຕຣເລຍ ເພື່ອລົງແຂ່ງຂັນເທນນິສແກຣນສະແລມ ທຳອິດຂອງປີ ລາຍການອອສເຕຣເລຍ ໂອເພັນ 2022 ເຊິ່ງຈະເປີດສາກໃນວັນທີ 17 ມັງກອນນີ້ ເນື່ອງຈາກບໍ່ໄດ້ຂໍວີຊາທີ່ອະນຸຍາດໃຫ້ໄດ້ຮັບການຍົກເວັ້ນທາງການແພດຕາມຂໍ້ກຳນົດຂອງກອງກຳລັງຮັກສາຊາຍແດນອອສເຕຣເລຍ ເຖິງວ່າຈະໄດ້ສິດຍົກເວັ້ນຈາກຝ່າຍຈັດສຳລັບນັກເທັນນິສທີ່ຍັງບໍ່ໄດ້ສີກວັກຊີນໂຄວິດ-19.

ຈາກນັ້ນທີມກົດຫມາຍຂອງ ໂນວັກ ຢໍໂຄວິດ ໄດ້ຍື່ນອຸທອນ ແລະ ຂໍສູ້ຄະດີໃນຊັ້ນສານ ເຮັດໃຫ້ນັກເຕະເທັນນິສອາຍຸ 34 ປີ ໄດ້ສິດຢູ່ຕໍ່ເປັນການຊົ່ວຄາວ ກ່ອນທີ່ສານຈະຕັດສິນໃຈ ຢໍໂຄວິດ ສາມາດເຂົ້າປະເທດອອສເຕຣເລຍໄດ້ໃນວັນຈັນທີ 10 ມັງກອນ ເນື່ອງຈາກໄດ້ຮັບການຍົກເວັ້ນໂດຍຝ່າຍຈັດການແຂ່ງຂັນເຊິ່ງເກີດຈາກການຕິດຕໍ່ປະສານງານກັບລັດວິກຕໍເຣຍ ເຊິ່ງເປັນສະຖານທີ່ຈັດການແຂ່ງຂັນ ອອສເຕຣລຽນ ໂອເພັນ.

ແນວດກໍຕາມ ການປ່ອຍໃຫ້ ຢໍໂຄວິດ ທີ່ຍັງບໍ່ສີດວັກຊີໂຄວິດ-19 ຕາມມາດຕາການອັນເຂັ້ມງວດຂອງອອສເຕຣເລຍໄດ້ອະນຸຍາດໃຫ້ເຂົ້າປະເທດໄດ້ເກີດກະແສຕໍ່ຕ້ານຈາກປະຊາຊົນໃນປະເທດ ກ່ອນທີ່ທາງການຈະໃຊ້ອຳນາດຍົກເລີກວີຊາຂອງ ຢໍໂຄວິດ ເປັນຄັ້ງທີ 2 ເຊ່ິງອາດເຮັດໃຫ້ ຢໍໂຄວິດ ຖືກສົ່ງຕົວກັບປະເທດເຊີເບຍ ຕາມກົດຫມາຍນຳອີກ.

ແຕ່ທີມກົດຫມາຍຂອງ ຢໍໂຄວິດ ຍັງສາາດຍື່ນອຸທອນໄດ້ອີກເທື່ອຫນຶ່ງ ເພື່ອຂໍຢູ່ໃນປະເທດອອສເຕຣເລຍ ໂດຍ ຢໍໂຄວິດ ຫວັງປ້ອງກັນແຊ໊ມອອສເຕຣເລຍ ໂອເພັນ ທີ່ຕົວເອງເປັນແຊ໊ມເກ່ົາເມື່ອປີກາຍ ແລະ ພວມຫວັງສ້າງສະຖິຕິຄວ້າແຊ໊ມແກຣນສະແລມສູງສຸດເປັນສະໄຫມທີ 21 ແຊງ ໂຣເຈີ ເຟເດີເຣີ ແລະ ຣາຟາເອລ ນາດາລ ທີ່ເຮັດໄວ້ 20 ສະໄຫມເທົ່າກັນ.

ແຕ່ຫາກ ຢໍໂຄວິດ ສູ້ຄະດີບໍ່ສຳເລັດກໍມີທ່າອ່ຽງທີ່ລາວຈະຖືກຫ້າມເຮັດວີຊາໃຫມ່ສຳລັບເຂົ້າປະເທດອອສເຕຣເລຍເປັນເວລາ 3 ປີ ເຖິງວ່າຈະໄດ້ສິດຍົກເວັ້ນແບບດຽວກັບທີ່ເຄີຍໄດ້ຮັບກ່ອນການເດີນທາງມາໃນຄັ້ງນີ້ກໍຕາມ.