ເປຣູພົບຜູ້ປ່ວຍ ຟລູໂຣນາ ຕິດໂຄວິດພ້ອມໄຂ້ຫວັດໃຫຍ່ ເສຍຊີວິດຄົນທຳອິດ

ເປຣູພົບຜູ້ເສຍຊີວິດຈາກການຕິດເຊື້ອໄວຣັສໄຂ້ຫວັດໃຫຍ່ພ້ອມກັບໂຄວິດ-19 ຄົນທຳອິດຂອງປະເທດ, ເຜີຍຜູ້ປ່ວຍອາຍຸຫລາຍ ມີພະຍາດປະຈຳຕົວ ແລະ ຍັງບໍ່ໄດ້ສັກວັກຊີນ.

ວັນທີ 8 ມັງກອນ 2022, ກະຊວງສາທາລະນະສຸກເປຣູລາຍງານພົບຜູ້ປ່ວຍ ‘ຟລູໂຣນາ’ (flurona) ເຊິ່ງເປັນການຕິດເຊື້ອໄວຣັສໄຂ້ຫວັດໃຫຍ່ພ້ອມກັບເຊື້ອໂຄວິດ-19 ເສຍຊີວິດຄົນທຳອິດຂອງປະເທດ ໂດຍຜູ້ປ່ວຍມີອາຍຸ 87 ປີ ມີພະຍາດປະຈຳຕົວ ແລະ ຍັງບໍ່ໄດ້ສັກວັກຊີນປ້ອງກັນໂຄວິດ-19.

ທ່ານ ຊີຊາ ມູໄນໂຄ ນັກວິໄຈຈາກສູນລະບາດວິທະຍາ ການປ້ອງກັນ ແລະ ການຄວບຄຸມພະຍາດແຫ່ງຊາດ ສັງກັດກະຊວງສາທາລະນະສຸກ ເປີດເຜີຍວ່າ: ຜູ້ເສຍຊີວິດຄົນນີ້ເປັນຜູ້ປ່ວຍຟລູໂຣນາ 1 ໃນ 3 ຄົນທີ່ກວດພົບໃນພາກພື້ນອາມາໂຊນັສຂອງເປຣູ. ຂະນະທີ່ຜູ້ປ່ວຍອີກ 2 ຄົນເປັນເດັກໜຶ່ງຄົນ ແລະ ຄົນອາຍຸ 40 ປີ ທີ່ສັກວັກຊີນປ້ອງກັນພະຍາດໂຄວິດ-19 ຄົບໂດສແລ້ວ.

ທ່ານ ມູໄນໂຄ ລະບຸວ່າ: ຜູ້ປ່ວຍຟລູໂຣນາກຸ່ມນີ້ມີອາການໄອ, ເຈັບຄໍ ແລະ ອ່ອນເພຍທົ່ວໄປ ພ້ອມຮຽກຮ້ອງປະຊາຊົນເຂົ້າຮັບວັກຊີນປ້ອງກັນພະຍາດໂຄວິດ-19 ແລະ ໄຂ້ຫວັດໃຫຍ່ ເພາະຊ່ວຍຫລຸດຄວາມສ່ຽງການເສຍຊີວິດໄດ້.

“ບັນຫານີ້ສຳຄັນຫລາຍ ຕອນນີ້ເຮົາພົບການລະບາດຄັ້ງໃຫຍ່ຂອງເຊື້ອໄວຣັສໄຂ້ຫວັດໃຫຍ່ສາຍພັນ H3N2 ໃນພາກພື້ນປ່າຂອງປະເທດເຊັ່ນ: ໂລເຣໂຕ, ຊານມາຕິນ, ອາມາໂຊນັສ ແລະ ອູກາຍາລິ” ທ່ານ ມູໄນໂຄ ກ່າວ.

ສຳນັກຂ່າວຊິນຮົວລາຍງານວ່າ: ເປຣູປະກາດເຂົ້າສູ່ການລະບາດຂອງພະຍາດໂຄວິດ-19 ຮອບ 3 ໃນວັນທີ 4 ມັງກອນ ເຊິ່ງເກີດຂຶ້ນຈາກການລະບາດຂອງໄວຣັສສາຍພັນໂອມິຄຣອນໃນເດືອນທັນວາ ໂດຍປັດຈຸບັນເປຣູຢືນຢັນພົບຜູ້ຕິດເຊື້ອໂຄວິດ-19 ສາຍພັນດັ່ງກ່າວທັງໝົດ 309 ຄົນແລ້ວ.

ອ້າງອີງ:

https://www.xinhuathai.com/high/254262_20220107