ປະກາດແຕ່ງຕັ້ງ ທ່ານ ບຸນປະເສີດ ສີກຸນລະບຸດ ກໍາມະການພັກກະຊວງ ຫົວໜ້າກົມສ່ວຍສາອາກອນ, ເປັນເລຂາຄະນະພັກຮາກຖານ ກົມສ່ວຍສາອາກອນ.

ເລຂາຄະນະພັກຮາກຖານ ກົມສ່ວຍສາອາກອນ

ໃນຫວ່າງບໍ່ດົນມານີ້, ທີ່ກົມສ່ວຍສາອາກອນ ກະຊວງການເງິນ, ໄດ້ຈັດພິທີມອບ-ຮັບໜ້າທີ່ເລຂາຄະນະພັກຮາກຖານກົມສ່ວຍສາອາກອນ ແລະ ປະກາດການຈັດຕັ້ງຂັ້ນຮອງຫົວໜ້າພະແນກຂອງກົມ, ໂດຍການເປັນກຽດເຂົ້າຮ່ວມຂອງທ່ານ ບຸນໂຈມ ອຸບົນປະເສີດ ກຳມະການສູນກາງພັກ ເລຂາຄະນະບໍລິຫານພັກ ລັດຖະມົນຕີກະຊວງການເງິນ, ມີຄະນະປະຈຳພັກກະຊວງ, ບັນດາຫົວໜ້າກົມ, ຮອງກົມ ແລະ ພະນັກງານຫຼັກແຫຼ່ງຂອງກະຊວງການເງິນເຂົ້າຮ່ວມ.

ໃນພິທີ, ທ່ານ ກົງຄຳ ສິດທິວໍລະດາ ຫົວໜ້າກົມຈັດຕັ້ງ ແລະ ພະນັກງານ ກະຊວງການເງິນ ໄດ້ຜ່ານມະຕິຕົກລົງ ສະບັບເລກທີ 178/ຄປຈ.ກງ, ລົງວັນທີ 30 ທັນວາ 2021 ວ່າດ້ວຍການບົ່ງຕົວແຕ່ງຕັ້ງເລຂາຄະນະພັກຮາກຖານກົມສ່ວຍສາອາກອນ, ໂດຍອີງຕາມກົດລະບຽບຂອງພັກປະຊາຊົນປະຕິວັດລາວ ສະໄໝທີ XI ແລະ ດຳລັດຂອງນາຍົກລັດຖະມົນຕີ ສະບັບເລກທີ 666/ນຍ, ລົງວັນທີ 21 ທັນວາ 2021 ວ່າດ້ວຍການແຕ່ງຕັ້ງຫົວໜ້າກົມສ່ວຍສາອາກອນ,ໂດຍໄດ້ແຕ່ງຕັ້ງ: ທ່ານ ບຸນປະເສີດ ສີກຸນລະບຸດ ກໍາມະການພັກກະຊວງ ຫົວໜ້າກົມສ່ວຍສາອາກອນ, ເປັນເລຂາຄະນະພັກຮາກຖານ ກົມສ່ວຍສາອາກອນ.

ພ້ອມດຽວກັນນີ້, ຍັງໄດ້ຜ່ານຂໍ້ຕົກລົງຂອງລັດຖະມົນຕີກະຊວງການເງິນ ສະບັບເລກທີ 0001/ກງ, ລົງວັນທີ 04 ມັງກອນ 2022 ວ່າດ້ວຍການແຕ່ງຕັ້ງຮອງຫົວໜ້າພະແນກ ຂອງກົມສ່ວຍສາອາກອນ, ແຕ່ງຕັ້ງ: ທ່ານ ຂັນທອງ ພະລະຄອນ ຫົວໜ້າສ່ວຍສາອາກອນ ປະຈຳແຂວງວຽງຈັນ ເປັນຮອງຫົວໜ້າພະແນກຈັດຕັ້ງ, ບໍລິຫານ ແລະ ການເງິນ ກົມສ່ວຍສາອາກອນ; ແຕ່ງຕັ້ງ: ທ່ານ ພັນທອງ ວັນທາວົງ ຫົວໜ້າສ່ວຍສາອາກອນ ປະຈຳແຂວງໄຊສົມບູນ ເປັນຮອງຫົວໜ້າພະແນກຄຸ້ມຄອງລາຍຮັບບໍ່ແມ່ນພາສີ ແລະ ສ່ວຍສາອາກອນ ກົມສ່ວຍສາອາກອນ ກະຊວງການເງິນ.

