ຄົມມະນາຄົມສະດວກ ເປັນເງື່ອນໄຂການພັດທະນາເສດຖະກິດ-ສັງຄົມ
ປັດຈຸບັນ, ປວງຊົນລາວທັງຊາດ ຕ່າງກໍພູມໃຈທີ່ເຫັນປະເທດຊາດພັດທະນາກ້າວກະໂດດ ຊີວິດການເປັນຢູ ດີຂຶ້ນຢ່າງຈະແຈ້ງ ຊຶ່ງເປັນຜົນມາຈາກການໄດ້ຮັບອານິສົງການກ້າວກະໂດດຂອງລະບົບຄົມມະນາຄົມບໍ່ວ່າຈະເປັນການຄົມມະນາຄົມທາງນໍ້າ, ທາງບົກ ແລະ ທາງອາກາດ. ທີ່ສຳຄັນການເຮັດໄດ້ແບບນີ້ສອງແສງໃຫ້ເຫັນເຖິງຄວາມຕັ້ງໃຈປະຕິບັດຕາມທິດຊີ້ນຳຂອງປະທານ ໄກສອນ ພົມວິຫານ ທີ່ວ່າ: “ ການຄົມ ມະນາຄົມຂົນສົ່ງ ເປັນພາກສ່ວນທີ່ສໍາຄັນ ໃນໂຄງປະກອບໂຄງລ່າງ ເເຫ່ງການຜະລິດຂອງເສດຖະກິດແຫ່ງຊາດ, ຖືເອົາການຄົມມະນາຄົມຂົນສົ່ງ ເປັນປາຍເເຫລມ, ມີແຕ່ປະຕິບັດແນວທາງດັ່ງກ່າວໃຫ້ສໍາເລັດເທົ່ານັ້ນ ພວກເຮົາຈຶ່ງຈະສາມາດຂຸດຄົ້ນ ຄວາມອາດສາມາດບົ່ມຊ້ອນດ້ານເສດຖະກິດ ທີ່ອຸດົມຮັ່ງມີຢູ່ໃນບໍລິເວນຕ່າງໆຂອງປະເທດເຮົາໄດ້…
ນັບແຕ່ປີ 1975 ເປັນຕົ້ນມາ ເລີ່ມຈາກແນວທາງພື້ນຖານຂອງພັກເຮົາທີ່ວ່າ “ວຽກງານຄົມມະນາຄົມເປັນປາຍແຫລມໃຫ້ແກ່ການພັດທະນາປະເທດຊາດ” ຈາກນີ້ວຽກງານນີ້ຈຶ່ງໄດ້ຮັບການປັບປຸງ ແລະ ຂະຫຍາຍ ຕົວຢ່າງຕໍ່ເນື່ອງ ທັງສາມາດ ເຊື່ອມຕໍ່ກັບອະນຸພາກພື້ນ, ເສັ້ນທາງແລວເສດຖະກິດຕາເວັນອອກ-ຕາເວັນ ຕົກ, ເໜືອ-ໃຕ້, ເຂດຈຸດສຸມ, ທຸກແຂວງ, ທຸກເມືອງ, ບ້ານ ແລະ ກຸ່ມບ້ານມີເສັ້ນທາງໄປຮອດ. ປີ 1976 ທົ່ວປະເທດມີເສັ້ນທາງຍາວພຽງແຕ່ 12.000 ກວ່າກິໂລແມັດ, ຮອດປີ 2019 ມີຄວາມຍາວເຖິງ 60ລ້ານ ກວ່າກິໂລແມັດ, ໃນນີ້ທາງເບຕົງ, ທາງຢາງອັດສະຟານ ແລະ ຢາງ 11.637 ກວ່າກິໂລແມັດ, ທຸກເທສະ ບານແຂວງມີເສັ້ນທາງປູຢາງ ແລະ 138 ເມືອງ ມີເສັ້ນທາງປູຢາງ ຊຶ່ງກວມກວ່າ 93%. ການຂົນສົ່ງສິນ ຄ້າ ແລະ ຂົນສົ່ງໂດຍສານຂະຫຍາຍຕົວເພີ່ມຂຶ້ນ, ບໍລິມາດການຂົນສົ່ງໂດຍສານຢູ່ໃນລະດັບ 3.848 ພັນຄົນ, ຂົນສົ່ງສິນຄ້າ 2.651 ພັນໂຕນ. ປີ 2021 ການຂົນສົ່ງ ຖືກກະທົບຈາກການລະບາດຂອງພະຍາດໂຄວິດ-19 ບໍ່ວ່າຈະເປັນການບໍລິການຂົນສົ່ງສິນຄ້າທາງບົກ, ທາງນໍ້າ, ທາງອາກາດຊຶ່ງມີບໍລິມາດ ລວມກວ່າ 4.395 ໂຕນ ຫລື ກວ່າ 38,5% ແລະ ການຂົນສົ່ງຜູ້ໂດຍສານທຸກເສັ້ນທາງບັນລຸກວ່າ 41,6% ຂອງແຜນການ.
