ຜູ້ນຳຟີລິບປິນ ສັ່ງເຈົ້າໜ້າທີ່ຈັບກຸມ ຄົນບໍ່ສັກວັກຊີນແລ້ວອອກນອກເຮືອນ ຫລັງຕິດເຊື້ອວັນດຽວເຖິງ 20.000 ຄົນ
ທ່ານ ດູເຕີເຕ ໄຟຂຽວເຈົ້າໜ້າທີ່ຈັບຄົນບໍ່ສັກວັກຊີນແລ້ວອອກນອກເຮືອນ, ຊີ້ຄົນບໍ່ສັກວັກຊີນເຮັດໃຫ້ຄົນອື່ນສ່ຽງອັນຕະລາຍ ຫລັງຈຳນວນຜູ້ຕິດເຊື້ອໂຄວິດໃນຟີລິບປິນເພີ່ມ 2 ໝື່ນກວ່າຄົນໃນວັນດຽວ.
ວັນທີ 8 ມັງກອນ 2022, ເວັບໄຊ AI Jazeera ລາຍງານວ່າ: ທ່ານ ໂຣດຣິໂກ ດູເຕີເຕ ປະທານາທິບໍດີຟີລິບປິນ ຖະແຫລງໃນວັນທີ 6 ມັງກອນ ໂດຍອອກຄຳສັ່ງໃຫ້ເຈົ້າໜ້າທີ່ທ້ອງຖິ່ນເລັ່ງປຸກລະດົມ ຫລື ບັງຄັບປະຊາຊົນໃຫ້ໄປສັກວັກຊີນປ້ອງກັນໂຄວິດ ແລະ ຖ້າມີໃຜບໍ່ຍອມໄປຮັບວັກຊີນປ້ອງກັນໂຄວິດແລ້ວຍັງອອກຈາກເຮືອນໄປເຮັດກິດຈະກຳຕ່າງໆໃນຊຸມຊົນ ເຈົ້າໜ້າທີ່ສາມາດໃຊ້ກຳລັງຈັບກຸມໄດ້ທັນທີ.
ເຖິງວ່າຈະຖືກເບິ່ງວ່າຄຳສັ່ງດັ່ງກ່າວອາດບໍ່ຖືກຕ້ອງຕາມກົດໝາຍ, ແຕ່ທ່ານ ດູເຕີເຕ ລະບຸວ່າ: ນີ້ເປັນສະຖານະການສຸກເສີນ ແລະ ເປັນເລື່ອງທີ່ທຸກຄົນຕ້ອງຄວບຄຸມການລະບາດ ເຊິ່ງກ່ອນໜ້ານີ້ ທ່ານເຄີຍຂູ່ຈັບກຸມປະຊາຊົນທີ່ຝ່າຝືນມາດຕະການລັອກດາວ ແລະ ປະຕິເສດການສັກວັກຊີນໃນການລະບາດຂອງສາຍພັນເດວຕາໃນປີຜ່ານມາ.
ຜູ້ນຳຟີລິບປິນຍັງຮຽກຮ້ອງໃຫ້ປະຊາຊົນເລັ່ງໄປສັກວັກຊີນ ເພາະການບໍ່ໄປສັກວັກຊີນຈະເຮັດໃຫ້ທຸກຄົນສ່ຽງອັນຕະລາຍຈາກໄວຣັສທີ່ກຳລັງແພ່ລະບາດຢ່າງວ່ອງໄວໃນຊຸມຊົນ ແລະ ໃນໂລກຂອງເຮົາ.
ທ່າທີຫລ້າສຸດຂອງຜູ້ນຳຟີລິບປິນເກີດຂຶ້ນຫລັງຈາກຈຳນວນຜູ້ຕິດເຊື້ອໂຄວິດ-19 ໃນຟີລິບປິນກຳລັງເພີ່ມສູງຂຶ້ນ ໂດຍຈຳນວນຜູ້ຕິດເຊື້ອຫລ້າສຸດໃນໄລຍະ 24 ຊົ່ວໂມງຜ່ານມາມີຢ່າງໜ້ອຍ 21.819 ຄົນ. ຂະນະດຽວກັນ ທາງການຟີລິບປິນຍັງພົບອັດຕາການກວດແລ້ວພົບເຊື້ອໂຄວິດສູງເຖິງ 40% ນຳອີກ ເຊິ່ງຜູ້ຕິດເຊື້ອສ່ວນຫລາຍພົບຢູ່ນະຄອນຫລວງມະນິລາ ແລະ ເມືອງທີ່ຢູ່ໃກ້ຄຽງ.
ຜູ້ຊ່ຽວຊານປະເມີນວ່າ: ຜູ້ຕິດເຊື້ອໃໝ່ໃນຟີລິບປິນອາດຕິດເຊື້ອໂຄວິດສາຍພັນໂອມິຄຣອນ ເຊິ່ງມີທ່າອ່ຽງແພ່ເຊື້ອໄວກວ່າສາຍພັນກ່ອນໜ້າ. ພ້ອມສະແດງຄວາມກັງວົນວ່າ: ຈຳນວນຜູ້ຕິດເຊື້ອໃນຟີລິບປິນອາດເພີ່ມສູງຂຶ້ນຢ່າງຕໍ່ເນື່ອງ ແລະ ອາດເຖິງຈຸດສູງສຸດໃນທ້າຍເດືອນນີ້.
ຂະນະທີ່ອັດຕາການສັກວັກຊີນປ້ອງກັນໂຄວິດຂອງຟີລິບປິນ ມີປະຊາຊົນໄດ້ຮັບວັກຊີນແລ້ວປະມານ 50% ໂດຍໃນຈຳນວນນີ້ມີຜູ້ຮັບວັກຊີນຄົບໂດສປະມານ 34% ເທົ່ານັ້ນ.
ອ້າງອີງ:
https://www.aljazeera.com/…/arrest-unvaccinated-if-they…
https://ourworldindata.org/covid-vaccinations?country=PHL
