ເກີດອຸບັດຕິເຫດລົດກະບະຄົນຈີນ ຕຳກັບລົດຈັກ ຢູ່ເຂດເສດຖະກິດພິເສດກວມລວມໄຊເສດຖາ ເສຍຊີວິດ 1 ຄົນ

ອີງຕາມປ້ອງກັນຄວາມສະຫງົບນະຄອນຫລວງວຽງຈັນ ລາຍງານວ່າ: ວັນທີ 6 ມັງກອນ 2022 ຜ່ານມາ, ໄດ້ເກີດມີອຸບັດຕິເຫດຢູ່ເຂດເສດຖະກິດພິເສດກວມລວມໄຊເສດຖາ ນະຄອນຫລວງວຽງຈັນ, ລົດກະບະນິສັນນາວາລ້າ ໝາຍເລກທະບຽນ ຮຮ 3998 ກຳແພງນະຄອນ ຕໍາກັບລົດຈັກເວບຈີນ ໝາຍເລກທະບຽນ ຍລ 8559 ກໍາແພງນະຄອນ ເຮັດໃຫ້ຜູ້ຂັບຂີ່ລົດຈັກເສຍຊີວິດຄາທີ່ 1 ຄົນ.

ເຈົ້າໜ້າທີ່ຕຳຫລວດຈະລາຈອນ ນະຄອນຫລວງວຽງຈັນ ໃຫ້ຮູ້ວ່າ: ຜ່ານການລົງວັດແທກສັນນະສູດສະຖານທີ່ເກີດເຫດ ຮູ້ວ່າຊື່ຜູ້ເສຍຊີວິດ ທ້າວ ສາ ອາຍຸ 22 ປີ ປະຊາຊົນ ຢູ່ບ້ານໂຊກນ້ອຍ ເມືອງໄຊເສດຖາ ນະຄອນຫລວງວຽງຈັນ. ສ່ວນຄູ່ກໍລະນີຂັບລົດກະບະເປັນຄົນຈີນ ຊື່ ທ້າວ ຊຸ້ງຊວງຫົງ ອາຍຸ 48 ປີ ກໍາມະກອນ ຢູ່ເຂດເສດຖະກິດພິເສດກວມລວມໄຊເສດຖາ ນະຄອນຫລວງວຽງຈັນ. ສ່ວນການດຳເນີນຄະດີແມ່ນຍັງຢູ່ໃນການສືບສວນ-ສອບສວນ ເຈົ້າໜ້າທີ່.