WHO ເຜີຍຊາວເອີຣົບກວ່າເຄິ່ງ ຈະໄດ້ຮັບເຊື້ອ ໂອມິຄຣອນ ພາຍໃນ 6-8 ອາທິດຕໍ່ໜ້າ
ອົງການອະນາໄມໂລກເຜີຍຊາວເອີຣົບຫລາຍກວ່າ 50% ກຽມຮັບມືໂອມິຄຣອນ ຫລັງທ່າອ່ຽງອາທິດທຳອິດຂອງປີມີຜູ້ຕິດເຊື້ອເຖິງ 7 ລ້ານຄົນ.
ວັນທີ 11 ມັງກອນ 2022, ສຳນັກຂ່າວບີບີຊີ (BBC) ລາຍງານວ່າ: ດຣ. ຮານ ຄລູ ຜູ້ອຳນວຍການປະຈຳພາກພື້ນເອີຣົບຂອງອົງການອະນາໄມໂລກ (WHO) ອອກມາເຕືອນວ່າ: ການລະບາດຂອງເຊື້ອໂຄວິດ-19 ສາຍພັນໂອມິຄຣອນຈະຍັງດຳເນີນຕໍ່ໄປ ເພີ່ມຕື່ມຈາກເຊື້ອສາຍພັນເດວຕາທີ່ລະບາດຢູ່ແລ້ວ ແລະ ຈະມີຊາວເອີຣົບກວ່າເຄິ່ງທີ່ຄາດວ່າຈະຕິດເຊື້ອສາຍພັນດັ່ງກ່າວພາຍໃນ 6-8 ອາທິດຕໍ່ໜ້າ.
ດຣ. ຄລູ ອ້າງອີງຕົວເລກດັ່ງກ່າວມາຈາກ Institute for Health Metrics and Evaluation ໃນຊີແອດເຕິລ ທີ່ມີການຄິດໄລ່ຈາກຕົວເລກຜູ້ຕິດເຊື້ອໃນເອີຣົບ 7 ລ້ານຄົນໃນອາທິດທຳອິດຂອງປີ 2022 ເຊິ່ງເປັນການເພີ່ມຂຶ້ນຫລາຍກວ່າ 2 ເທົ່າພາຍໃນໄລຍະເວລາ 2 ອາທິດ.
ໂດຍປະເທດໃນແຖບເອີຣົບ ແລະ ອາຊີກາງຈະຍັງຮັບເສິກໜັກຕໍ່ໄປ ຈາກການທີ່ໄວຣັສເລີ່ມແພ່ກະຈາຍຈາກຝັ່ງຕາເວັນຕົກສູ່ຕາເວັນອອກ.
ຜົນການສຶກສາຫລາຍອັນຊີ້ວ່າ: ເຊື້ອໂອມິຄຣອນມີໂອກາດຈະເຮັດໃຫ້ເກີດອາການປ່ວຍໜັກບໍ່ຫລາຍ ເມື່ອທຽບໃສ່ສາຍພັນກ່ອນໆ, ແຕ່ຂໍ້ຄວນລະວັງຄືເປັນເຊື້ອທີ່ສາມາດແພ່ໄດ້ງ່າຍ ເຖິງວ່າຈະສັກວັກຊີນຄົບແລ້ວ.
ໂດຍໃນປະເທດຝຣັ່ງ, ທາງລັດຖະມົນຕີສາທາລະນະສຸກ ໂອລິວິເຍ ເວຣານ ເຜີຍວ່າ: ທັງໂອມິຄຣອນ ແລະ ເດວຕາເຮັດໃຫ້ລະບົບສາທາລະນະສຸກຮັບພາລະໜັກຕ່າງກັນ, ຜູ້ທີ່ໄດ້ຮັບເຊື້ອໂອມິຄຣອນສ່ວນຫລາຍຕ້ອງເຂົ້າຮັບການປິ່ນປົວໃນຫ້ອງປົກກະຕິ ແລະ ຜູ້ທີ່ໄດ້ຮັບເຊື້ອສາຍພັນເດວຕາມັກຈະຕ້ອງເຂົ້າໄປຢູ່ໃນຫ້ອງໄອຊີຢູ.
ອ້າງອີງ:
https://www.bbc.com/news/world-europe-59948920
