ຂະຫຍາຍເວລາ ຜ່ານດ່ານສາກົນ ບໍ່ຫານ ສປ ຈີນ ແກ້ໄຂການສົ່ງອອກສິນຄ້າຂອງລາວ

ເວັບໄຊ ກະຊວງອຸດສາຫະກຳ ແລະ ການຄ້າ ເຜີຍແຜ່ຂ່າວວ່າ: ວັນທີ 5 ມັງກອນ 2022, ຄະນະກຳ ມະການບໍລິຫານເຂດຮ່ວມມືເສດຖະກິດບໍ່ຫານ ສປ ຈີນ-ບໍ່ເຕັນ ສປປ ລາວ ໄດ້ອອກແຈ້ງການຂະຫຍາຍເວລາການຜ່ານດ່ານສາກົນ ບໍ່ຫານ ສປ ຈີນ ຊົ່ວຄາວ ເລີ່ມແຕ່ເວລາ 8:30-17:30 (ເວລາປັກກິ່ງ) ຫລື 7:30-16:30 ໂມງ(ເວລາລາວ) ກວດປ່ອຍລົດບັນທຸກສິນຄ້າທຸກປະເພດລວມທັງສິນຄ້າພາຍໃຕ້ໂຄງການ ປູກພືດທົດແທນ, ນັບແຕ່ເວລາ 17:30-21:00 ໂມງ(ເວລາປັກກິ່ງ) ຫລື 16:30-20:00 ໂມງ(ເວລາໃນລາວ) ກວດປ່ອຍລົດເປົ່າ(ການກໍານົດເວລາປ່ອຍລົດແຕ່ລະມື້ ຂຶ້ນກັບທັງສອງຝ່າຍຕົກລົງກັນຕາມສະພາບຕົວຈິງ).

ເນື່ອງຈາກໄລຍະນີ້ເປັນລະດູການສົ່ງອອກສິນຄ້າກະສິກໍາຫລາຍເຮັດໃຫ້ດ່ານບໍ່ຫານ-ບໍ່ເຕັນເກີດສະພາບ ແອອັດຢ່າງໜັກໜ່ວງ ແລະ ອີງຕາມໜັງສືຂອງຄະນະກຳມະການບໍລິຫານດ່ານສາກົນບໍ່ເຕັນແຂວງຫລວງ ນໍ້າທາ ສປປ ລາວ ກ່ຽວກັບການແກ້ໄຂບັນຫາແຮງງານຈີນກັບປະເທດ ແລະ ລົດບັນທຸກສິນຄ້າຜ່ານດ່ານ ແລະ ໜັງສືຂອງຫ້ອງການບໍລິຫານດ່ານບໍ່ຫານ ກິ່ງແຂວງສິບສອງພັນນາ ສປ ຈີນ ກ່ຽວກັບການສະເໜີໃຫ້ຟື້ນຟູເສັ້ນທາງຢູ່ດ່ານບໍ່ຫານ ພ້ອມທັງສະໜັບສະໜູນວຽກງານທີ່ກ່ຽວຂ້ອງກັບການຂົນສົ່ງ ແລະ ເພື່ອແກ້ໄຂບັນຫາດັ່ງກ່າວພ້ອມທັງຫລຸດຜ່ອນຄວາມແອອັດຢູ່ດ່ານ, ຄະນະກຳມະການບໍລິຫານເຂດຮ່ວມມືເສດ ຖະກິດບໍ່ຫານ, ສປ ຈີນ-ບໍ່ເຕັນ, ສປປ ລາວ ໄດ້ອອກແຈ້ງການການປະຕິບັດໂມງເວລາປະຈໍາການທີ່ດ່ານສາກົນບໍ່ເຕັນ ແຂວງຫລວງນໍ້າທາ ເລກທີ 001/ຄດບ, ລົງວັນທີ 5 ມັງກອນ 2022.