ອີກໜຶງຜົນສໍາເລັດດ້ານຄົມມະນາຄົມຂອງປະເທດເຮົາຄືທາງດ່ວນນະຄອນຫລວງວຽງຈັນ-ວັງວຽງ ທີ່ຍາວ 109 ກິໂລແມັດ ໄດ້ເປີດນໍາໃຊ້ໃນວັນທີ 2 ທັນວາ 2020. ສິ່ງພິເສດ ແລະ ເປັນຄວາມາກພູມໃຈຂອງປວງຊົນລາວທັງຊາດຄືຜົນສຳເລັດຂອງການກໍ່ສ້າງທາງລົດໄຟລາວ-ຈີນ ຈາກບໍ່ເຕັນແຂວງຫລວງນ້ຳທາ- ນະຄອນຫລວງວຽງຈັນ ຍາວ 426,5 ກິໂລແມັດ ແລະ ເປີດນໍາໃຊ້ຢ່າງເປັນທາງການໃນວັນທີ 3 ທັນວາ 2021 ແລະ ວັນທີ 4 ເດືອນດຽວກັນ, ປະຊາຊົນລາວ ແລະ ຄົນຕ່າງປະເທດທີ່ດຳລົງຊີວິດຢູ່ລາວ ຕ່າງກໍໄດ້ໃຊ້ບໍລິການລົດໄຟລາວ-ຈີນ ໄປທ່ຽງ ໄປປະຕິບັດລາລະກິດຢູ່ບັນດາແຂວງທາງພາກເໜືອ ຊຶ່ງຫລາຍຄົນກະຕືລືລົ້ນຫລາຍເພາະ ສາມາດປະຢັດຄ່າໃຊ້ຈ່າຍ ແລະ ເວລາຕື່ມອີກ. ສືບຕໍ່ກໍ່ສ້າງທາງລົດໄຟເຊື່ອມຕໍ່ ລາວ-ໄທ ໄລຍະ II (ຕອນທີ 2) ແຕ່ສະຖານີທ່ານາແລ້ງ-ສະຖານີວຽງຈັນ (ບ້ານຄໍາສະຫວາດ) ຍາວ 7,5 ກິໂລແມັດ ແລະ ເປີດແລ່ນລົດໄຟຂົນສົ່ງສິນຄ້າ ລາວ-ໄທແລ້ວ. ລະບົບນ້ໍາປະປາ ກໍຂະຫຍາຍໄປສູ່ເທສະບານບັນດາເມືອງໃນທົ່ວປະເທດ ແລະ ເຂດຊຸມຊົນກໍຄືກຸ່ມບ້ານໃຫຍ່ຈໍານວນໜຶ່ງ, ປະຊາກອນທີ່ອາ ໄສຢູ່ໃນເມືອງ ໄດ້ຊົມໃຊ້ນໍ້າປະປາສະອາດປອດໄພ ກວມ 80% ແລະ ປັດຈຸບັນ, ທົ່ວປະເທດມີໂຮງງານຜະລິດນ້ໍາປະປາ 163 ແຫ່ງ, ມີກໍາລັງການຜະລິດ 674.232 ແມັດກ້ອນຕໍ່ມື້ ສາມາດສະໜອງນໍ້າປະປາ ໃຫ້ປະຊາກອນໃນເມືອງ ກວມ 76%.
