ສະຖາບັນການເງິນ-ການບັນຊີ ເປີດຊຸດຝຶກອົບຮົມວິຊາຄູໃຫ້ພະນັກງານ-ຄູ ຂະແໜງການເງິນ

ວັນທີ 10 ມັງກອນ 2021, ທີ່ສະຖາບັນການເງິນ-ການບັນຊີ ໄດ້ຈັດຊຸດຝຶກອົບຮົມວິຊາຄູ ໃຫ້ຄູອາຈານ ແລະ ພະນັກງານຂະແໜງການເງິນ, ໂດຍການໃຫ້ກຽດເຂົ້າຮ່ວມເປີດຊຸດຝຶກອົບຮົມຂອງທ່ານ ກົງຄຳ ສິດທິວໍລະດາ ຫົວໜ້າກົມຈັດຕັ້ງ ແລະ ພະນັກງານ ກະຊວງການເງິນ, ມີທ່ານ ປອ ບຸນຊູ ໄຊຍະສອນ ຫົວໜ້າພະແນກຄົ້ນຄວ້າວິທະຍາສາດ, ຄະນະສຶກສາສາດ, ມະຫາວິທະຍາໄລແຫ່ງຊາດ, ຕາງໜ້າສະຖາບັນ, ສູນຝຶກອົບຮົມ ແລະ ນັກສຳມະນາກອນຂອງບັນດາກົມ, ສະຖາບັນທີ່ຂຶ້ນກັບກະຊວງການເງິນເຂົ້າຮ່ວມ.

ໃນພິທີ ທ່ານ ປະລິຍາ ພົມມາວິເສດ ຫົວໜ້າສູນຝຶກອົບຮົມ ສະຖາບັນການເງິນ-ການບັນຊີ ໃຫ້ຮູ້ວ່າ: ການຈັດຊຸດຝຶກອົບຮົມໃນຄັ້ງນີ້ ເພື່ອແນໃສ່ສ້າງພະນັກງານຂອງຂະແໜງການເງິນໃຫ້ກາຍເປັນວິທະຍາກອນທີ່ມີຄຸນນະພາບຮັບໃຊ້ໃຫ້ແກ່ວຽກງານຝຶກອົບຮົມວິຊາສະເພາະໃຫ້ແກ່ພະນັກງານຂະແໜງການເງິນ, ຍົກລະດັບພະນັກງານຂະແໜງການເງິນທີ່ເຮັດໜ້າທີ່ສິດສອນ ໃຫ້ສາມາດຮັບຮູ້ ແລະ ເຂົ້າໃຈຢ່າງເລິກເຊິ່ງກ່ຽວກັບເຕັກນິກການແຕ່ງບົດສອນ, ການສ້າງຄຳຖາມ, ການປະເມີນຜົນ, ການນຳໃຊ້ເຕັກໂນໂລຊີ ແລະ ສື່ການສອນຕ່າງໆເຂົ້າໃນການສິດສອນ ແລະ ຮູບແບບການເອົານັກສຶກສາເປັນໃຈກາງ. ໃນນັ້ນ, ຈະໄດ້ຄົ້ນຄວ້າຮໍ່າຮຽນທັງໝົດ 5 ວິຊາ ປະກອບມີ: ວິຊາ ສຶກສາສາດ ແລະ ປະສົບການວິຊາຊີບຄູ, ຈິດຕະວິທະຍາພັດທະນາການ, ການວັດ ແລະ ປະເມີນຜົນ, ຈິດຕະວິທະຍາການສຶກສາ ແລະ ວິຊາ ຈິດຕະວິທະຍາ ແລະ ການທົດສອບ ຊຶ່ງຈະຈັດຝຶກອົບຮົມເປັນເວລາ 15 ວັນ ແຕ່ວັນທີ 10-25 ມັງກອນ 2022.

ໂອກາດດັ່ງກ່າວ, ທ່ານ ກົງຄຳ ສິດທິວໍລະດາ ໄດ້ມີຄຳເຫັນໂອ້ລົມວ່າ: ການຝຶກອົບຮົມຄັ້ງນີ້ສຸດທີ່ມີຄວາມໝາຍຄວາມສຳຄັນ ເພາະເປັນການສ້າງພະນັກງານຂະແໜງການເງິນ ໃຫ້ເປັນຄູຝຶກໃນອະນາຄົດ. ດັ່ງນັ້ນ, ນັກສຳມະນາກອນ ຈົ່ງເສີມຂະຫຍາຍຈິດໃຈເປັນເຈົ້າຕົນເອງ ໃນການຄົ້ນຄວ້າຮໍ່າຮຽນ ຍາດເວລາຄົ້ນຄວ້າ, ອ່ານເອກະສານໃຫ້ເລິກເຊິ່ງ ແລະ ສຶກສາບົດຮຽນໃໝ່ໆ, ຖອດຖອນບົດຮຽນນຳວິທະຍາກອນ ແລະ ແລກປ່ຽນຄວາມຄິດເຫັນ ລະຫວ່າງ ສຳມະນາກອນດ້ວຍກັນ, ພ້ອມເກັບກຳເອົາຄວາມຮູ້ຈາກການຮຽນຄັ້ງນີ້ ໃຫ້ໄດ້ຫຼາຍເທົ່າທີ່ຈະຫຼາຍໄດ້ ແລະ ນຳຄວາມຮູ້ໄປພັດທະນາຂະແໜງຂອງຕົນໃຫ້ເກີດປະໂຫຍດສູງສຸດ.