ໂອກາດດັ່ງກ່າວ, ໄດ້ມີການເຊັນບົດບັນທຶກມອບ-ຮັບໜ້າທີ່ເລຂາຄະນະພັກຮາກຖານກົມສ່ວຍສາອາກອນລະຫວ່າງທ່ານ ປອ ພູທະນູເພັດ ໄຊສົມບັດ ຄະນະປະຈຳພັກກະຊວງ, ເລຂາຄະນະພັກຮາກຖານກົມສ່ວຍສາອາກອນ (ຜູ້ເກົ່າ) ແລະ ທ່ານ ບຸນປະເສີດ ສີກຸນລະບຸດ ເລຂາຄະນະພັກຮາກຖານກົມສ່ວຍສາອາກອນ (ຜູ້ໃໝ່) ເພື່ອສືບຕໍ່ປະຕິບັດໜ້າທີ່ການເມືອງໃຫ້ບັນລຸຕາມຄາດໝາຍທີ່ຂັ້ນເທິງໄດ້ມອບໃຫ້.

ໂອກາດນີ້,ທ່ານ ບຸນໂຈມ ອຸບົນປະເສີດ ໄດ້ຊົມເຊີຍເລຂາຄະນະພັກຮາກຖານກົມສ່ວຍສາອາກອນ(ຜູ້ເກົ່າ) ໄດ້ມີຜົນງານອັນພົ້ນເດັຫຫຼາຍດ້ານໃນການຊີ້ນຳ-ນຳພາສະມາຊິກພັກ, ສຳເລັດໜ້າທີ່ການເມືອງທີ່ໄດ້ຮັບມອບໝາຍໄລຍະຜ່ານມາກໍ່ຄືການກໍ່ສ້າງພັກໄດ້ມີການເຕີບໃຫຍ່ຂະຫຍາຍຕົວ. ໃນນັ້ນ, ໄດ້ກໍ່ສ້າງສະມາຊິກພັກຈາກ 81 ສະ ຫາຍມາເປັນ 96 ສະຫາຍ, ໄດ້ສູ້ຊົນພັດທະນາກົມສ່ວຍສາອາກອນຫັນເປັນທັນສະໄໝ, ການເກັບລາຍຮັບສ່ວຍສາອາກອນຕ້ອງໄດ້ສູ້ຊົນໃນທ່າມກາງທີ່ເສດຖະກິດ-ສັງຄົມ ກຳລັງພົບຄວາມຫຍຸ້ງຍາກ ຍ້ອນຜົນກະທົບຈາກການລະ ບາດຂອງພະຍາດ Covid-19 ແລະ ເຊື່ອໝັ້ນວ່າເລຂາຄະນະພັກຮາກຖານ (ຜູ້ໃໝ່) ຈະສືບຕໍ່ປັບປຸງ, ປຶກສາຫາລືກັນສ້າງໜ່ວຍພັກໃຫ້ເປັນໜ່ວຍພັກປອດໃສ, ເຂັ້ມແຂງ, ສືບຕໍ່ປັບປຸງຄະນະພັກຮາກຖານ, ປັບປຸງວຽກງານສ່ວຍສາອາກອນຊຶ່ງເນັ້ນໃສ່ການປະຕິບັດຕົວຈິງໃຫ້ມີປະສິດທິພາບໄດ້ຮັບປະສິດທິຜົນຕາມມອບໝາຍທີ່ວາງໄວ້.