ການປ້ອງກັນ ເປັນສິ່ງສຳຄັນຢຸຸດສະພາບການລະບາດພະຍາດໂຄວິດ-19
ປັດຈຸບັນ, ຫລາຍປະເທດທົ່ວໂລກພວມຜະເຊີນກັບການລະບາດຢ່າງໜັກຂອງສາຍພັນໂອມິຄຣອນ ໂດຍເຫັນໄດ້ຈາກການລາຍງານແຕ່ລະມື້ ກວດພົບຜູ້ຕິດເຊື້ອໃໝ່ຫລາຍແສນຄົນຢູ່ບາງປະເທດ. ຍ້ອນແນວນີ້, ລັດຖະບານຫລາຍປະເທດ ຈຶ່ງໄດ້ວາງມາດຕະການເຂັ້ມງວດຂຶ້ນກວ່າເກົ່າເພື່ອຄວບຄຸມການລະບາດເປັນຕົ້ນ ການເຮັດວຽກຢູ່ເຮືອນ, ຫ້າມຈັດກິດຈະກຳທີ່ມີຄົນເຂົ້າຮ່ວມຫລາຍ ຫລື ຄົນທີ່ໄປໃຊ້ບໍລິການຢູ່ສະຖານ ທີ່ຕ່າງໆ ຕ້ອງສະແດງບັດສັກວັກຊີນຄົບທຸກເຂັມທີ່ແນະນຳ.
ອົງການອະນາໄມໂລກ ໄດ້ອອກມາເຕືອນວ່າ: ໂອມິຄຣອນ ຍັງຄົງເປັນຄວາມສ່ຽງລະດັບສູງຂອງໂລກ ເຊິ່ງປັດໄຈສຳຄັນຄືຄວາມສາມາດການແພ່ກະຈາຍເຊື້ອໄວກວ່າສາຍພັນອື່ນໆ ເຖິງວ່າເມື່ອຕິດເຊື້ອອາການ ຈະບໍ່ຮຸນແຮງເທົ່າສາຍພັນເດວຕາ, ແຕ່ຈຳນວນຜູ້ຕິດເຊື້ອ ໂອມິຄຣອນ ທີ່ເພີ່ມຂຶ້ນແບບກ້າວກະໂດດສົ່ງຜົນໃຫ້ຄົນເຈັບເຂົ້າປິ່ນປົວຢູ່ໂຮງໝໍຫລາຍຂຶ້ນໃນຫລາຍປະເທດ. ຂະນະທີ່ນັກວິທະຍາສາດກ່າວວ່າ ຫລັງປີໃໝ່ສາກົນ ຈະເປັນໄລຍະທີ່ພວກເຮົາ ເຫັນພາບການລະບາດຂອງສາຍພັນໂອມິຄຣອນ ໄດ້ຢ່າງຈະແຈ້ງຂຶ້ນກວ່າເກົ່າ ເຊິ່ງມີທ່າອ່ຽງວ່າຈະເປັນຄືກັນເກືອບທຸກປະເທດຄືຈະມີລາຍງານຜູ້ຕິດເຊື້ອເພີ່ມຂຶ້ນແບບກ້າວກະໂດດ ເນື່ອງຈາກຄົນເດີນທາງໄປຫາໝູ່ເພື່ອນ ແລະ ຄອບຄົວ ເປັນຈຳນວນຫລາຍເຮັດໃຫ້ເກີດການສຳພັດໃກ້ຊິດ. ສະເພາະ ສປປ ລາວ ການຕິດເຊື້ອພະຍາດໂຄວິດ-19 ຍັງຄົງໜ້າເປັນຫ່ວງໂດຍສະເພາະໃນໄລຍະສົ່ງທ້າຍປີເກົ່າ ແລະ ຕ້ອນຮັບປີໃໝ່ນີ້ ເຊິ່ງມີຜູ້ເດີນທາງກັບໄປຫາຄອບຄົວ ຫລື ເດີນທາງໄປພັກຜ່ອນຢູ່ຫລາຍແຂວງ ຫລື ເຂດທ່ອງທ່ຽວເປັນຈຳນວນຫລາຍ. ດັ່ງນັ້ນເພື່ອຄວາມປອດໄພຂອງທ່ານເອງ ຕ້ອງມີສະຕິລະວັັງຕົວ ເອົາໃຈໃສ່ປ້ອງກັນຕົນເອງຢ່າງເຂັ້ມງວດ ເພື່ອປ້ອງກັນບໍ່ໃຫ້ເອົາເຊື້ອໄປແພ່ສູ່ສະ ມາຊິກໃນຄອບຄົວ ແລະ ຄົນອ້ອມຂ້າງທ່ານ.
