ປີ 2021 ເມືອງຊຽງຮ່ອນ ແຂວງໄຊຍະບູລີ ສົ່ງອອກສິນຄ້າບັນລຸ 148 ຕື້ກວ່າກີບ
January 12, 2022 - 5:04 PM
ແຫລ່ງຂ່າວເມືອງຊຽງຮ່ອນ ແຂວງໄຊຍະບູລີ ລາຍງານວ່າ: ອີງຕາມການລາຍງານຈາກ ທ່ານ ສີເມືອງ ອິນທະວົງ ຫົວໜ້າຫ້ອງການ ອຸດສາຫະກຳ ແລະ ການຄ້າ ເມືອງຊຽງຮ່ອນ ແຂວງໄຊຍະບູລີ ໄດ້ລາຍງານວ່າ: ການສົ່ງອອກສິນຄ້າຢູ່ເມືອງຊຽງຮ່ອນ ໂດຍຜ່ານການກວດກາຈາກໜ່ວຍງານຜ່ານປະຕູດຽວຂອງເມືອງໃນໄລຍະ ປີ 2021 ຜ່ານມາ ສາມາດສົ່ງສິນຄ້າພາຍໃນເມືອງອອກໄປຕ່າງເມືອງ, ຕ່າງແຂວງ ແລະ ຕ່າງປະເທດ ໄດ້ຈໍານວນ 216.077 ໂຕນ ສາມາດສ້າງມູນຄ່າໄດ້ທັງໝົດ 148 ຕື້ກວ່າກີບ. ສິນຄ້າສ່ວນຫລາຍແມ່ນຜົນຜະລິດກະສິກຳ ແລະ ສັດລ້ຽງ ທຽບໃສ່ປີ 2020 ການສົ່ງອອກສິນຄ້າຫລຸດລົງ.
ການສົ່ງອອກສິນຄ້າຫລຸດເນື່ອງຈາກໄດ້ຮັບຜົນກະທົບຈາກການລະບາດຂອງພະຍາດໂຄວິດ-19 ເຮັດໃຫ້ການສົ່ງອອກຂາດສະພາບຄ່ອງຕົວ ເນື່ອງຈາກວ່າທາງການຂອງ ສປ ຈີນ ໄດ້ໃຊ້ມາດຕະການປ້ອງກັນການລະບາດຂອງພະຍາດໂຄວິດ-19 ໃນການຂົນສົ່ງເຮັດໃຫ້ລົດຂົນສົ່ງສິນຄ້າເຂົ້າຕາມຄິວ, ປັດໄຈການນຳເຂົ້າອຸປະກອນການຜະລິດມີຄວາມຫຍຸ້ງຍາກ ບວກກັບຕົ້ນທຶນລາຄາການນຳເຂົ້າສູງຈຶ່ງເຮັດໃຫ້ຜູ້ປະກອບການຕ້ອງໄດ້ຫລຸດຜ່ອນການຜະລິດ.
ສຳລັບທິດທາງແຜນການໃນປີຕໍ່ໜ້າການສົ່ງອອກສິນຄ້າຄາດວ່າຈະໃຫ້ບັນລຸໄດ້ 230.000 ກວ່າໂຕນ ແລະ ຄາດວ່າການສ້າງມູນຄ່າໃຫ້ໄດ້ 160 ຕື້ກວ່າກີບ.
