ຜົນການສຶກສາອາຟຣິກາໃຕ້ພົບ ໂອມິຄຣອນ ມີອັດຕາເປັນພາຫະບໍ່ສະແດງອາການສູງ ຊີ້ເປັນສາເຫດທີ່ລະບາດໄວທົ່ວໂລກ

ອາຟຣິກາເປີດເຜີຍຜົນການສຶກສາພົບໂອມິຄຣອນມີອັດຕາການເປັນພາຫະທີ່ບໍ່ສະແດງອາການສູງກວ່າສາຍພັນອື່ນ, ຊີ້ເປັນສາເຫດທີ່ເຮັດໃຫ້ລະບາດຢ່າງວ່ອງໄວທົ່ວໂລກ.

ວັນທີ 11 ມັງກອນ 2022, ສຳນັກຂ່າວຣອຍເຕີລາຍງານວ່າ: ອາຟຣິກາໃຕ້ເປີດເຜີຍຜົນການສຶກສາຫລ້າສຸດທີ່ບົ່ງຊີ້ວ່າ: ໄວຣັສໂຄວິດ-19 ສາຍພັນໂອມິຄຣອນ ມີອັດຕາການເປັນພາຫະທີ່ບໍ່ສະແດງອາການ (asymptomatic carriage) ສູງກວ່າສາຍພັນອື່ນໆ ເຊິ່ງສາມາດອະທິບາຍໄດ້ວ່າ ເປັນສາເຫດທີ່ໄວຣັສສາຍພັນໃໝ່ນີ້ແພ່ລະບາດໄປທົ່ວໂລກຢ່າງວ່ອງໄວ.

ລາຍງານລະບຸວ່າ: ໜຶ່ງໃນການສຶກສາຂອງອາຟຣິກາໃຕ້ ເຊິ່ງດຳເນີນການໃນໄລຍະເວລາທີ່ໄວຣັສໂອມິຄຣອນລະບາດໜັກໃນອາຟຣິກາໃຕ້ໃນເດືອນຜ່ານມາ ແລະ ໃນການສຶກສາອີກສະບັບທີ່ສຸ່ມກວດຕົວຢ່າງເຊື້ອທີ່ເກັບມາໃນໄລຍະເວລາດຽວກັນ ພົບວ່າມີຜູ້ຕິດເຊື້ອທີ່ໄດ້ຮັບການຢືນຢັນວ່າຕິດເຊື້ອໂຄວິດ-19 ແບບບໍ່ສະແດງອາການເປັນຈຳນວນຫລາຍເມື່ອທຽບໃສ່ການທົດລອງທີ່ເຄີຍດຳເນີນມາກ່ອນ.

ນັກວິໄຈເປີດເຜີຍວ່າ: ໃນການສຶກສາເພື່ອປະເມີນປະສິດທິພາບຂອງວັກຊີນປ້ອງກັນໂຄວິດ-19 ຂອງໂມເດິນາ ເຊິ່ງດຳເນີນການທົດລອງກັບຜູ້ຕິດເຊື້ອເອຊໄອວີ (HIV) ຈຳນວນ 230 ຄົນ ພົບວ່າ 31% ມີຜົນກວດການຕິດເຊື້ອໂຄວິດ-19 ເປັນບວກ ໂດຍໃນຈຳນວນນັ້ນມີ 56 ຕົວຢ່າງທີ່ໄດ້ຮັບການຢືນຢັນວ່າຕິດເຊື້ອໄວຣັສສາຍພັນໂອມິຄຣອນ.

ຂະນະທີ່ການສຶກສາອີກສະບັບໜຶ່ງ ເຊິ່ງດຳເນີນເພື່ອທົດລອງປະສິດທິພາບຂອງວັກຊີນຈອນສັນແອນຈອນສັນພົບວ່າ: ຄ່າສະເລ່ຍຂອງອັດຕາເປັນພາຫະທີ່ບໍ່ສະແດງອາການໃນໄລຍະເວລາທີ່ໄວຣັສໂອມິຄຣອນລະບາດເພີ່ມຂຶ້ນເປັນ 16% ເມື່ອທຽບໃສ່ໄລຍະເວລາທີ່ໄວຣັສເບຕາ ແລະ ເດວຕາລະບາດ ເຊິ່ງຄ່າສະເລ່ຍມີ 2,6% ເທົ່ານັ້ນ.

ຣອຍເຕີລະບຸໃນລາຍງານວ່າ: ອາຟຣິກາໃຕ້ຕ້ອງຜະເຊີນຈຳນວນຜູ້ຕິດເຊື້ອໂຄວິດ-19 ເພີ່ມຂຶ້ນຕໍ່ເນື່ອງນັບແຕ່ທ້າຍເດືອນພະຈິກປີຜ່ານມາ ເຊິ່ງເປັນໄລຍະເວລາທີ່ນັກວິທະຍາສາດຂອງອາຟຣິກາໃຕ້ອອກມາເຕືອນເຖິງການຄົ້ນພົບໄວຣັສສາຍພັນໂອມິຄຣອນ ກ່ອນຈຳນວນຜູ້ຕິດເຊື້ອຈະເລີ່ມໜ້ອຍລົງໃນເວລາຕໍ່ໄປ ໂດຍມີສັນຍານບົ່ງຊີ້ເບື້ອງຕົ້ນໃນໄລຍະທຳອິດວ່າໄວຣັສກາຍພັນສາຍພັນໃໝ່ນີ້ມີໂອກາດເຮັດໃຫ້ເກີດອາການຮຸນແຮງຈາກການຕິດເຊື້ອໜ້ອຍກວ່າສາຍພັນກ່ອນໜ້າ.

ອ້າງອີງ:

https://www.reuters.com/…/south-african-studies…/