ປັດຈຸບັນ, ພັກ ແລະ ລັດຖະບານ ສຸມໃສ່ທຸກວິທີທາງຄວບຄຸມ ແລະ ສະກັດກັ້ນການລະບາດເພື່ອຮັບ ປະກັນໃຫ້ປະຊາຊົນທຸກຖ້ວນໜ້າຕິດເຊື້ອໜ້ອຍທີ່ສຸດ ຫລື ຖ້າມີກໍລະນີເສຍຊີວິດກໍໃຫ້ມີໜ້ອຍທີ່ສຸດເຊັ່ນດຽວກັນ. ນອກນັ້ນຍັງເລັ່ງໃຫ້ກຸ່ມເປົ້າໝາຍໄດ້ສັກວັກຊິນຢ່າງທົ່ວເຖິງ. ເພື່ອເຮັດໃຫ້ການຕິດເຊື້ອຫລຸດລົງໂດຍໄວ ພວກເຮົາຕ້ອງຮ່ວມກັນປະຕິບັດໃຫ້ເປັນຄວາມລຶ້ງແກວ່ນທຸກມື້:
- ຕ້ອງຮຽນຮູ້ຢູ່ກັບການແພ່ລະບາດຂອງພະຍາດໂຄວິດ-19 ໃຫ້ໄດ້ຢ່າງປອດໄພ.
- ເປັນເຈົ້າການປະຕິບັດມາດຕະການປ້ອງກັນການຕິດເຊື້ອ ແລະ ພ້ອມໃຈກັນຫັນໄປສູ່ວິຖີການດຳລົງຊີ ວິດປົກກະຕິແບບໃໝ່ ເຊັ່ນ: ໃສ່ຜ້າປິດປາກ-ດັງ ເມື່ອອອກຈາກເຮືອນ, ໝັ່ນລ້າງມື, ຮັກສາມາລະຍາດໃນການໄອ-ຈາມ, ບໍ່ເອົາມືສຳພັດໜ້າ, ຕາ, ດັງ, ປາກ, ຮັກສາໄລຍະຫ່າງ, ອະນາໄມ ຂ້າເຊື້ອຈຸດທີ່ສຳພັດ ເລື້ອຍໆ.
- ສັກວັກຊີນໃຫ້ຄົບທຸກເຂັມທີ່ແນະນຳ.
- ໝັ່ນສັງເກດ ແລະ ຕິດຕາມສຸຂະພາບຂອງຕົນ ແລະ ຄົນໃນຄອບຄົວ, ຖ້າຮູ້ສຶກບໍ່ສະບາຍໄປພົບແພດເພື່ອກວດຫາເຊື້ອ.
- ຫລີກເວັ້ນການໄປສະຖານທີ່ແອອັດ ຫລື ເຂົ້າຮ່ວມກິດຈະກຳທີ່ມີຄົນຫລາຍ, ຫລີກເວັ້ນການສຳພັດໃກ້ ຊິດຜູ້ທີ່ບໍ່ສະບາຍ.
- ຢູ່ບ່ອນທີ່ມີອາກາດຖ່າຍເທ, ອາກາດໝູນວຽນ.
ການປະຕິບັດທັງໝົດນີ້ຈະຊ່ວຍໃຫ້ພວກເຮົາສາມາດຜ່ານຜ່າວິກິດນີ້ໄປນຳກັນໄດ້.
